Iоныгъом и 1-м, зэрэхэгъэгу фэдэу, Адыгеим илъэсыкIэ еджэгъур щырагъэжьагъ.

[caption id="attachment_138354" align="aligncenter" width="800"] Хьагъундэкъо Азалие Адыгэ республикэ гимназием иа 1-рэ класс чIэхьагъ.[/caption]

КIэлэеджэкIо мин 61-рэ фэдиз республикэм иеджапIэхэм къякIолIэжьыгъ. Ахэм ащыщэу мини 6,5-рэ фэдизыр апэрэ классым кIуагъэх, апэрэу оды­джыныр къафытеуагъ.

АР-м гъэсэныгъэмрэ шIэныгъэмрэкIэ и Министерствэ къы­зэритыгъэмкIэ, республикэм иеджапIэхэр зэкIэ илъэсыкIэ еджэгъум фэхьазырых, игъэ­кIотыгъэ гъэцэкIэжьын IофшIэнхэр зыщыкIощтыгъэхэм игъом аухыгъэх, япчъэхэр къызэIуа­хыжьыгъэх.

КIэлэеджакIохэм ямызакъоу, кIэлэегъаджэхэми непэ ямэфэкI шъыпкъ, апэрэ классхэр зы­штэхэрэм зэрифэшъуашэу ащ зыфагъэхьазырыгъ, еджапIэм апэрэу къэкIогъэ сабыим мы мафэр ыгу дахэкIэ къинэжьыным яшъыпкъэу пылъыгъэх.

Гъыщ Заремэ Адыгэ респуб­ликэ гимназием илъэс 31-рэ хъугъэ Iоф зыщишIэрэр, я 6-у апэрэ классхэр мыгъэ ыштагъэх. Сабыйхэр шIу ылъэгъухэу, шIэныгъэм апэрэ лъэбэкъухэр щарегъэдзых.

— КIэлэцIыкIухэм мы мафэр мэфэкI шъыпкъэ афэхъун фае. Сабый 33-рэ мыгъэ сикласс ис, ахэм пэшIорыгъэшъэу нэIуасэ сафэхъугъ, Iуш цIыкIух, губзыгъэх, еджэным фэхьазырых. Хабзэ зэрэхъугъэу, еджапIэм щызэхащэрэ линейкэм ыуж классым тыкъычIэхьажьыгъ, ­шъхьадж ипартэ кIэрытIысхьагъ. «Мамырныгъэм иуроккIэ» тиеджэн едгъэжьагъ, ащ пэшIорыгъэшъэу зыфэзгъэхьазырыгъ, сыда пIомэ мэхьанэ ин зиIэ лъэныкъоу мыр щыт. ЯцIыкIугъом къыщегъэжьа­гъэу я Хэгъэгу шIу алъэгъоу, на­хьыжъхэм шъхьэкIафэ афашIэу, ятарихъ дэгъоу ашIэу пIугъэнхэ фае. Мамырныгъэм мэхьанэу иIэр агурызгъэIуагъ, ащкIэ Iэмэ-псымэ зэфэшъхьафхэр къызфэзгъэфедагъэх. ДжэгукIэ шIыкIэм тетэу апэрэ урокыр кIуагъэ, — еIо Заремэ.

КIэлэегъаджэм къызэриIуагъэмкIэ, еджапIэм къычIахьэхэрэм, зэкI пIоми хъунэу, еджакIэ, тхакIэ, лъытакIэ ашIэ, ау арэп анахь шъхьаIэр. Психологыр кIэлэцIыкIухэм аIокIэ, еджапIэм фэхьазырхэмэ егъэунэфы.

— Апэрэ мафэм къыщегъэжьагъэу шIэныгъэр апэ итын фае, ау пIуныгъэмрэ гъэсэныгъэмрэ шIокI имыIэу ащ игъусэнхэ фае. Апэрэ кIэлэегъаджэр ятIонэрэ ным рагъапшэ. Егъэджэн Iофым ылъапсэу слъытэрэр сабыим шIогъэшIэгъон лъэныкъор къыдэплъытэзэ Iоф дэ­пшIэныр ары. Нэбгырэ пэпчъ иду­нэееплъыкIэ елъытыгъэу сыдэзекIо, цыхьэ къысфашIыным фэсэ­щэх. Зы унэгъо Iужъу фэдэу тызэ­хэт, еджапIэр къаухыгъэми, ныб­джэгъуныгъэу азыфагу илъы хъугъэр кIодырэп, ­зэрэгъэгъуащэ­­хэ­рэп. ЩыIэныгъэм ащ мэхьа­нэшхо щыриI, — къыIуагъ кIэлэегъаджэм.

Апэрэ классым чIэхьэрэ кIэлэцIыкIухэм еджэгъошIу афэхъунэу, гъэхъагъэхэр ашIыхэзэ еджэгъу илъэсхэр кIонхэу, ошъогу къабзэр ашъхьащытынэу афэтэIо.

ДЕЛЭКЪО Анет.