Лъэпкъ олимпиадэр Адыгем щыкIощт
«Экономикэм и Апшъэрэ еджапI» зыфиIорэ ушэтэкIо университетым я 9 — 11-рэ классхэм ащеджэхэрэм апае зэхищэрэ Лъэпкъ олимпиадэу DANO изы едзыгъо Адыгэ къэралыгъо университетым Iоныгъом и 16-м щыублагъэу и 17-м нэс щыкIощт.
«Олимпиадэу DANO и Хакатон» зыфаIорэр зэфэхьысыжь игъэкIотыгъэхэр къызхэкIырэ ушэтын пшIынышъ, зэнэкъокъум иятIонэрэ едзыгъо ухэуцоныр ары. Мыщ фэдэ олимпиадэ едзыгъохэр мыгъэ Екатеринбург, Санкт-Петербург ыкIи Нижний Новгород ащыкIуагъэх. Джы Мыекъуапэ чэзыур къынэсыгъ. Ушэтыным кIэлэеджэкIуи 100 хэлэжьэщт. Хьисапыр дэгъоу зышIэхэрэр, зэфэхьысыжьхэр зышIышъухэрэр ыпкIэ хэмылъэу хэлэжьэшъущтых. Олимпиадэм хэлажьэ зышIоигъохэм Iоныгъом и 4-м къыщыублагъэу сайтэу dano.hse.ru зыщарагъэтхын алъэкIыщт.
ХэгъэунэфыкIыгъэн фае, олимпиадэу DANO и Хакатон ятIонэрэу Адыгэ къэралыгъо университетым щызэхащэ. ГъэрекIо ащ Адыгеим, Краснодар краим, Ростов хэкум якIэлэеджэкIо 110-рэ хэлэжьагъ.
«Адыгэ къэралыгъо университетыр экономикэм и Апшъэрэ еджапIэ дэлажьэ, лъэпкъ олимпиадэм изэхэщэнкIэ IэпыIэгъу фэхъу. Пшъэрылъ шъхьаIэу мы Iофтхьабзэм иIэр зэфэхьысыжь сэнаущыгъэ зыхэлъ кIэлэеджакIохэр къыхэгъэщынхэр, сэнэхьат къыхэхынымкIэ ныбжьыкIэхэм IэпыIэгъу афэхъугъэныр ары. Программэу «Приоритет 2030-рэ» зыфиIорэм диштэу университетым ышIыщт хэхъоныгъэхэм къыдалъытэ информационнэ технологиехэр къыщыIэтыгъэнхэр. Хакатоным хэлэжьэрэ кIэлэеджакIохэр нэужым тиуниверситет къычIэхьажьынхэшъ, апшъэрэ гъэсэныгъэ щагъотыным тыщэгугъы», — хигъэунэфыкIыгъ Адыгэ къэралыгъо университетым ихэхыгъэ программэхэм адэлэжьэрэ департаментым ипащэу Виктория Бучацкаям.
Хакатоным текIоныгъэ къыщыдэзыхыхэрэм Лъэпкъ олимпиадэу DANO иятIонэрэ едзыгъо хэхьанхэу амал къаратыщт.