ЦIыфым ипсауныгъэ лъэшэу зиягъэ езгъэкIырэ уц шIоеу амброзием игъэкIодын, гъэстыныпхъэ шхъуантIэр зимыIэхэм ящэлIэгъэным афэгъэхьыгъагъ АР-м и Къэралыгъо Совет – Хасэм и Тхьаматэу Владимир Нарожнэм Красногвардейскэ районым мы тхьамафэм щызэхищэгъэгъэ зэхэсыгъор.

Ащ Парламентым идепутатхэу Мамхыгъэ Азэмат, Евгений Дьячковыр, Ирина Лященкэр, ПчыхьэкIэ Азэмат, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, Iахьзэхэлъ обществэу «Газпром меж­регионгаз Майкоп» зыфиIорэм ипащэу ЕкъутэкI Аслъан, федеральнэ къулыкъу ыкIи ведомствэ зэфэшъхьафхэм ялIыкIохэр, районым ипсэупIэ кой администрациехэм, мэкъумэщ хъызмэтшIапIэхэм япащэхэр, народнэ депутатхэм я Совет хэтхэр, нэмыкIхэр хэлэжьа­-гъэх.

Амброзием игъэкIодын нахь чанэу дэлэжьэнхэу къызщиIорэ джэпсалъэу республикэ къэралыгъо ыкIи чIыпIэ зыгъэIорышIэжьыпIэ хэбзэ къулыкъухэм, зэкIэ цIыфэу исхэм афэгъэзагъэр АР-м и Къэралыгъо Совет — Хасэм 2019-рэ илъэсым щаштагъ. Ащ къыщыублагъэу Парламентым ипащэхэмрэ уц шIоим земыгъэушъомбгъугъэным фэгъэзэгъэ Межведомственнэ комиссием хэтхэмрэ илъэс къэс муниципальнэ образованиехэр къакIухьэх, унашъор гъэцэкIагъэ зэрэхъурэр зэрагъэлъэгъу.

Мыгъэ Красногвардейскэ районым Iофхэр нахь щыдэйхэу, амброзием пэшIуекIорэ Iофтхьабзэхэр Iэпэдэлэл щашIыгъэхэу агъэунэфыгъ. Ары Парламентым и Тхьаматэ зэхэсыгъор ащ щызэхищэным ушъхьагъу шъхьаIэ фэ­хъугъэр.

Владимир Нарожнэм иеплъыкIэхэр къыриIотыкIызэ, цIыфым ипсауныгъэ зиягъэ лъэшэу езгъэкIырэ уц шIоим икъу фэдизэу зэремыбэныхэрэр нафэ къызэрафэхъугъэр къыхигъэщыгъ.

— Зыпари мышIэгъахэу пIонэу щытэп, ау игъом ыкIи икъоу мы лъэныкъомкIэ зипшъэрылъхэр зымыгъэцакIэхэрэр на­хьыб, — къыIуагъ ащ. — Амброзиер къэгъагъэ мыхъузэ иуупкIымэ ары узте­кIошъущтыр. ГухэкIми, ар Iэпэдэлэл хъугъэ.

ЦIыфхэм япсауныгъэ зэрарэу къыфихьырэм, ыгъэсымаджэхэрэм япчъагъэ зэрэхахъорэм, уц шIоир гъэкIодыгъэным пае анахьыбэу анаIэ зытырагъэтын фаехэм, ар игъом изымыупкIыхэрэм пшъэдэкIыжьэу ахьырэм, нэмыкIыбэхэм зэхэсыгъом щатегущыIагъэх.

Мэкъумэщ чIыгухэм нахьыбэу амброзиер къащыкIэу зэрагъэунэфыгъэр къа­Iуагъ. Амыгъэфедэхэрэр зэрэзэлъикIугъэхэм имызакъоу, лэжьыгъэ къызщагъэкIыгъэу, зытырахыжьыгъэхэми, зэрамыжъожьыгъэхэм ыпкъ къикIэу, жъу­гъэу къащэкIы, Iуамыхыжьыгъэхэми бэу ахэт.

Уц шIоир лэжьыгъэхэм къахэмыкIэным, гъэкIодыгъэпэным апае шIэгъэн фаехэм игъэкIотыгъэу нэужым атегущыIагъэх. «Россельхозцентрэм» и Къутамэу АР-м щыIэм ипащэ къызэриIуагъэмкIэ, ар къыхэмыкIэным пае зэшIохыгъэн фэе шапхъэу щыIэхэр игъом ыкIи икъоу агъэцакIэхэмэ амброзиер нахь макIэу къэкIыщт е кIодыпэщт. Ащ фытегъэпсыхьэгъэ Iофэу зэшIуахыхэрэм апэIухьэрэ мылъкур къыздэкIыщтыми, псэупIэ койхэм амброзием ебэныгъэным паIуагъэхьащт ахъщэр ябюджетхэм къы­зэращыдэлъытэгъэн фаеми ягугъу ашIыгъ.

Владимир Нарожнэм пстэури къызэфихьысыжьзэ къызэриIуагъэмкIэ, амброзием пэшIуекIогъэным фытегъэ­псыхьэгъэ Iофтхьабзэхэр тапэкIи лъагъэкIотэщтых, зэхэсыгъом предложениеу къыщахьыгъэхэми Iоф адашIэщт.

Нэужым «догазивикацием» фэгъэхьыгъэ программэм зэдытегущыIагъэх. Iахьзэхэлъ обществэу «Газпром межрегионгаз Майкоп» зыфиIорэм ипащэу ЕкъутэкI Аслъан къызэриIуагъэмкIэ, гъэстыныпхъэ шхъуантIэр ищагу езыщалIэмэ зышIоигъоу мы районымкIэ лъэIу тхылъ къэзытыгъэр нэбгырэ 525-рэ мэхъу. Ахэм ащыщэу 500-мэ фэIо-фашIэхэр афагъэцэкIэнхэу зэзэгъыныгъэхэм адыкIэтхагъэх, 25-м рагъэгъэзэжьыгъ. Мы уахътэм газыр зэращэлIагъэр щагу 419-рэ мэхъу. Iоныгъо мазэм ыкIэм нэс зэкIэ зэзэгъыныгъэм кIэтхагъэхэм аIэкIагъэхьаным ыуж итых. Iоф­шIэнхэр игъом зэшIуахынхэм пае бригадэхэр нахьыбэ ашIыгъэх, подрядчикхэр къырагъэблэгъагъэхэу къыхагъэ­лажьэх.

Арэу щытми, Iофыгъохэр ащ щыухыгъэ хъурэп. Сыда пIомэ зищагу ращэлIагъэхэм ащыщэу зиунэ изыщэжьышъу­гъэр унэгъо 99-р ары ныIэп. Мылъку икъоу зэраIэкIэмылъыр ары ушъхьагъу шъхьаIэ ащ фэхъурэр.

ЦIыфхэм мыщ дэжьым IэпыIэгъу зэрафэхъунхэ алъэкIыщт шIыкIэу щыIэхэм нэужым атегущыIагъэх. Программэм фэгъэкIотэнэу къыдыхэлъытагъэхэм икъоу зэращымыгъуазэхэр къэгущыIагъэхэм къыхагъэщыгъ. Тхылъхэм ягъэ­хьазырыни нахь къызэрыкIо ашIыгъ. ЕкъутэкI Аслъан къызэриIуагъэмкIэ, «Газпром газораспределение Майкоп» зыфиIорэ компанием иинтернет нэкIубгъо е къэралыгъо фэIо-фашIэхэм япортал ахэр ащатынхэ алъэкIынэу ашIыгъ, МФЦ-м екIуалIэхэми афагъэпсыщт. Джащ фэдэу унэм гъэстыныпхъэ шхъуантIэр ищэгъэным пай ахъщэу атыщтым къыщагъэкIагъ. Программэм къыдыхэлъыта­гъэу, сабыибэ зэрыс унагъохэм, зигъот макIэхэм, социальнэу мыухъумагъэхэм гъэстыныпхъэ шхъуантIэр яунэхэм зэраращэрэм тырагъэкIодагъэм щыщэу сомэ мини 100-м нэсэу къаратыжьы. А зэпстэумэ цIыфхэр ащыгъэгъозэгъэнхэ фай. ЕкъутэкI Аслъан къэбарлъыгъэIэс IофшIэныр нахь агъэлъэшыщтэу ары къызэриIуагъэр.

Владимир Нарожнэм псэупIэ кой администрациехэм япащэхэми а IофшIэныр нахь агъэлъэшынэу къариIуагъ.

— «Социальнэ газификацием» фэгъэ­хьыгъэ проектэу УФ-м и Президент кIэщакIо зыфэхъугъэм ипхырыщын, ащ къыдыхэлъытагъэхэр игъом ыкIи икъоу гъэцэкIэгъэнхэм пае хэбзэ къулыкъу­хэмрэ газымкIэ шъолъыр компаниемрэ Iоф зэдашIэн фае, — къыкIигъэтхъыгъ ащ.

ХЪУТ Нэфсэт. Сурэтхэр: АР-м и Къэралыгъо Совет — Хасэр.