Народнэ депутатхэм я Совет ышIыгъэ унашъом тетэу мы илъэсым къалэу Мыекъуапэ и Мафэ Iоныгъом и 2-м хигъэунэфыкIыщт. Адыгеим щыпсэухэрэмрэ ихьа­кIэхэмрэ мэфэкIышхом хэлэжьэнхэу рагъэблагъэх.

[caption id="attachment_138412" align="aligncenter" width="800"] Сурэтыр: «Адыгэ макъэм» ихъарзынэщ.[/caption]

Iофтхьабзэхэу агъэнэфагъэхэм ащыщых интер­активнэ гупчэхэр, егъэ­джэкIо-гъэсакIохэм япарад, спортымкIэ зэнэкъо­къухэр, творческэ купхэм якъэгъэлъэгъонхэр.

Пчэдыжьым къыщегъэ­жьагъэу щэджагъом нэс экспозициехэмрэ интер­-активнэ гупчэхэмрэ ура­мэу Краснооктябрьскэм (урамэу Советскэм къыщегъэжьагъэу Пушкиным ыцIэкIэ щытым нэсэу) щя­плъынхэ алъэкIыщт. Ахэр зэкIэ Iофыгъоу зэ­пхыгъэ­хэм ялъытыгъэу зэтеутыгъэщтых:

— «Мыекъуапэ — гъэсэныгъэм игупч» — гъэсэныгъэ зыщарагъэгъотырэ муниципальнэ учреждениехэм якъэгъэ­лъэгъонхэр;

— «Мыекъуапэ — ныбжьыкIэхэм ягупч» — ныбжьыкIэ объединениехэм, гурыт ыкIи апшъэрэ гъэсэныгъэ зыщарагъэгъотырэ еджапIэхэм ачIэсхэм гъэсэныгъэмкIэ шIэны­гъэмкIэ, творчествэмкIэ ягъэхъагъэхэм якъэгъэ­лъэгъон;

— «Мыекъуапэ – спортым игупч» — муниципальнэ спорт еджапIэхэм ягъэхъагъэхэм якъэгъэ­лъэгъон;

— «IэпэIасэхэм якъал» — Iэпэщысэхэм яшIынкIэ IэпэIасэхэм къагъэ­хьазырыгъэ пкъыгъохэм якъэгъэлъэгъонрэ ящэнрэ.

ХьакIэхэм джащ фэдэу нэIуасэ зафашIын алъэ­кIыщт IэшIэгъэ пкъыгъо зэфэшъхьафыбэм. Апэрэу мы къэгъэлъэгъоным хэлэжьэщтых Херсон хэ­кум щыщ IэпэIасэхэр.

Концертыр къэлэ паркым ыкIи «Ракушкэм» адэжь щыкIощт, сыхьатыр 14.30-м къыщыублагъэу сыхьатыр 5-м нэс Iоф­тхьабзэхэр щылъагъэкIо­тэщтых, нэужым къэшъощтых. Сыхьатыр 6-м гуп­чэу Лениным ыцIэкIэ щы­тым мэфэкI Iофтхьа­бзэхэр щыкIощтых. Къа­лэм испортсмен анахь дэгъухэр зыхэлэжэщтхэ Iофтхьабзэу «Мыекъуап, тэ утигупс!» зыфиIорэр, ащ нэужым программэу «Мыекъуапэ — Кавказым иналмэс-налкъут!» зыфиIорэр кIощтых, сыхьатыр 21.30-м мэфэкI мэшIоустхъом еплъынхэ алъэкIыщт.