Гъэсэныгъэм иIофышIэхэм яшышъхьэIу зэIукIэ непэ Мыекъуапэ щызэхащагъ. 2023 — 2024-рэ илъэс еджэгъум гъэсэныгъэм исистемэ хэхъоныгъэхэр ышIынхэмкIэ пшъэрылъэу щыIэхэм ате­гущыIагъэх.

Пстэумэ апэу УФ-м просвещениемкIэ иминистрэу Сергей Кравцовым онлайн шIыкIэм тетэу зэхэсыгъом хэлажьэхэрэм закъыфигъэзагъ. Обществэр зыпкъ итэу ыпэкIэ лъыкIотэнымкIэ, лъэгэпIэ инхэм анэсынымкIэ кIэлэегъаджэм мэхьанэшхо зэриIэр, егъэжьэпIэ пстэуми гъэсэныгъэр япэублэу, алъапсэу зэрэщытыр хигъэунэфыкIыгъ. 2023-рэ илъэсыр егъэджэкIо-гъэсакIом и Илъэсэу зэрагъэнэфагъэм мэхьанэ ин зэриIэр, ащ къыдыхэлъытагъэу Iофтхьэ­бзэ зэфэшъхьафхэр зэрэзэхащэхэрэр министрэм къыIуагъ. Ахэм ащыщэу «Спасибо учитель» зыфиIорэр цIыфхэм зэлъашIагъ, кIэлэегъаджэхэм зэрафэразэхэр бэмэ къы­раIотыкIы. Мы сэнэхьатым имэхьанэ нахь зыкъегъэIэтыгъэным, кIэлэегъэджэ ныбжьыкIэхэр нахьыбэ хъунхэм апае Iофыгъоу зэшIуахыхэрэм Сергей Кравцовыр къатегущыIагъ. Джащ фэдэу илъэсыкIэ еджэгъум къыхэхьащт шIыкIакIэхэм ягугъу къы­шIыгъ.

— ИкIыгъэ илъэс еджэгъумкIэ дгъэнэ­фэгъагъэр зэкIэ зэрифэшъуашэу дгъэцэ­кIагъэ. Джы илъэсыкIэ еджэгъум къыды­хэлъытэгъэ пшъэрылъхэр зэшIотхыщтых. Программэ шъхьаIэм имызакъоу, гъэсэныгъэ тедзэм епхыгъэ гупчэхэу «Точка роста», «Кванториум» зыфиIохэрэм яшIуагъэкIэ кIэлэеджа­кIохэм лъэныкъо зэ­фэшъхьафхэмкIэ шIэныгъэ дэгъухэр зэрагъэгъоты. IэкIыб къэралыгъохэм ащыщхэм тарихъыр кIатхыкIыжьыным дэгуIэх. Ащ къыхэкIыкIэ къыткIэ­хъухьэрэ лIэужхэм ятарихъ дэгъоу ашIэным тынаIэ тедгъэтын фае. Iоныгъом и 1-м ехъу­лIэу еджапIэ пэпчъ тхылъыкIэ­хэр IэкIэдгъэхьащтых. 2025-рэ илъэсым нэс шэпхъакIэхэм адиштэрэ тхылъыкIэхэр зэкIэ предметхэмкIэ къыдэдгъэкIыщтых, — къыIуагъ Сергей Кравцовым.

АР-м и Къэралыгъо Совет — Хасэм и Тхьаматэу Владимир Нарожнэр, АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр, кIэлэегъа­джэхэм яшIэныгъэхэм зыща­хагъэхъорэ Гупчэм, Урысые об­щественнэ-къэралыгъо движениеу «Движение первых», «Росдетцентр», Юнармия зыфиIохэрэм ялIыкIохэр Iофтхьабзэм къырагъэблэгъагъэх. Джащ фэдэу АР-м ихэбзэ гъэцэкIэкIо къулыкъухэм, муниципальнэ образованиехэм яадминистрациехэм ялIыкIохэр, депутатхэр, апшъэрэ еджапIэхэм япащэхэр, нэмыкIхэр хэлэжьагъэх.

АР-м и ЛIышъхьэу КъумпIыл Мурат ыцIэкIэ зэхахьэм хэлажьэхэрэм закъифигъэзагъ АР-м иминистрэхэм я Кабинет и тхьаматэу КIэрэщэ Анзаур.

— Владимир Путиным къызэрэхигъэщыгъэмкIэ, тихэгъэгу хэхъоныгъэхэр ышIынхэмкIэ зиIахьышIу хэзылъхьэрэ, зисэнэхьат шIу зылъэгъурэ цIыф мин пчъагъэхэм ацIэкIэ 2023-рэ илъэсыр егъэджэкIо-гъэсакIом и Илъэсэу агъэнэфагъ. КIэлэ­егъаджэм иIофшIэн анахь мэхьанэшхо зиIэхэм сыдигъокIи ащыщ. КIэлэцIыкIухэм ыкIи ныбжьыкIэхэм япIуныгъэ-гъэсэныгъэ шъоры зыIэ илъыр. Ежъугъэджагъэхэм непэ лIыхъужъныгъэ зэрахьэзэ Урысыем инеущрэ мафэ фэбанэх, хэушъхьафы­кIыгъэ дзэ операцием хэлажьэх, — къыIуагъ КIэрэщэ Анзаур.

АР-м и ЛIышъхьэ хэу­шъхьафыкIыгъэ дзэ операцием хэ­лажьэ­хэрэм ясабый­хэм лъэ­шэу ынаIэ атырегъэты. ЫпкIэ хэмылъэу гурыт еджапIэхэм ащагъа­шхэх, нэмыкI IэпыIэгъухэр ара­гъэгъоты.

Гъэсэныгъэм исистемэ хэхъоныгъэу ышIыгъэхэм КIэрэщэ Анзаур къатегущыIагъ. Мы аужырэ илъэситIум федеральнэ бюджетым къыхэхыгъэ сомэ миллиарди 9 фэдиз рес­публикэм щагъэфедагъ, ащ ишIуагъэкIэ гурыт еджапIэхэр ыкIи кIэлэцIыкIу IыгъыпIэхэр кIэу ашIы­гъэх, игъэкIотыгъэ гъэцэкIэжьынхэр арашIылIагъэх, кIэлэ­егъаджэхэм ыкIи гъэса­кIохэм яшIэныгъэхэм ахагъэ­хъуагъ. Къэралыгъо программэхэм республикэр зэрифэшъуашэу ахэ­лажьэ, ащ ишIуагъэкIэ игъэ­кIотыгъэ гъэцэкIэжьын зэра­шIылIэрэ гурыт еджапIэхэм япчъагъэ хэхъо. Джащ фэдэу сэнаущыгъэ ин зыхэлъ ныбжьыкIэхэм яшIэныгъэхэм ахагъэхъо­ным анаIэ тет.

Сэнаущыгъэ зыхэлъ кIэлэцIыкIухэр къыхэгъэщыгъэнхэм ыкIи ахэм IэпыIэгъу афэхъугъэным Адыгеим мэхьанэшхо щыраты.

Республикэ Кванториумхэм, «IT-клубхэм», тематическэ сме­нэ­хэм чанэу Iоф ашIэ. Джащ фэдэу республикэ естественнэ хьисап еджапIэм ыкIи «Полярис-Адыгея» зыфиIорэ Гупчэм ащызэхащэрэ гъэмэфэ еджапIэхэм кIэлэеджакIохэр бэу ахэ­лажьэх. Мыхэм яIофшIэн ишIуагъэкIэ Къыблэ ыкIи Темыр Кавказ федеральнэ шъолъырхэм Адыге­им пэрытныгъэр ащиIыгъ. Урысые зэнэкъокъоу «Большая перемена» зыфиIорэм респуб­ликэм илIыкIохэм ащыщхэм т­екIоныгъэр къащыдахыгъ. Мы илъэсым еджапIэр къэзыухыгъэ нэбгырэ 12-мэ предмет зэфэшъхьафхэмкIэ балли 100 къа­хьыгъ.

Олимпиадэ движением тишъо­лъыр нахь зыщырагъэушъомбгъун фаеу АР-м и ЛIышъхьэ пшъэрылъ къегъэуцу. Сэнаущыгъэ зыхэлъ ныбжьыкIэхэр къы­хэгъэщыгъэнхэм фытегъэпсы­хьэгъэ Iофтхьабзэхэр нахьыбэу зэ­хащэщтых. ГущыIэм пае, «Центр индустрии туризма и сферы услуг РА» зыфиIорэр Адыгэ къэралыгъо университетым щызэхащагъ, медицинэ гъэсэныгъэ кластерэу «ПрофиМед» зыфиIорэр Мыекъопэ къэралыгъо технологическэ университетым къэкIорэ илъэсым къыщызэIуахыщт.

Республикэм иобщественнэ ыкIи исоциальнэ-экономическэ щыIакIэ ныбжьыкIэхэр къыхэгъэлэжьэгъэнхэ зэрэфаер Iоф­тхьабзэм къыщаIуагъ. ПIуны­гъэм ылъэныкъокIэ хэбзэ гъэцэкIэкIо къулыкъухэм къатефэрэр ­ашIэщт. Ащ хэхьэ кIэлэегъэджэ ныбжьыкIэхэм ягъэхьазырын.

Адыгэ къэралыгъо универ­ситетым ипилотнэ проектэу «Школ­ково» зыфиIорэм шIуагъэ къытынэу зэрэщыгугъыхэрэр зэхахьэм къыщаIуагъ. АР-м и ЛIышъхьэрэ УФ-м просвещениемкIэ иминистрэрэ мы Iо­фыгъохэм пчъагъэ­рэ атегущыIагъэх.

Республикэм ипащэу КъумпIыл Мурат ыцIэкIэ кIэлэегъаджэхэм, кIэлэпIухэм, гъэсакIо­хэм зэрафэразэр КIэрэщэ Анзаур къыIуагъ ыкIи илъэ­сыкIэ еджэгъоу къэ­благъэрэмкIэ къа­фэгушIуагъ. Iофтхьабзэм хэлэжьагъэхэм джащ фэдэу шIуфэс къарихыгъ Владимир Нарожнэм. ГъэхъэгъэшIухэр яIэу зэ­рэ­лажьэхэрэмкIэ зэ­рафэразэр ащ къыIуагъ.

Гъэсэныгъэм иси­стемэ хэхъо­ны­гъэхэр ышIынхэм анаIэ зэрэтетыр, кIэлэегъаджэ­хэм ялэ­жьапкIэ къэIэтыгъэныр, еджапIэхэм яматериальнэ-техническэ базэ нахьышIу шIыгъэ­ныр, кIэлэеджакIохэм шIэныгъэ куухэр аIэкIэлъынхэмкIэ ящыкIа­гъэр ягъэгъотыгъэныр пшъэрылъ шъхьаIэу зэрэщытхэр Евгений Лебедевым къыIуагъ. Ахэм афытегъэпсыхьэгъэ Iофтхьабзэу зэхащагъэхэм ягугъу къышIыгъ.

Iофтхьабзэм икIэух гъэсэныгъэм иIофышIэхэу, ныбжьыкIэ патриотическэ организациехэм япащэхэу гъэхъэгъэшIухэр зы­шIыгъэхэм АР-м и ЛIышъхьэ, АР-м и Къэралыгъо Совет — Хасэм, АР-м гъэсэныгъэмрэ шIэныгъэмрэкIэ и Министерствэ ящытхъу тхылъхэр аратыжьы­гъэх, шъхьафэу ветеранхэр агъэшIуагъэх.

ДЕЛЭКЪО Анет. Сурэтхэр: А. Гусев.