Адыгэ Республикэм инахьыжъхэм я Совет хэтхэр мэфэкIым — шIэныгъэм и Мафэ фэшI Адыгеим щыпсэухэрэм къафэгушIох. ИлъэсыкIэ еджэгъур зыщырагъэжьэжьырэм, унэгъуабэмэ якIэлэцIыкIухэр апэрэ классым зыщагъэкIощтхэм а мафэр атефэ. КъыткIэхъухьэхэрэм япIункIэ пшъэрылъышхоу яIэм еджапIэхэм падзэжьыщт, ны-тыхэм ащыщыбэм якIэ­лэцIыкIухэр апэрэу шIэныгъэм икъэкIуапIэ ипчъэшъхьаIу Iуащэщтых. ЕджапIэмрэ унагъомрэ щыIэныгъэм пытэу щызэготых. Зы гухэлъ тIуми яIэр — ашъхьэ иIоф ежь-ежьырэу зэрахьаным ахэр фэ­гъэхьазырыгъэнхэр, хэгъэгум епэсыгъэ цIыфхэу хъунхэр ары. КIэлэцIыкIухэм ар къадэхъущт-къа­дэмыхъущтыр зэлъытыгъэр еджапIэмрэ унагъомрэ азыфагу илъыщт зэфыщытыкIэхэр ары.

УзэгурыIоным, узэрэлъытэжьыным мэхьанэшхо яI.

Тэ, нахьыжъхэм, дэгъоу тыгу къэкIыжьы ны-тыхэми, кIэлэцIыкIухэми лъытэныгъэшхо кIэлэегъаджэхэм зэрафыряIагъэр. КIэлэегъаджэм шIэныгъэ закъоп кIэлэцIыкIухэм аритырэр, ащ ыпсэ щыщ ахелъхьэ, щыIэныгъэм чIыпIэ тэрэз щаубытыным феузэнкIых, я Хэгъэгу шIу алъэгъунэу, фэшъыпкъэнхэу егъасэх, яшэн епсыхьэ. Непэ хабзэмрэ обществэмрэ бэ ашIэрэр еджапIэмрэ кIэлэегъаджэмрэ яфэшъошэ уасэ ятыгъэ­ным фэшI. ЕджапIэхэр агъэцэкIэжьых, кIэхэр ашIых, уахътэм диштэрэ Iэмэ-псымакIэхэмкIэ, технологиякIэхэмкIэ ахэр зэтырагъэпсыхьэх. КIэлэегъаджэхэми, кIэлэцIыкIухэми амал дэгъухэр арагъэгъотых.

Республикэм иеджапIэ пэпчъ тарихъ гъэшIэгъон пылъ, ахэм къачIэкIыгъэхэм ащыщыбэ цIыф цIэрыIо хъугъэх, ящытхъу чыжьэу Iугъэ. Арышъ, еджапIэ пэпчъ джырэ уахътэм диштэрэ музейхэр яIэнхэ фае. ОхътакIэм пшъэрылъыкIэхэри къегъэуцу. БлэкIыгъэр зыщыдгъэгъупшэ хъущтэп, тигупсэ еджапIэхэм, ты­къызщыхъугъэ псэупIэхэм апылъ щытхъумрэ яхэбзэ шIагъохэмрэ зэрахэдгъэхъощтым зэкIэми ыуж титын фае.

Непэ ны-тыхэм зафэтэгъазэ: кIэлэцIыкIухэр тэрэзэу зекIонхэ, дэIонхэ фаеу шъуIо зыхъукIэ, ренэу шъори шъуизекIуакIэкIэ шъузылъыплъэжьын, щысэу шъущытын фае. Арба зыкIаIорэр: «КIалэ ппIунри мастэкIэ псынэ птIынри зэфэдэ».

Сабыир — унагъом игъундж: цIыфыгъэ шэпхъэ дахэхэм арыгъозэрэ ны-тыхэм яфэмэ-бжьымэ якIэлэцIыкIухэм язекIокIэ-шIыкIэхэми къахэщыщт. Конституцием изакъоп кIэлэцIыкIухэр тэрэзэу пIугъэнхэр типшъэрылъэу къэзыIорэр, къэралыгъомкIи ар лъэпсэ пытэу щыт, тижъышъхьэ насыпыгъэ-тынчыгъи бэкIэ ащ елъытыгъэщт.

ТилъэпIэ кIэлэцIыкIухэр, еджакIохэр ыкIи студентхэр! Шъуисэнаущыгъэ хэжъугъэхъонымкIэ, щыIэныгъэм чIыпIэ тэрэз щышъуубытынымкIэ непэ амалыбэ шъуиI. Урысыер — амалышхохэм яхэгъэгу! Шъуи­кIэлэегъаджэхэм, гъэсакIохэм шъуядэIу, шIэныгъакIэхэр шъуIэ къижъугъахьэх!

Мыщ фэдэ сэнэхьат къин къыхэзыхыгъэхэм лъы­тэныгъэшхо афытиIэу непэ еджапIэхэм аIутхэм, апшъэрэ гъэсэныгъэ языгъэгъотыхэрэм, кIэлэпIухэм, ветеранхэм тафэлъаIо псауныгъэ пытэ, щыIэкIэшIу, щэIагъэ яIэнэу, Урысыем инеущырэ мафэ зыфэдэщтыр зэлъытыгъэ ныбжьыкIэхэу къыткIэхъухьэхэрэм япIункIэ гъэхъагъэхэр ашIынхэу!

Адыгэ Республикэм инахьыжъхэм я Совет итхьаматэу ГъукIэлI Нурбый.