Артекым итын шъхьаIэу мырэущтэу заджэхэрэр Адыгеим щыщ Александр Петровым къыратыгъ.

Дунэе кIэлэцIыкIу гупчэу «Артекым» ябгъонэрэ сменэу «Движение вверх» зыфиIорэр щаухыгъ. Урысыем ишъо-лъырхэм ыкIи къэралыгъо 17-м къары-кIыгъэ кIэлэцIыкIу 3000 ащ зэфищэгъагъ. Мэфэ 21-м къыкIоцI кIэлэцIыкIухэр Iофтхьэбзэ зэфэшъхьафхэм, зэнэкъокъу-хэм ахэлэжьагъэх, шIэныгъэхэр зэра-гъэгъотыгъэх.

Зыгъэпсэфыгъом иаужырэ мафэ тефэу «Артек-арена» зыфиIорэ чIыпIэм кIэлэцIыкIухэр щаугъоигъэх. Ахэм къаIукIагъэх хэушъхьафыкIыгъэ дзэ операцием хэтыгъэхэу, ЛIыхъужъныгъэм иорден икавалерэу Илья Подорогрэ Урысыем и ЛIыхъужъэу Олег Пиво-варовымрэ. Къыблэ федеральнэ шъолъырым щыщ кIэлэеджэкIо 836-рэ, ахэм ащыщэу Адыгеим икIыгъэ кIэлэ-цIыкIу 30 зэфэхьысыжь зэхахьэм хэлэжьагъэх.

Хабзэ зэрэхъугъэу, гъэ къэс мыщ фэдэ зэхахьэм анахь гъэхъэгъэ ин зы-шIыгъэ кIэлэцIыкIухэр — лагерым ипрограммэ зыгъэцэкIагъэхэр ыкIи зэ-кIэхэми яшъхьэкIэфэныгъэ къэзылэ-жьыгъэхэр — кIэлэцIыкIу гупчэм ибгъэ-хэлъхьэ шъхьаIэу «Артекым ижъуагъу» зыфиIорэмкIэ къыхагъэщых. Ащ фэдэ бгъэхалъхьэ зэратыгъэхэм ахэфагъ Мыекъуапэ щыщ Александр Петровыр.

Илъэс пшIыкIуплI зыныбжь Александр ящэнэрэу «Артекым» щыIагъ. Анахьэу гъэхъагъэ зыщишIыгъэ лъэныкъор кавказ къашъохэр ары, илъэсиплI ыныбжьыгъ а къашъохэр ащ зэригъашIэхэу зеублэм. Ащ фэшъхьафэу естественнэ ыкIи хьисап шIэныгъэхэмкIэ, акробатикэмкIэ ыкIи черлидигымкIэ илэгъухэм къахэщыгъ.

«Сызхэт купыр нахь дэгъоу мы сменэм къыщызгурыIуагъ, пэщэныгъэ IэнатIэми зыфэзгъэсагъ. КIэлэегъэджэ отрядым сырикапитаныгъ. КIэлэегъэджэ сэнэхьатым нэIуасэ зыфэтшIыгъ, кIэлэпIунми зыфэдгъэсагъ. Сэнаущыгъэ зыхэлъ кIэлабэ тиотряд хэтыгъ, ахэм лъэпэчIэсэ къэшъуакIэр язгъэшIагъ, акробатикэми фэзгъэсагъэх. «Артекым ижъуагъо» сэ къэсэзгъэхьыгъэр нэут-хагъэу къызхэзгъэфагъэр, Iофтхьабзэмэ сазэрахэлэжьагъэр ыкIи цIыфмэ гущыIэгъухэр адэсшIышъу зэрэхъугъэр арэу сэлъытэ»,— игупшысэхэр къыри-IотыкIыгъэх Александр Петровым.