КIэлэцIыкIухэм ягъэмэфэ зыгъэпсэфыгъо уахътэр ыкIэм фэкIуагъ, джырэ уахътэм илъэсыкIэ еджэгъум зыфагъэхьазыры.

[caption id="attachment_138267" align="aligncenter" width="800"] Шъхьэлахъохэу Милана, Милена, Джамиля.[/caption]

Мы мафэхэм бэдзэрхэм, щэпIэ чIыпIэхэм ащыжъот, ны-тыхэм ясабыйхэр еджапIэм фагъэхьазырых.

Джырэ уахътэм сабыир еджа­пIэм фэбгъэхьазырыныр IэшIэ­хэп, щыгъынхэми, Iэмэ-псымэхэми ауасэ илъэс къэс къа­хэхъо. Апэрэу еджапIэм кIощтхэм игъэхьазырын гурытымкIэ ахъщэу пэIухьащтыр зэдгъа­шIэмэ тшIоигъоу тыкIэупчIагъ, ныхэм гущыIэгъу тафэхъугъ.

Жэлдэшэ Анжелэ мыгъэ лицееу N 8-м чIэхьэ. Зыщыпсэухэрэм мыр нахь пэблагъ ыкIи шIэныгъэ куухэр мыщ щара­гъэгъотэу зызэхахым ны-тыхэм емыджэнджэшэу къыхахыгъ. Апэрэ кIэлэегъаджэр Галина Кучеренкэр ары.

— Мы еджапIэр сыдигъокIи сыгу рихьыщтыгъ, джы игъэ­кIотыгъэ гъэцэкIэжьынхэм ауж къы­зэIуахыжьыгъ, къэмышIэ­жьы­нэу зэхъокIыгъ, чIэтыр зэкIэ кIэ. Аужырэ шапхъэхэм ади­штэрэ еджапIэм сипшъашъэ зэ­рэщеджэщтым сегъэгушхо. Гъэсэныгъэм иучреждение ­ищагу зэрифэшъуашэу зэтырагъэпсыхьагъ. Анжелэ еджэным фэхьазырэу макIо, еджапIэм ипрограммэ елъытыгъэу апэрэ шIэныгъэхэр зэригъэгъотыгъэх. Лицеим щеджэхэрэм зэкIэми яшъуашэхэр зэфэдэх, ау шъоу иIэщтыр тэ къыхэтхыгъ. Ар къыт­фащи къэтщэфыгъ, сомэ мин 12 тефагъ. Тхылъхэр зэкIэ къытатыгъэх, ау нэмыкI Iэмэ-псымэу агъэфедэщтхэм сомэ мини 3 фэдиз атефагъ. АР-м и ЛIышъхьэ ишIухьафтын ишIуагъэ къытэкIыщт, Iалъмэкъ тщэфыщтэп, — еIо Рузанэ.

[caption id="attachment_138268" align="aligncenter" width="800"] Жэлдэшэ Анжел.[/caption]

Тэуе щыщ Гусэрыкъо Тимур Джэджэхьэблэ гурыт еджапIэм чIэхьащт. Iоныгъом и 1-р къы­фэмыгъэсыжьэу ежэ. ЕджапIэм мыкIозэ апэрэ шIэныгъэхэр зэригъэгъотыгъэх, анахь чанхэм ясатыр хэт. «ЗэкIэ сшIэнэу сы­фай» зыфиIорэ Урысые олимпи­а­дэм хьисапымкIэ апэрэ чIы­пIэр къыщыдихи, диплом къыфагъэшъошагъ. Хьашъхъэнэкъо Светланэ иапэрэ кIэлэегъэджэщт.

— КIэлэцIыкIу пэпчъ апэрэ классым ичIэхьан шIогъэшIэ­гъонэу ежэ. ЕджапIэм тыфэхьазыр, тищыкIагъэр зэкIэ тщэфыгъахэ. ТиеджапIэ хэушъхьафыкIыгъэ шъуашэ кIэлэцIыкIумэ ащыгъынэу къыдилъытэрэп, ау джанэр фыжьын, гъончэджыр шIуцIэн фае. Джэнэ зэфэшъхьаф­хэр, ныбалъэр, цуакъэхэр, нэмыкIхэр фэсщэфыгъэх. Джащ фэдэу канцеляриер зэкIэ зэдгъэгъотыгъах. Iалъмэкъыр анахь дэгъоу къыхэсхыгъ, сомэ мини 5 тефагъ. ЗэкIэ къызызэхэплъы­тэжьыкIэ, сомэ мин 20-м къыщегъэжьагъэу мин 40-м нэсэу атефэщт, — еIо Саидэ.

ЗэтIуазэхэу Шъхьэлэхъо Миланэрэ Миленэрэ мыгъэ апэрэ классым макIох. Ашыпхъу на­хьыжъэу Джамилэ зыщеджэрэ Адыгэ республикэ гимназиер ары ахэм къыхахыгъэр. Апэрэ кIэлэегъаджэр Тыгъужъ Роз. Зэшыпхъухэр илъэсыкIэ еджэгъум фэхьазырых.

[caption id="attachment_138269" align="aligncenter" width="800"] Гусэрыкъо Тимур.[/caption]

— Гъэмафэр къызихьагъэм къыщегъэжьагъэу мэкIэ-макIэу илъэсыкIэ еджэгъум зыфэдгъэ­хьазырынэу едгъэжьагъ. Джами­лэ я 4-рэ классым ехьэ. Ми­ла­нэрэ Миленэрэ илъэсым къыкIоцI еджапIэм фэдгъэхьазырыгъэх, логопедическэ кIэлэцIыкIу IыгъыпIэм апэрэ шIэныгъэхэр щызэрагъэгъотыгъэх, ащ нэмыкIэу унэе еджапIэми сщагъэх. ЕджакIи, тхакIи ашIэ. Илъэсым къыкIоцI ащыгъыщтым изыныкъо тщэфыгъахэ. ХэушъхьафыкIыгъэ шъуашэ тиIэп, джэнэ фыжь тIу­рытIу къафэсщэфыгъ, джыри IэшъхьэкIакоу къэсщэфыщт. Ащ нэмыкIэу кIэпхынхэр, гъончэдж­хэр къафэсщэфыгъэх, ахэр шIокI имыIэу шIуцIэнхэ фае. Ащ нэмыкIэу цуакъэхэр, бантхэр зэдгъэгъотыгъэх. Тхылъхэр къы­татыгъэх, ау тетрадьхэр тщэфы­гъэх, ахэм сомэ 650-рэ ате­фагъ. Ащ нэмыкIэу, тетрадьхэр, къэлэмыр, тхьэпэ зэмышъогъухэр, дневникыр, линейкэр, нэмыкI цIыкIу-шъокIухэр къэтщэфыгъэх. Портфельхэм ауасэ зэфэшъхьаф: cомэ 1500-м къыщегъэ­жьагъэу мини 5-м ехъу. Ар джыри къэтщэфыгъэп, — еIо Светэ.

Мыекъопэ бэдзэршIыпIэм Iоф щызышIэрэ бзылъфыгъэм къызэрэтиIуагъэмкIэ, кIэлэцIыкIур зычIэхьащт еджапIэм щырищыкIэгъэщтхэр тхыгъэу къыратых, ащ елъытыгъэу ны-тыхэр мэщафэх. Апэрэ классым кIорэ кIэлэеджакIом игъэхьазырын ахъщэу пэIухьащтыр къызып­лъытэжькIэ, гурытымкIэ сомэ мин 20-30 фэдизэу къекIы. Ащ дакIоу Iоныгъом и 1-м еджапIэм ыхьыщт къэгъэгъэ Iэрамым гу­рытымкIэ сомэ мин ыуас.

ДЕЛЭКЪО Анет.