Адыгэ къэралыгъо университетым иапэрэ курс ихьагъэхэм апае непэ мэфэкI Iофтхьабзэ афызэхащагъ, студент зэрэ­хъугъэхэр къэзыушыхьатрэ тхылъхэр ара­ты­жьыгъэх.

Мыгъэ мы апшъэрэ еджапIэм Урысыем ишъолъыр 58-мэ ыкIи IэкIыб хэгъэгу 13-мэ ащыщ къарыкIыгъэ ныбжьыкIэхэр чIэ­хьагъэх.

Iофтхьабзэр Урысыем, Адыге­им ягимнхэмкIэ аублагъ. Апшъэ­рэ еджапIэм истуденческэ шIэ­ныгъэ обществэ ипащэу Хьашъхъо Данэ, ныбжьыкIэхэм я Урысые союз истуденческэ клуб ипащэ игуадзэу Абрэдж Амир, студентхэм япрофсоюз организацие хэтэу Раиса Калачевам ыкIи юридическэ факультетым истудент научнэ об­ществэ хэтэу ХъокIо Амир Адыгэ къэралыгъо университетым ибыракъ дагъэкIоягъ.

МэфэкI Iофтхьабзэм хэла­жьэхэрэм шIуфэс къарихыгъ апшъэрэ еджапIэм иректорэу Мамый Даутэ. ЩыIэныгъэм лъэ­бэкъукIэу щадзыгъэмкIэ ар къафэгушIуагъ, зы унэгъо Iужъу фэдэу зэрэзэхэтынхэ фаер къариIуагъ. ШIэныгъэ зэрагъэгъотынымкIэ апшъэрэ еджапIэм иIэ амалхэр къызыфагъэфе­дэнхэу, джащ фэдэу спортым, культурнэ Iофтхьабзэу зэхащэхэрэм чанэу ахэлэжьэнхэу къариIуагъ. Программэу «Пат­риот 2030» зыфиIорэм зэрэ­хэ­лажьэхэрэм ишIуагъэкIэ апшъэ­рэ еджапIэм хэхъоныгъэхэр зэришIыхэрэр ащ къыхигъэщыгъ. Апэрэ курсым ихьагъэхэм ректорым студенческэ билетхэр аритыжьыгъэх.

Джащ фэдэу АКъУ-м зекIонымкIэ ыкIи социальнэ технологиехэмкIэ ифакультет идеканэу Елена Демкинар ыкIи АР-м и Къэралыгъо — Совет Хасэм и НыбжьыкIэ парламент ипащэу Эвелина Ананниковар илъэсыкIэ еджэгъумкIэ ныбжьыкIэхэм къафэгушIуагъэх.

Iофтхьабзэр, хабзэ зэрэхъугъэу, адыгэ къашъоу уджкIэ аухыгъ.