Iоныгъом и 1-р — шIэныгъэм и Маф
ТилъэпIэ кIэлэеджакIохэр ыкIи студентхэр!
Лъытэныгъэ зыфэтшIырэ кIэлэегъаджэхэмрэ ны-тыхэмрэ!
ШIэныгъэм и Мафэ фэшI тышъуфэгушIо!
Iоныгъом и 1-р кIэлэеджакIохэмкIэ, студентхэмкIэ, кIэлэегъаджэхэмкIэ илъэсыкIэ еджэгъум иублапI, хъугъэ-шIэгъэ гъэшIэгъонхэмкIэ ушъагъэу щытыщт лъэхъаным ичэзыукI. ЕджапIэм чIэхьащт кIэлэцIыкIу мини 6,5-м ехъухэрэмкIэ ар апэрэ одыджыным икъытеон епхыгъэ мэфэкI. Лъэныкъуабэ къызэлъызыубытырэ илъэс еджэгъухэм амал къатыщт шIэныгъэ зэрагъэгъотынымкIэ ыкIи щыIэныгъэ гъогу шъуамбгъом техьанхэм зыфагъэхьазырынымкIэ.
КIэлэеджакIохэмрэ студентхэмрэ дэгъоу еджэнхэмкIэ, амалэу ахэм яIэхэр нахь икъоу къыхэгъэщыгъэнхэмкIэ Адыгеим бэ щызэшIуахырэр: джырэ уахътэм диштэрэ еджэпIакIэхэр агъэпсых, жъыхэр агъэцэкIэжьых, мылъкукIэ ыкIи техникэкIэ нахь зэтырагъэпсыхьэх, шIогъэ ин къэзытыщт программакIэхэр афызэхагъэуцох, технологие пэрытхэр ащагъэфедэх, лъэныкъо пстэумкIи зэдиштэу цIыфым хэхъоныгъэ ышIынымкIэ Iофышхо зэшIуахы, псауныгъэ пытэ яIэу, цIыфыгъэ шэпхъэ дахэхэм арыгъуазэхэу, нахьыжъхэм щысэ атырахызэ Адыгеим ыкIи зэрэ Урысыеу гъэхъэгъакIэхэр ашIынхэм яIахь ахэм зэрэхашIыхьащтым тицыхьэ телъ.
ШIэныгъэм и Мафэ кIэлэегъаджэхэми ямэфэкI. Хэгъэгум фэшъыпкъэщт цIыфхэр пIугъэнхэмкIэ, шIэныгъэ куу зиIэ IофышIэхэр республикэм пае гъэхьазырыгъэнхэмкIэ IэпэIэсэныгъэ ин зыхэлъ кIэлэегъаджэхэм Iофышхоу зэшIуахырэм уасэ фэшIыгъуай.
ИлъэсыкIэ еджэгъум иублэгъум зэкIэ кIэлэеджакIохэм, студентхэм, кIэлэегъаджэхэм, ны-тыхэм тафэлъаIо псауныгъэ пытэ, щыIэкIэшIу яIэнэу, гъэхъэгъакIэхэм къафэкIонхэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр