«НыдэлъфыбзэмкIэ ыкIи литературэмкIэ кIэлэегъэджэ анахь дэгъу» зыфиIорэ Урысые зэнэкъокъум изаочнэ уцугъо ыкIэм фэкIуагъ.

Шъолъыр едзыгъом те­кIоныгъэр къыщыдэзыхыгъэ нэбгыри 105-рэ ащ хэлэжагъ, ахэм ахэ­хьагъ Адыгэ республикэ гимназием адыгабзэмрэ адыгэ литературэмрэкIэ икIэлэ­егъаджэу Мыгу Анжелэ.

Iоныгъом и 18-м къыщегъэжьагъэу и 24-м нэс зэнэкъокъум иочнэ уцугъо Къэрэщэе-Щэрджэс Рес­публикэм щыкIощт. «Методическая мастерская», «Урок», «Классный час», «Мастер-класс» зыфиIорэ лъэныкъохэмкIэ ыкIи кIэлэцIыкIухэм Iоф зэрада­шIэрэмкIэ ныдэлъфыбзэр языгъэшIэрэ нэбгырэ 30-мэ заушэтыщт.

Мыгу Анжелэ кIэлэегъэ­джэ сэнэхьатым ищыIэ­ныгъэ гъогу зырипхыгъэр илъэс 36-рэ хъугъэ. Ыгу­кIи, ыпсэкIи фэщагъэу адыгабзэр илъэс 26-рэ хъугъэу кIэлэеджэкIо цIыкIухэм арегъашIэ. АщкIэ хэушъхьафыкIыгъэ программэхэр егъэфедэх. ДжэгукIэ шIыкIэм тетэу еджэгъу сыхьатхэр зэхещэх, IурыIупчъэхэр бэрэ егъэфедэх. Джащ фэдэу проектнэ IофшIэнхэр зэ­хещэх, гущыIэхэр сурэтхэмкIэ зэхарегъэгъэуцох, ребусхэр арегъэшIых.

Анжелэ иIофшIэнкIэ гъэхъэгъэшIухэр иIэх. Гъэ­рекIо Темыр-Кавказ федеральнэ шъолъырымкIэ ныдэлъфыбзэр языгъэхьырэ кIэлэегъаджэхэм азыфагу щызэхащэгъэгъэ я XII-рэ зэнэкъокъум иаужырэ уцугъоу Черкесскэ щы­кIуагъэм хэлэжьагъ. «Тызэфэшъхьаф, ау тызэ­фэд» зыфиIорэ лъэныкъом я 2-рэ чIыпIэр къыфагъэшъошагъ. Джыри текIоныгъэр къыдихынэу фэтэIо!