Адыгеим зынаIэ тет Херсон хэкум и Геническэ рай­он партиеу «Единэ Россием» ишъолъыр къутамэ игъу­сэу Урысыем и Президентэу Владимир Путиным къыгъэнэфэгъэ пшъэрылъхэм язэшIохын шъолъырыкIэм щызэшIохыгъэным дэлажьэ.

Социальнэ, транспорт, инженер къэкIуапIэхэр щызэтегъэпсыхьэгъэнхэм, цIыфхэмкIэ анахь мэхьанэ зиIэ Iофтхьабзэхэр щызэшIохыгъэнхэм игъэ­кIотыгъэу Iоф дашIэ. Джащ фэдэу лъэныкъуабэкIэ къэ­ралыгъо фэIо-фашIэхэр зыгъэцэкIэрэ Гупчэ шышъхьэIум ыкIэм къыщызэIуахынэу загъэхьазыры. Гупчэм пэIулъ чIыпIэр агъэкъабзэ, электроэнергиер къыращалIэ.

Iоныгъом и1-м ехъулIэу еджапIэхэм ащыщ игъэ­кIотыгъэу агъэцэкIэжьыгъ. Джыри еджэпIитIумэ спорт джэгупIэхэр афызэтырагъэпсыхьагъэх. Псауны­гъэр зыщагъэпытэщт физкультурнэ комплекситIу агъэуцугъ.

Геническэ районым щы­псэухэрэм сыд фэдэрэ лъэныкъокIи IэпыIэгъу афэхъугъэным ылъэны­къокIэ IофшIэнышхо щызэшIуахы. ЦIыфхэм ящы­IэкIэ-псэукIэ мыщ щызэтеуцожьыгъэным пае рес­публикэм къытефэрэ пшъэрылъхэм ягъэцэкIэн ынаIэ тет. «Мы охътэ мы­псынкIэм цIыфэу IэпыIэгъу зищыкIагъэхэм ар ядгъэгъотыным тишъыпкъэу тыпылъ», — хигъэунэфыкIыгъ АР-м и ЛIышъхьэу КъумпIыл Мурат.