Хабзэ зэрэхъугъэу, гъэсэныгъэм илъэпкъ системэ хэхъоныгъэ егъэшIыгъэным фэгъэхьыгъэу кIэлэегъаджэхэм яшышъхьэIу зэIукIэгъу неущ Адыгэ Республикэм и Къэралыгъо филармоние сыхьатыр 11-м щыкIощт.

АР-м гъэсэныгъэмрэ шIэ­ныгъэмрэкIэ и Министерст­вэ Iофтхьабзэм икIэщакIу.

ШышъхьэIу зэIукIэгъум ипэгъокIэу мы мазэм и 22-м къыщегъэжьагъэу и 28-м нэс тематическэ ­треки 6 республикэм щызэхащагъ. Iофтхьэбзэ 20-у зэхащагъэм спикер 30-рэ кIэлэегъэджэ 850-м ехъурэ ахэлэжьагъ.

Республикэм имуниципальнэ образованиехэм арыт гъэсэныгъэ организациехэм шышъхьэIум и 21-м къыщегъэжьагъэу гъэсэныгъэм хэхъоныгъэ егъэшIыгъэным епхыгъэ Iофыгъо- хэр щызэхащэх.

КIэлэегъаджэхэм яшы­шъхьэIу зэIукIэ УФ-м гъэсэ­ныгъэмкIэ иминистрэу Сергей Кравцовым ипэублэ гущыIэкIэ мы илъэсым къы­зэIуахыщт. 2023 — 2024-рэ илъэсыкIэ еджэгъум­ шъолъырым гъэсэныгъэмкIэ исистемэ хэхъоныгъэхэр ышIынхэм епхыгъэ Iофы­гъохэм атегущыIэщтых.

ЕгъэджакIом ыкIи гъэсакIом и Илъэс фэгъэхьыгъэ Iоф­тхьабзэу зэхащэхэрэм ате­гу­щыIэщтых, кIэлэцIыкIухэм ыкIи ныбжьыкIэхэм яурысые общественнэ-къэралыгъо движениеу «Движение первых» зыфиIорэм хэхъоныгъэхэр ышIынхэм, дзэ-­патриотическэ пIуныгъэм епхыгъэ Iофыгъохэм, еджэгъу сыхьатхэм ахэмыхьэрэ «Разговоры о важном» зыфиIорэм ыкIи нэмыкI- хэм атегущыIэщтых.