ЯтIонэрэу къыфагъэшъошагъ
Хьыкум приставхэм я Федеральнэ къулыкъу АдыгеимкIэ и ГъэIорышIапIэ иотделение ипащэу, панкратионымкIэ АР-м и Федерацие исудейскэ коллегие итхьаматэу ыкIи ипресс-секретарэу Къэлэшъэо Аскар спортым ылъэныкъокIэ гъэхъагъэу иIэхэм къакIэлъыкIоу 2011-рэ илъэсым апэрэу Рэзэныгъэ тхылъ къыфагъэшъошэгъагъ.
УФ-м спортымкIэ иминистрэ иунашъокIэ мы илъэсым ар ятIонэрэу къыхагъэщыгъ.
Къэлэшъэо Аскар щытхъу хэлъэу иIофшIэн егъэцакIэ, физическэ культурэм ыкIи спортым хэхъоныгъэ ашIыным ылъэныкъокIэ гъэхъэгъэшIухэр иIэх. А пстэури къыдалъыти, республикэм илIыкIо тын лъапIэр джыри зэ къыфагъэшъошагъ.
А. Къэлэшъаор тренер цIэрыIу, зэфагъэ зыхэлъ судья ыкIи шъхьэкIэфэныгъэр къэзылэжьыгъэ цIыф. Илъэс зэкIэлъыкIохэм Урысыем, Европэм ыкIи дунаим ячемпионхэр ыгъэсагъэх. Спорт лъэпкъэу «Панкратион» зыфиIорэм Адыгеим зыщиушъомбгъуным пылъ.
Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.