Адыгэ Республикэм иминистрэхэм я Ка­бинет изэхэсыгъо зыщытегущыIэгъэхэ Iофыгъо шъхьаIэхэм ащыщ гъэсэныгъэ зыщарагъэ­гъотырэ организациехэр илъэсыкIэ еджэгъум зэрэфэхьазырхэр.

Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу Iофтхьабзэр зэрищагъ АР-м иминистрэхэм я Кабинет и Тхьаматэу КIэрэщэ Анзаур.

АР-м гъэсэныгъэмрэ шIэныгъэмрэкIэ иминистрэ ипшъэ­рылъхэр зыгъэцэкIэрэ Евгений Лебедевым къызэриIуагъэмкIэ, мы министерствэм къыфэIорышIэрэ организацие 294-мэ язытет ауплъэкIугъ комиссие гъэнэфагъэхэм ыкIи ахэр илъэ­сыкIэ еджэгъум фэхьазырхэу алъытагъ.

Сомэ миллион 976-м ехъу илъэсыкIэ еджэгъум ехъулIэу организациехэм къафатIупщыгъ, ащ щыщэу федеральнэ бюджетым къикIыгъэр сомэ миллион 743-м ехъу, республикэ бюджетым — сомэ миллиони 107-рэ, муниципальнэхэм — сомэ мил­лиони 126-м ехъу. Мылъкур зы­пэIухьанэу щытыгъэр гъэцэ­кIэжьын IофшIэнхэр, мебелыр ыкIи Iэмэ-псымэхэр къэщэфыгъэнхэр ары.

Илъэситф федеральнэ программэу еджапIэхэм ягъэцэкIэ­жьын фытегъэпсыхьагъэм ди­штэу еджэпIи 7 агъэцэкIэжьыгъ. Джащ фэдэу классхэм ачIэт ме­белыр, доскэхэр, шхапIэхэм ачIэтхэр зэблахъугъэх. Ащ нэмыкIэу терроризмэм пэшIуе­кIорэ Iофтхьабзэхэм ягъэцэкIэн­кIэ гъэсэныгъэ зыщарагъэгъотырэ учреждениехэм IофшIэн гъэнэфагъэхэр ащагъэцэкIагъэх. ЕджапIэхэр зэкIэ къэшIыхьа­гъэх, къагъэнэфых, гумэкIыгъо горэ къэхъумэ макъэ зэрагъэIущт пкъыгъохэр, видеошIыкIэм тетэу алъыплъэнхэмкIэ пкъыгъо зэ­фэшъхьафхэр яIэх, джащ фэдэу еджапIэхэм якъэгъэгъунэн тегъэпсыхьэгъэ Iофтхьабзэхэр зэ­шIуахынхэм иамал яI.

Урысые Федерацием и Президент Федеральнэ ЗэIукIэм фигъэхьыгъэ Джэпсалъэм къыдилъытэхэрэм зыкIэ ащыщ 2023 — 2024-рэ илъэс еджэгъум республикэм икIэлэцIыкIухэу ублэпIэ классхэм арысхэм ыпкIэ хэмылъэу шхын фабэхэр ятыгъэнхэр. МыщкIэ бюджет зэфэшъхьафхэм якъэкIуапIэхэр агъэфедэщтых. Ащ нэмыкIэу республикэ бюджетым ахъщэ тедзэу къикIыщтыр я 5 — 11-рэ классхэм ащеджэхэу фэгъэкIотэныгъэ зиIэхэм ягъэшхэн зэхэщэгъэныр ары зыпэIухьащтыр.

Зэхэсыгъом къыдыхэлъы­тагъэу кIэлэеджакIохэр щынэ­гъон­чъэу зещэгъэнхэм, къуаджэ­хэм физкультурэмрэ спортымрэ ща­пылъынхэм, зэреджэщтхэ тхылъхэр аIэкIэгъэхьэгъэнхэм, гъэсэныгъэ тедзэ ятыгъэным пае чIыпIэу щыIэр нахьыбэ шIы­гъэным япхыгъэ Iофыгъохэм анэсыгъэх.

ХэушъхьафыкIыгъэу къыха­гъэщыгъэхэм ащыщ Адыгеим и ЛIышъхьэ кIэщакIо зыфэхъугъэ Iофтхьабзэу «Апэрэ классым кIощтым пае шIухьафтын» зыфиIорэр. ЗэкIэ кIэлэцIыкIухэу мы илъэсым апэрэу еджапIэм кIощтхэм канцеляр пкъыгъохэр зэрылъ Iалъмэкъымрэ нэфынэ къэзытырэ кIэлэцIыкIу ныбалъэ­хэмрэ аIэкIэхьащтых. Республи­кэм имылъкукIэ ащ фэдэ пкъы­гъо 6700-рэ агъэхьазырыгъ.

Адыгэ Республикэм иминист­рэхэм я Кабинет и Тхьаматэу КIэрэщэ Анзаур зэхэсыгъом икIэуххэм адэжь еджапIэхэм мебелымрэ Iэмэ-псымэхэмрэ зэраIэкIагъахьэхэрэмрэ кадрэ­хэр зэрафимыкъухэрэмрэ япхыгъэ Iофтхьабзэхэм язэшIохын икъоу лъыплъэнхэм тегъэпсы­хьагъэу пшъэрылъ заулэ афи­шIыгъ.

«КIэлэегъаджэхэр зэримы­къу­хэрэр тэлъэгъу, анахьэу етIани къоджэ еджапIэхэм а Iофыгъор анахь гумэкIыгъоу къащыуцугъ. ЕджапIэр къэзыухыхэрэм сэнэхьатым епхыгъэ IофшIэн адызешъухь, кIэлэегъэ­джэ сэнэхьатым тызэрэщыкIэ­рэр агурыжъугъаIу. Муниципалитетхэм япащэхэр, кадрэхэм яIофыгъо изэшIохын шъукъы­хэ­лажь, къуаджэм Iоф щызышIэ зышIоигъо кIэлэегъаджэхэм шъуишIуагъэ яжъугъэкI», — ­къыIуагъ КIэрэщэ Анзаур.

АР-м и ЛIышъхьэ ипресс-къулыкъу