Псы къабзэр цIыфхэм аIэкIэхьанэу
«ПсэупIэр ыкIи къэлэ щыIакIэр» зыфиIорэ лъэпкъ проектым ипхырыщын пае аштэгъэ федеральнэ проектэу «Псы къабзэм» къыдыхэлъытагъэу Адыгеим ипсэупIэхэм ащыщхэм псыкъычIэщыпIэхэр икIэрыкIэу ащашIыжьых.
Хабзэ зэрэхъугъэу, ахэм нэбгырэ миллионым ехъу ахэлажьэ.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, 2023-рэ илъэсым ащ фэдэ псэолъэ 13 республикэм щагъэкIэжьынэу агъэнэфагъ. Ахэм зэкIэмкIи сомэ миллион 308-рэ атефэщт. Мы уахътэм IофшIэнхэм япроцент 65-70-р хагъэкIыгъ. Илъэсым ыкIэм нэс аухынхэу ары гухэлъэу яIэр.
Ащ нэмыкIэу, мылъкоу къызэтырагъэнэшъугъэм ишIуагъэкIэ, лъэпкъ ыкIи федеральнэ проектхэм къадыхэлъытагъэу, Шэуджэн районым ит къутырэу Чернышевым дэсхэм псы къабзэр аIэкIэзыгъэхьэрэ системэри мыгъэ агъэцэкIэжьыщт. Псыр къызэрэчIащырэри, ащ ирыкIуапIэхэри жъы зэрэхъугъэхэм ыпкъ къикIэу, мы псэупIэм цIы- фэу дэсхэр псы къабзэмкIэ гумэкIыгъо зыхэтхэр бэшIагъэ, гъэмафэм Iофхэр джыри нахь дэи мэхъух.
Джы псыр къызчIащыщт скважинэр икIэрыкIэу аубырыужьыщт, ар зыгъэкъэбзэщт оборудованиер агъэуцущт, псым ирыкIуапIэхэр зэблахъущтых, псыкъищыпIэм чIыпIэу къызэлъиубытырэр зэрагъэфэщт, къашIыхьащт.
ПсэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ Министерствэм къызэрэщыхагъэщыгъэмкIэ, ащ сомэ миллион 19,5-рэ пэIуагъэхьащт. IофшIэнхэр илъэсыр имыкIызэ аухынхэу гухэлъ яI.