Нэжъ-Iужъхэр зыщызэIукIэнхэ алъэкIыщт Гупчэхэр гъэпсыгъэнхэм кIэщакIо фэхъугъ УФ-м и Социальнэ фонд. ПроектыкIэм ипхырыщын шъолъырхэр чанэу хэлажьэх.

Нэжъ-Iужъхэм анахьыбэу ящыкIагъэр цIыфхэм ахэхьанхэр, ежьхэм япкъэгъу- лэгъухэм аIукIэнхэр, гущыIэгъу зэфэхъун­хэр ары. Ащ фэдэ амал ятыгъэныр мы гупчэхэм япшъэрылъ шъхьаI. Зыныбжь хэкIотагъэу зизакъоу щыIэхэм нэIоса­кIэхэр ашIынхэмкIэ, гухахъо зыхагъотэн Iоф къызфагъотыжьынымкIэ, ащ зырагъэушъомбгъунымкIэ ахэр IэпыIэгъу афэхъух.

Адыгеим пенсионерэу нэбгырэ мини 121-рэ ис. УФ-м и Социальнэ фонд и Къутамэу АР-м щыIэм тызэрэщигъэгъо­загъэмкIэ, нэжъ-Iужъхэр зыщызэIукIэнхэ алъэкIыщт Гупчэхэр мы илъэсым Джэджэ ыкIи Мыекъопэ районхэм къащызэIуахыгъэх. ЦIыфхэм Iоф адэзышIэрэ къулыкъухэм (клиентская служба) яIоф­шIэгъу сыхьатхэм ахэри зэIухыгъэх.

Пенсионерхэм языгъэпсэфыгъо уахътэ шIуагъэ къытэу агъэкIоным, якIэсэ Iоф горэм пылъынхэм апае ищыкIэгъэ пстэур къыдалъытэзэ зэрагъэпсыгъэхэр фондым и Къутамэ къыщыхагъэщыгъ.

Гупчэхэм тхылъеджэпIэ цIыкIухэр яIэх, пенсионерхэм интернетыр агъэфедэным пае ащ епхыгъэу компьютерхэр ащагъэу­цугъэх, гъэпсэфыпIэ чIыпIэхэр хэушъхьа­фыкIыгъэу афашIыгъэх, нэбгырабэ зы­хэлэжьэрэ Iофтхьабзэхэр ащызэхащэнхэ алъэкIынэуи ашIыгъ.

Гупчэхэм къякIуалIэхэрэм яупчIэхэр, гумэкIыгъоу яIэхэр афагъэзэнхэ алъэ­кIынэу хэбзэ къулыкъухэм ялIыкIохэм аIуагъакIэх. Джащ фэдэу псауныгъэмкIэ зишIуагъэ къэкIощтхэм афэгъэхьыгъэ лекциехэр къафатых, компьютерым Iоф зэрэдэпшIэщтыр, финансхэр зэрэбгъэIорышIэщтхэр арагъашIэ, шахмэтхэмкIэ, шашкэхэмкIэ зэнэкъокъухэр, егъэджэн зэфэшъхьафхэр афызэхащэх. Ахэм ямы­закъоу кинофильмэхэм зэдяплъынхэу, тхылъхэм зэдяджэнхэу амал яI.

Апэрэ Гупчэр 2023-рэ илъэсым ищылэ мазэ станицэу Джаджэм къыщызэIуа­хыгъ. Районым ис нэжъ-Iужъхэр зэзыщэлIэрэ, нэбгырэ пэпчъ гухахъо зыхигъотэрэ Iофым пылъын амал къэзытырэ чIыпIэу ар хъугъэ.

Социальнэ фондым и Къутамэ къызэрэщаIуагъэмкIэ, пенсионерхэр ягуапэу ащ къэкIох. Ахэм япсауныгъэ зэтезыгъэуцожьыщт физкультурэ Iофтхьабзэхэр афызэхащэх, театрэм, музеим, къэгъэлъэгъонхэм ащэх, чIыопсым зыщарагъэ­гъэпсэфы.

Социальнэ фондым и Къутамэу АР-м щыIэм къызэрэщаIуагъэмкIэ, зыныбжь хэкIотагъэхэм тхылъ еджэныр, зэджагъэхэр къызэфаIотэжьыныр анахьэу якIас, цIыф гъэшIэгъонхэм ягуапэу аIокIэх, темэ зэфэшъхьафхэр къаIэтых, яеплъыкIэхэмкIэ зэдэгуащэх.

ЯтIонэрэ Гупчэр поселкэу Тульскэм блэкIыгъэ бэдзэогъу мазэм къыщызэIуа­хыгъ. Ащ щызэIукIэхэрэр «Будь здоров» зыфиIорэ спартакиадэм хэлэжьагъэх ыкIи дартсымкIэ, теннис цIыкIумкIэ, шахматхэмкIэ, щэрыонымкIэ ыкIи волейболымкIэ зэнэкъокъухэм апэрэ чIыпIэхэр къарахыгъэх, медальхэр, щытхъу тхылъхэр къаратыгъэх.

Гупчэм иIэпыIэгъукIэ хэушъхьафыкIыгъэ дзэ операцием хэлажьэзэ шъобж зытещагъэ хъугъэхэр зы­чIэлъ­хэ госпиталым нэжъ- Iужъхэр кIогъагъэх. Хэтэ­рыкI­хэр, пхъэшъхьэ-мы­шъхьэхэр, IэшIу-IушIу гъэ­жъа­гъэхэр афахьыгъэх, концерт цIыкIу къафатыгъ.

Джащ фэдэу мы Гупчэм къекIуалIэхэрэр медицинэм иIофышIэхэм аIуагъэкIэгъагъэх. Нэжъ-Iужъхэм япсауныгъэ фэгъэхьыгъэ упчIэу яIэхэр ахэм афагъэзагъэх, нэбгырэ пэпчъ джэуап ыгъо­тыгъ. Фондым и Къутамэ ипсихолог зэIукIэгъоу ади­шIыгъагъэри гъэшIэгъонэу кIуагъэ. Дзэ-тарихъ обществэм ишъолъыр Къутамэ исекретарэу Иван Бормотовми IукIэгъагъэх, УФ-м и Къэралыгъо быракъ и Мафэ щыIэгъэ Iофтхьабзэхэми ахэлэжьагъэх.

Илъэсэу тызхэтым Гупчэхэм нэбгырэ 700-м ехъу къякIолIагъ, Iофтхьэбзэ зэфэшъхьаф 40 ахэм афызэхащагъ. Социальнэ фондыр кIэщакIо зыфэхъугъэ гупчэхэм нэжъ-IужъхэмкIэ мэхьанэшхо зэряIэр, шIуагъэ къызэратырэр охътэ кIэкIым къэлъэгъуагъ.

Зыгъэхьазырыгъэр ХЪУТ Нэфсэт. Сурэтыр: зэIухыгъэ къэбарлъыгъэIэс амалхэр.