Iоныгъор зыфэдэщтыр
2023-рэ илъэсым игъэмафэ жъоркъэу икIыгъ. ГурытымкIэ температурэр илъэсыбэм щыIэгъэ фабэм градуси 3 — 5-кIэ блэкIыгъ.
Ау щынагъо къэзытырэ шапхъэу градус 39-м шIокIыгъэп. Мыекъопэ ыкIи Дондуковскэ метеостанциехэм зэрагъэунэфыгъэмкIэ, шышъхьэIум и 6-р анахь мэфэ жъоркъэу щытыгъ, фабэр градус 37,6-м нэсыщтыгъ.
ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм ипащэу Александр Митровым тызэрэщигъэгъозагъэмкIэ, мэфэ фабэхэм апкъ къикIэу шышъхьэIу мазэм Адыгеим машIор къыщыхъуным ищынагъо я 5-рэ классым нэсэу дэкIоегъагъ. Ощхэу къещхыгъэр шапхъэхэм ашIокIыгъэп. ШышъхьэIум и 17-м къыщегъэжьагъэу огъугъ. Ащ лъапсэ фэхъугъэр Арктикэм къикIырэ жьы фэбэ гъушъэр ары.
Iоныгъор къихьагъ — ар илъэсым имэзэ анахь дэгъукIэ алъытэ. Фабэр нахь зэкIакIоу ригъэжьагъ. Мафэхэр гъэмафэм фэ-дэу фэбэщтых, пчыхьэм ыкIи пчэдыжьыпэм бжыхьэм фэдэу чъыIэтэгъэщт. АдыгеимкIэ бжыхьэм иапэрэ мазэ гъэмафэр джыри лъыкIуатэу къыпщэхъу. Ащ къыхэкIэу а мазэм «бабье лето» раIо.
2023-рэ илъэсым Iоныгъо мазэр фабэу ыкIи гъушъэу икIыщт. ГурытымкIэ температурэри ощхэу къещхыщтыри шапхъэхэм ашIокIыщтэп. Апэрэ, ятIонэрэ ыкIи ящэнэрэ мэфипшIым макIэу ощх къещхын ыкIи пщагъоу щытын ылъэкIыщт.
Апэрэ мэфипшIыр: чэщым фабэр градус 13 — 18-м нэсыщт, мафэм градус 30 — 35-рэ щыIэщт.
ЯтIонэрэ мэфипшIыр: чэщым фабэр градуси 10 — 15-м нэсыщт, градуси 7 — 9-м нэсэу къеIыхэу къыхэкIыщт. Мафэм градус 21 — 26-рэ щыIэщт.
Ящэнэрэ мэфипшIыр нахь чъыIэтагъэу щытыщт, чэщым фабэу градуси 8 — 13 щыIэщт, мафэм градус 19 — 24-м акIэхьащт, градус 29-м зыщынэсыщт мафэхэри къыхэкIыщтых. Iоныгъом ыкIэм къушъхьэхэм къащигъэщтын ылъэкIыщт.
Мэфэ фабэхэм апкъ къикIэу Iоныгъом ипэублэ машIор къэхъуным ищынагъо я 4 — 5-рэ классым нэсэу щыIэщт. Псыхъохэм адэт псыр шапхъэу щыIэхэм ашIокIыщтэп. Ау мазэм къыкIоцI ощхыр лъэшэу къызещхырэм, псыр къыдэкIоен ылъэкIыщт.
КIАРЭ Фатим.