ФутболымкIэ Урысые зэнэкъокъоу «Кожаный мяч» зыфиIорэм ифинал едзыгъо къалэу Волжскэ щыкIуагъ.

Мыщ хэлэжьагъэх кIэлэцIыкIу командэхэр. Турнирым дэгъу дэдэу зыкъыщагъэлъэгъуагъ ыкIи хагъэунэфыкIырэ чIыпIэр къыщыдахыгъ къуаджэу Кощхьаблэ ифутболистхэм.

2010 — 2011-рэ илъэсхэм къэхъугъэ кIэлэ­цIыкIухэр ары зэнэкъокъугъэхэр. ЗэкIэмкIи командэ 16 хъущтыгъэх.

ЫпшъэкIэ къызэрэщытIуагъэу, Адыгэ ­Республикэр къэзыгъэлъэгъуагъэр Кощ­хьаблэ игурыт еджапIэу N 1-м илIыкIохэр ары. Командэр зэнэкъокъум фэзыгъэхьа­зырыгъэхэр Джыгунэ Рэмэзанрэ Юсып Рус­лъанрэ.

Апэрэ ешIэгъоу тикIалэхэм яIагъэм чIыпIэ командэу «Торпедэм» щыIукIагъэх ыкIи 3:0-у текIоныгъэр къыщыдахыгъ. Ащ ыуж Тюменскэ хэкум икомандэу «Ишим» къы­шIуахьыгъ, пчъагъэр 2:0. Тамбовскэ хэкур къэзыгъэлъэгъогъэ «Котовскэм» зэIукIэ­гъоу дыряIагъэр 1:1-у аухыгъ. Тифутболистхэр Москва икомандэу «Братеево» зыфиIорэм зыIокIэхэм текIоныгъэр къыдахыныр къин къащыхъугъ. Апэрэ таймыр 2:0-у ашIуахьыгъ. Ау нэужым тикIалэхэм яешIакIэ хагъэхъуагъ ыкIи 4:2-у ешIэгъур къахьыгъ. Финалныкъом кощхьаблэхэр Владимирскэ хэкум икомандэу «Рубин» IукIагъэх ыкIи текIоныгъэр къыда­хыгъ. Ау турнирым иешIэгъу шъхьаIэу финалыр Адыгеим икомандэ къыхьын ылъэкIы-гъэп, Ульяновскэ хэкур къэзыгъэлъэгъогъэ «Волга-Спорт-Арена» зыфиIорэр нахь лъэшэу къычIэкIыгъ, пчъагъэр 1:0-у зэIукIэгъур аухыгъ. Арэу щытми, Кощхьаблэ икомандэ ухьазырыныгъэ дэгъу къыгъэлъэгъуагъ, мэхьанэшхо зиIэ зэнэкъокъухэм ятIонэрэ чIыпIэр къазэращыдихыгъэр гъэхъэгъэшху.