Адыгэ къэралыгъо университетым и Кавказ хьисап гупчэ чъэпыо­гъум и 10-м къыщыублагъэу и 15-м нэс Урысыем хьисапымкIэ игупчэхэм яя 3-рэ конференцие щыкIощт.

Ащ хэлэжьэщтхэм ятхын Iоны­гъом и 11-м нэс зэIухыгъэщт. ХьисапымкIэ шъолъыр ыкIи ду­нэе гупчэхэм яIофышIэхэр, шIэныгъэлэжьхэр, аспирантхэр ыкIи студентхэр ащ хэлэжьэщтых.

Хьисапым ылъэныкъокIэ илъэ­сым ихъугъэ-шIэгъэ анахь инэу конференциер зэрэхъущтыр университетым ипресс-­къулыкъу къеушыхьаты. ШIэныгъэлэжьхэм аужырэ ушэтынэу ашIыгъэхэм язэфэхьысыжьхэр ашIыщтых, непэ Iофыгъоу зыуж итхэм къатегущыIэщтых. Мыщ фэдэ конференциер апэрэу 2021-рэ илъэсым «Сириусым» щызэхащэгъагъ, ятIонэрэр 2022-м Москва икъэралыгъо университет щыкIуагъ. Джы Адыгэ къэралыгъо университетым и Кавказ хьисап гупчэ чэзыур къынэсыгъ.

Конференцием секцие 12 щылэжьэщт. Хьисап шIэныгъэм имызакъоу форумым хэлэжьэщтхэр гъэсэныгъэм иIофыгъохэм атегущыIэщтых.