Республикэм игурыт еджапIэхэм шIэныгъэм и Мафэ фэгъэхьыгъэ Iофтхьабзэхэр непэ ащыкIуагъэх.

Адыгеим ис кIэлэцIыкIу мини 6,5-мэ апэрэу одыджыныр къафытеуагъ. Шъолъырым иеджапIэхэр джырэ шапхъэхэм адиштэнхэмкIэ, шIэныгъэ куу кIэлэеджакIохэм ягъэгъотыгъэнымкIэ ищыкIагъэр зэкIэ рес­публикэм щагъэцакIэ.

ИгъэкIотыгъэ гъэцэкIэжьынхэм ауж къызэIуахыжьыгъэ лицееу N 8-м мэфэкI Iофтхьабзэр зэрэщыкIуагъэр нэрылъэгъу тфэхъугъ.

Дахэу фэпэгъэ, къэгъэгъэ Iэрамхэр зыIыгъ кIэлэеджакIохэр еджапIэм къекIолIагъэх. Мы мафэр зимэфэкI шъыпкъэр апэрэ классым ихьэхэрэр ары. Мы илъэсым лицеим нэбгыри 130-рэ къычIэхьагъ.

Пстэуми апэ къэзэрэугъоигъэхэр Урысыем ыкIи Адыгеим ягимнхэм ядэIугъэх, быракъхэр дагъэкIоягъэх.

МэфэкI Iофтхьабзэр къызэ­Iуихыгъ АР-м экономикэ хэхъо­ныгъэмкIэ ыкIи сатыумкIэ ими­нистрэу Шэуджэн Заур. Адыгэ Республикэм и ЛIышъхьэу ­КъумпIыл Мурат ыцIэкIэ Iоф­тхьабзэм хэлажьэхэрэм ащ шIу­фэс къарихыгъ, мэфэкI ма­фэмкIэ къафэгушIуагъ. КIэлэцIыкIухэм яегъэджэнкIэ ищы­кIэгъэ пстэури лицеим иIэ зэ­рэхъугъэр, аужырэ шапхъэхэм зэрадиштэрэр къыIуагъ.

— Федеральнэ къэралыгъо программэхэм яшIуагъэкIэ рес­публикэм ит гурыт еджапIэхэр, кIэлэцIыкIу IыгъыпIэхэр агъэ­кIэжьых, кIэу ашIых. ШIэныгъэ куу кIэлэеджакIохэм зэрагъэ­гъо­тыным фэшI ящыкIагъэр зэкIэ аIэкIэлъ. ИгъэкIотыгъэ гъэ­цэ­кIэжьынхэм ауж лицеим хэхъо­ныгъэхэр зэришIыщтхэм тицыхьэ телъ, — къыIуагъ министрэм.

КIэлэеджэкIо пстэуми гъэ­сэныгъэ дэгъу ягъэгъотыгъэныр пшъэрылъ шъхьаIэу зэрэщытыр къыIуагъ Мыекъопэ админист­рацием ипащэу Геннадий Митрофановым. ЗиIоф хэшIыкIы-шхо фызиIэ кIэлэегъаджэхэм яшIуагъэкIэ кIэлэеджакIохэм олимпиадэ, зэнэкъокъу зэфэшъхьафхэм гъэхъагъэхэр зэрэщашIыхэрэр, ащкIэ ахэм зэрафэразэхэр къыIуагъ. Апэрэ классым ихьагъэхэм зафигъа­зэзэ дэгъоу еджэнхэу, якIэлэ­егъаджэхэм ядэIунхэу афэ­лъэIуагъ.

Лицеим ипащэу Эмма Осерскаяр къэзэрэугъоигъэхэм къа­фэгушIуагъ ыкIи яеджапIэ зэ­рэзэтырагъэпсыхьагъэмкIэ АР-м и ЛIышъхьэ, Мыекъопэ къэлэ администрацием ипащэ ыкIи хэбзэ гъэцэкIэкIо къулыкъухэм зэрафэразэр къыIуагъ. ГъэхъэгъэшIухэр ашIыхэзэ яIофшIэн зэрэлъагъэкIотэщтыр къыхи­гъэщыгъ.

Хабзэ зэрэхъугъэу, лицеим икIэлэеджэкIо анахь дэгъухэм Женя Поповым исаугъэтэу еджапIэм дэтым къэгъагъэхэр кIэралъхьагъэх. Нэужым кIэлэеджэкIо цIыкIухэр дэгъоу еджэнхэм фэзыщэщт шапхъэу еджапIэм чIэлъхэр агъэцэкIа­гъэх, дышъэ IункIыбзэхэр, тхьапэм хэшIыкIыгъэ къухьэлъатэхэр аратыгъэх, усэхэр къаIуагъэх, къэшъуагъэх.

Нэужым кIэлэеджэкIо цIыкIухэр яклассхэм ачIэхьагъэх. Апэрэ классыр зыштэгъэ Га-лина Шапошниковам къызэ­рэтиIуагъэмкIэ, апэрэ урокыр ма­мырныгъэм фэгъэхьыгъэщт, кIэлэцIыкIухэм ащ мэхьанэу иIэр къагурагъэIощт.

ИлъэсыкIэ еджэгъумкIэ кIэлэеджакIохэми, кIэлэегъаджэ­хэми, ны-тыхэми тафэгушIо.

Делэкъо Анет. Сурэтхэр: А. Балабась.