Паркыр анахь къэзыгъэдахэхэрэм ащыщ хъущт
Архитектурэ-художественнэ теплъэ дахэ зиIэщт остыгъэшхом игъэуцун Адыгэ Республикэм ителемачтэ щыфежьагъэх.
Урысыем ителевизионнэ ыкIи ирадиокъэтын сеть (РТРС) шIухьафтынэу республикэм къыритыгъ а архитектурэ гъэшIэгъон зиIэ остыгъэр. Метрэ 200 фэдиз зилъэгэгъэ мачтэр шъо зэфэшъхьафхэмкIэ къэнэфырэ остыгъэ 7040-мэ ыкIи прожектори 8-мэ къагъэкIэрэкIэщт, къалэм ипарк къыпэIулъ шъолъырыкIэри къагъэдэхэщт.
Мыщ ишIуагъэкIэ видеороликхэр, Урысыем ибыракъ, къалэмрэ республикэмрэ ятамыгъэхэр къагъэлъэгъощтых.
Мачтэр зыдэщыт чIыпIэр къэлэдэсхэр анахьыбэу зыщытезекIухьэхэрэ чIыпIэхэм ащыщ. Гъунэгъу къушъхьэтхэу Нэгыежъ Iуашъхьэ тарихъ мэхьанэ иIэу щыт. Мыщ ижъырэ пытапIэр ыкIи Iошъхьабэ къыщыхагъэщыгъ. Адыгеим и ЛIышъхьэу КъумпIыл Мурат игъо зэрилъэгъугъэм тетэу къалэм иадминистрацие шъолъырыкIэу «Мэздахэр» мыщ щегъэпсы, ащ гектар 435-рэ еубыты. Къэлэдэсхэм ямызакъоу хьакIэхэми а чIыпIэр якIуапIэ зэрэхъущтым уехъырэхъышэнэу щытэп. Шъо зэфэшъхьафхэмкIэ къызэлъынэфэщт телемачтэр паркым ичIыпIэ анахь гъэшIэгъонхэм зыкIэ ащыщ хъущт.
Оборудованиер загъэуцухэкIэ, мэфэкI шIыкIэм тетэу остыгъэхэр къызэдыхагъэнэщтых.
Мыекъопэ мачтэм цифрэ шIыкIэм тетэу телеканал 20, FM-радиостанции 4, телеканалэу «Мыекъопэ телевидениер» зыфиIорэр республикэм щыпсэурэ нэбгырэ мин 300-м апае къеты. ПIэлъэ кIэкIым къыкIоцI телекъэтынхэм зэпыугъохэр афашIыхэзэ ашIыщт оборудованиер зэхэзыгъэуцохэрэм ящынэгъончъагъэ пае. Сайтэу ртрс.рф зэпыугъохэм яграфик къихьащт.