Адыгэ къуаем ифестивалэу илъэс пшIыкIутIу хъугъэу зэхащэрэр Iоныгъо мазэм и 16 — 17-м щыIэщт. Хабзэ зэрэхъугъэу, къушъхьэтхэу Унэ-Коз пэIулъэшъогъэ Дахъо гъэхъунэм ар щыкIощт.

[caption id="attachment_138191" align="aligncenter" width="800"] Сурэтыр: ЗэIухыгъэ къэбарлъыгъэIэс амалхэр.[/caption]

АР-м и ЛIышъхьэу Къум­пIыл Мурат Адыгеим ибренд шъхьаIэу адыгэ къуаем идэгъугъэ, иIэшIугъэ, шIогъабэу хэлъыр республикэм исхэм ямызакъоу, Урысыем инэмыкI чIыпIэхэм ащыпсэухэрэри щызыгъэгъозэхэрэ Iофтхьабзэм ипрограммэ имызакъоу, мэфэкIыр щынэгъончъэу зэрэкIощтым, автомобильхэм яуцупIэхэр зэрэгъэ­псыгъэщтхэм анэсыжьэу, хэзыгъэ имыIэу зэкIэмэ анаIэ атырагъэтынэу ащ фэгъэзагъэхэм пшъэрылъ къафишIыгъ.

АР-м мэкъумэщ хъыз­мэтымкIэ и Министерствэ къызэрэщаIуагъэмкIэ, Iоф­тхьэбзэ гъэшIэгъонхэмкIэ а мэфитIур баищт. КъоешIхэм яIэпэIэсэныгъэ къагъэлъэгъощт. Ахэм къа­шIыгъэм идэгъугъэ хьа­кIэхэм ауплъэкIущт. Джащ фэдэу Адыгеим ишхыныгъо IэшIухэр — къуаер, шъоур, щаир, мыIэрысэр, нэмыкIхэр зыдащэжьынхэ амал яIэщт. Ащ пае щапIэхэр къызэIуахыщтых.

Ахэм анэмыкIэу, ­лъэпкъ нэшанэ иIэу пкъыгъо зэ­фэшъхьафхэм ахэшIыкIыгъэ Iэпэщысэхэм якъэ­гъэлъэгъон а чIыпIэ дэдэм щыкIощт, пщэрыхьаным фэкъулайхэм мастер-классхэр къагъэлъэгъощтых. Концертхэр, зэнэкъокъу зэфэшъхьафхэр программэм къыдыхэлъытагъэх. МэфэкI джэгукIэ ыкIи мэ­шIоустхъукIэ фестивалыр аухыщт.

Мыгъэ муниципальнэ образованиехэмрэ адыгэ къуаер къыдэзыгъэкIырэ хъызмэтшIэпIихэу рес­публикэм итхэмрэ къа­гъэхьазырырэ «щагухэм» арагъэубытырэ чIыпIэ- хэр нахь ин ашIыгъэх. Ахэр анахь къахэщынхэм, цIыфхэр якIолIэнхэмкIэ нахь Iэрыфэгъоу щытынхэм мэхьанэ зэриIэм АР-м и ЛIышъхьэ зэхэща­кIохэм анаIэ тыраригъэ­дзагъ.

Щэм хэшIыкIыгъэ гъомылапхъэхэр къыдэзы­гъэкIырэ хъызмэтшIапIэ­хэм щэтырэхэр агъэуцущтых. ШхапIэхэр хэу­шъхьафыкIыгъэу гъэпсыгъэщтых, кIэлэцIыкIухэм апае джэгупIэхэр, мэфэкIым хэлажьэхэрэм ар агу къэзыгъэкIыжьыщт сурэт дахэхэр зыщытырахын алъэкIыщт чIыпIэхэр къыдэлъытэгъэщтых, сценэм концертхэр щыкIощтых.

Фестивалым «щагу» анахь дэгъоу лъэпкъ нэшанэхэр къызхэщыгъэр, адыгэ къое анахь IэшIур, ар зыхэлъ адыгэ шхын ыкIи нэмыкI гъомылэу ашIыгъэхэм анахь дэгъур къыщыхахыщтых. Iофтхьабзэм къемыкIолIэшъугъэхэми алъэ­гъуным фэшI ар зэрэкIорэр занкIэу социальнэ хъытыум къыщагъэлъэ­гъощт.

ХЪУТ Нэфсэт.