ЦIыфхэм Iэрыфэгъу афэхъунэу
«ТНС энерго Кубань» зыфиIорэ компанием испециалистхэм дачэ зиIэу Краснодар краимрэ Адыгеимрэ арысхэм зэIукIэгъухэр адашIынхэр хабзэ хъугъэ. ГущыIэм пае, гъэтхэ-гъэмэфэ уахътэр къызихьагъэм къыщыублагъэу гъогогъу 40 фэдизрэ ащ фэдэ зэIукIэгъухэр адыряIагъэх.
[caption id="attachment_138176" align="aligncenter" width="800"] Сурэтыр: «ТНС энерго Кубань» зыфиIорэм ипресс-къулыкъу.[/caption]
Дачэ зиIэу, электроэнергиер къэзытырэ компанием зэзэгъыныгъэм дыкIэтхэгъэ нэбгырэ мин 63-м ызыныкъом нахьыбэм «унэе кабинетхэр» яIэ хъугъэ. Электроннэ шIыкIэм тетэу гъэпсыгъэ квитанциер нэбгырэ мин 36,5-мэ къафэкIо.
ХъызмэтшIапIэм илIыкIохэм электричествэм ыуасэ зэрэзэхахъорэр цIыфхэм къафаIотагъ, упчIэу къафагъэзагъэхэм джэуапхэр аратыжьыгъэх. Джащ фэдэу «унэе кабинетым», телефон приложением Iоф зэрадэпшIэщтым, электроннэ шIыкIэм тетэу гъэпсыгъэ квитанциер зэрэпыбгъэнэщтым атегущыIагъэх.
— ТифэIо-фашIэхэр цIыфхэм нахь Iэрыфэгъу ыкIи къызэрыкIо афэхъунхэм сыдигъокIи тыпылъ. ГущыIэм пае, счетчикым къыгъэлъэгъуагъэр пэIудзыгъэ шIыкIэм тетэу чэщыми агъэхьын алъэкIынэу щыт. Ащ пае операторым фытеонхэ ищыкIагъэп. Онлайн шIыкIэу агъэфедэрэр джыри нахь Iэрыфэгъу афэхъуным пае зэрэдгъэкIэжьырэм имызакъоу, псэупIэ- коммунальнэ лъэныкъомкIэ цIыфхэм яшIэ хагъэхъоными тыдэлажьэ, — къыIуагъ «ТНС энерго Кубани» цIыфхэм агъэфедэгъэ электричествэм ыуасэ къафэлъытэгъэнымкIэ и ГъэIорышIапIэ ипащэу Валерий Морозовым.
ШАМАРИНА Тамара. «ТНС энерго Кубань» зыфиIорэм ипресс-къулыкъу.