«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу мы илъэ­сым зэшIуахынэу республикэм щагъэнэфэгъагъэр шы­шъхьэIу мазэм ыкIэм аухыгъ.

Хабзэ зэрэхъугъэу, ахэм нэбгырэ миллионым ехъу ахэлажьэ.

ПстэумкIи гъогу Iахь 23-рэ, ар километрэ 53,9-рэ, гъэкIэжьыгъэ хъугъэ.

Шъугу къэдгъэкIыжьын, мы IофшIэнхэр лъэпкъ проектым къыдыхэлъы­тагъэу къэкIощт 2024-рэ илъэсым зэшIуахынэу агъэ­нэфэгъагъэхэр ары.

АгъэцэкIэжьыгъэхэм ащыщэу гъогу Iахьи 5-р Мыекъопэ районыр ары зиер. ЗэкIэмкIи километрэ 12,26-рэ мэхъу. Iахьи 6, ар километрэ 15,93-рэ, щагъэкIэжьыгъ Тэхъутэмыкъое районым. Ахэм анэмыкIэу Теуцожь районым километри 7,74-рэ, Красногвардейскэ районым — 3,8-рэ, Шэуджэн районым — километри 5,8-рэ, Кощхьэблэ районым — 2,83-рэ, Джэ- джэ районым километри 2,2-рэ ыкIи къалэу Мые­къуапэ километри 3,4-рэ ащагъэцэкIэжьыгъ.

Джащ фэдэу Iахь 23-у республикэ ыкIи федеральнэ мэхьанэ зиIэ гъогу шъхьаIэхэу транспортыр чэщи мафи зыщызэблэ­кIыхэрэм, «опорная сеть» зыфаIохэрэр, ахахьэхэ­рэми гъэцэкIэжьын Iоф­шIэнхэр ащызэшIуахыгъэх. ГущыIэм пае, Мыекъуапэ икIэу къалэу ТIуапсэ кIо­рэм щыщэу километри 2,7-рэ, станицэу Ханскэм­рэ Шытхьалэрэ зэзыпхы­хэрэм иIахьэу километри 3,4-рэ агъэкIэжьыгъ.

«Адыгеяавтодорым» къы­зэрэщаIуагъэмкIэ, гъо­гухэр агъэцэкIэжьыгъэх «Дортранссервис», «ДСУ-N-у 3» зыфиIорэ фир­мэхэм, Шэуджэн, Кощ­хьэблэ, Теуцожь, Красно­гвардейскэ ыкIи Тэхъу­тэмыкъое районхэм ягъо­гушI организациехэм. Ахэм пIалъэхэм ашIо­мыкI­хэу, шапхъэхэм адиштэу зыфэгъэзэгъэхэ IофшIэнхэр зэшIуахыгъэх. АгъэкIэжьыгъэ гъогу Iахь­хэм зэкIэми тамыгъэ­хэр ащагъэуцугъэх, зыщищыкIагъэм щагъэтхъыгъ.