Мэкъэтыныр зыщы­кIощт мэфэ зыкIым рес­публикэм зыфегъэ­хьа­зыры.

Iоныгъом и 10-м хэдзын кам­паниищымэ якIэуххэр зэфахьысыжьыщтых: Iоныгъом и 8-м къыщыублагъэу и 10-м нэс Мые­къуапэрэ Каменномостскэмрэ ялIыкIо къулыкъухэм ядепутатхэр хадзыщтых, джащ фэдэу Мыекъопэ районым идепутат ихэдзын тедзэхэри кIощтых.

«ШышъхьэIум и 30-м хэдзэкIо комиссиехэр яIофшIэн фежьэщтых. Республикэм хэдзынхэмкIэ и Гупчэ комиссие тигъусэу Iоф зыдатшIэрэр къытпыщылъ хэдзынхэр хабзэр укъуагъэ мы­хъоу, щынэгъончъэу регъэкIокIыгъэнхэр ары, тицIыфхэм яшIоигъоныгъэ гъэцэкIэгъэнымкIэ ящыкIэгъэ амалхэр зэкIэ ядгъэ­гъотыщт», — къыIуагъ АР-м и ЛIышъхьэу КъумпIыл Мурат.

Ащ нэмыкIэу, Адыгеим ама­къэ щатын алъэкIыщт шъолъырыкIэхэм къарыкIыгъэхэу тирес­публикэ щыпсэухэрэми. Iоныгъом иапэрэ мафэхэм ахэм апае зипIалъэ къэмысыгъэ мэкъэтыныр зэхащэщт. Донецкэ ыкIи Луганскэ Народнэ Рес­публикэхэм, Запорожскэ ыкIи Херсон хэкухэм яхэбзэихъухьэ къулыкъухэм яхэдзын щыIэщт. Ащ пае республикэм хэдзыпIэ чIыпIитIу щагъэнэфэщт: къалэу Мыекъуапэрэ псэупIэу Яблоновскэмрэ.

«ЧIыпIэ зыгъэIорышIэжьыным икъулыкъухэм пшъэрылъ афэсшIыгъ мы IофшIэным ылъэныкъокIэ техникэ IэпыIэгъу дэгъу аратынэу, къэбарыр икъоу цIыфхэм алъыгъэIэсыгъэнымкIэ зэрищыкIагъэм тетэу IофшIэныр зэхащэнэу, АР-м хэдзынхэмкIэ и Гупчэ комиссие «илиние плъыр»: 8(8772)-59-30-35 къызфагъэфедэнэу. Мы хэдзыпIэ чIыпIэхэмкIэ комиссиехэм ­ялъэIу тхылъ закъуи анаIэ тырамыгъэтэу къагъанэ хъущтэп.

ШъолъырыкIэхэм къарыкIыгъэхэу непэ Адыгеим исхэм яфитыныгъэхэр къызфагъэфе­дэнхэм ыкIи мэхьанэшхо зиIэ хъугъэ-шIагъэм — Донецкэ На­роднэ Республикэм, Луганскэ Народнэ Республикэм, Херсон ыкIи Запорожскэ хэкухэм япарламентхэм янароднэ депутатхэм яхэдзын хэлэжьэнхэм иамал икъоу къызфагъэфедэнымкIэ тадеIэн фае», — къыхигъэщыгъ КъумпIыл Мурат.