Физикэ-хьисап гъэсэныгъэмкIэ хэгъэгум экосистемэ щыгъэпсыгъэным фэгъэхьыгъэ гупшысэхэр АКъУ-м иректо­рэу Мамый Даутэ къыриIотыкIыгъэх.

ФизикэмкIэ кIэлэегъа­джэхэм яятIонэрэ Урысые зэфэсэу шышъхьэIум и 28 — 29-м «Сириусым» щыкIуагъэм Мамыим доклад къыщишIыгъ, ар а Iофыгъом фэгъэхьыгъагъ. Докладым очнэу ыкIи пэIудзыгъэ шIыкIэм тетэу кIэлэегъэджэ 1400-рэ едэIугъ.

Зэфэсым хэлэжьагъэх гъэсэныгъэ гупчэу «Сириусым» ипащэу, мыщ ифедеральнэ шъолъырхэм я Совет итхьаматэу Елена Шмелевар, УФ-м и Президент иIэпыIэгъоу Андрей Фурсенкэр, УФ-м гъэсэны­гъэмкIэ иминистрэ игуа­дзэу Татьяна Васильевар, «Сириусым» иадминист­рацие ипащэу Дмитрий Плишкиныр, гурыт еджапIэхэм физикэр ащязыгъэ­хьырэ кIэлэегъаджэхэр, апшъэрэ еджапIэхэм ыкIи шIэныгъэ-ушэтэкIо институтхэм ялIыкIохэр.

Пленарнэ зэхэсыгъохэм ыкIи тематическэ секцие­хэм физикэм изэгъэшIэн епхыгъэ IофыгъуакIэхэм, методикэу щыIэхэм ыкIи гумэкIыгъоу ащ епхыгъэ­хэм ядэгъэзыжьынкIэ шIэ­гъэн фаехэм щатегущыIагъэх.

Инженернэ-техническэ гъэсэныгъэм ылъэныкъо­кIэ ыкIи кадрэхэр гъэхьазырыгъэнхэмкIэ физикэм мэхьанэшхо иIэу щыт, ау ащ пае къэмынэу ар зы­шIогъэшIэгъонхэм япчъагъэ хэпшIыкIэу къыщы­кIагъ, зэтыгъо къэралыгъо ушэтынхэмкIэ а предметыр къыхэзыхырэри гъэ къэс нахь макIэ мэхъу.

— Аужырэ илъэсхэм зэтыгъо къэралыгъо ушэтынхэм профильнэ хьисапыр къахэзыгъафэхэрэм япчъагъэ процент 25-м нэсэу, физикэр процент 30-м лъыкIахьэу къащыкIагъ, — къыхигъэщыгъ

Московскэ къэралыгъо университетэу М. В. Ло­моносовым ыцIэ зы­хьырэм иректорэу, академикэу Виктор Садовничэм.

Ушъхьагъоу ащ фэхъугъэу алъытэрэр апшъэрэ еджапIэхэм ачIэхьащтхэм ушэтынэу атыхэрэм физикэр информатикэмкIэ бэрэ афызаблахъоу зэрэ­хъугъэр ары.

— Физикэм ыкIи ин­женернэ шIэныгъэхэм зя­гъэу­шъомбгъугъэныр псын­­кIэ Iофэу щытэп, илъэсиплI-тфыр ыхьыщт, ау ащ тыщыщынэнэу щы­тэп, мэхьанэ зиIэр пшъэ­рылъыр дгъэцэкIэныр ары, — къыхигъэщыгъ УФ-м и Президент иIэпыIэгъоу Андрей Фурсенкэм.

Адыгэ къэралыгъо университетым иректорэу Мамый Даутэ идоклад къы­зэрэщиIуагъэмкIэ, хьисап курсхэр акIухэ хъумэ, физикэри дыхагъахьэзэ, модельхэр зыгъэпсын, хьисап шIыкIэхэр зыушэтынхэ зылъэкIыхэрэм нахь зыкъызэIуябгъэхымэ ишIуа­гъэ къэкIощт.

— Физикэ-хьисап гъэсэ­ныгъэм иэкосистемэ гъэ­псыгъэу, ахэм технологие зэфэшъхьафхэр, кIэлэцIыкIухэмрэ ныбжьыкIэхэмрэ Iоф зэрадэпшIэщт шIыкIэр къащыдэлъытагъэ хъумэ, етIани ащ университетхэр пылъхэмэ — джащыгъум физикэм зедгъэушъом­бгъун тлъэкIыщт. Информационнэ лъэныкъоми Iоф дэшIэгъэн фае. КIэлэеджа­кIомэ зэхашIэнэу щыт фи­зикэр зэбгъэшIэныр зэрэшIагъор! — къыIуагъ Мамый Даутэ.

Адыгэ къэралыгъо университетым ипресс-къулыкъу