Адыгеим ыкIи Пшызэ шъолъыр ащыпсэурэ быслъымэнхэм я ДиндэлэжьапIэ икIэщакIоу ислъам дин шIэныгъэхэмкIэ зэнэкъокъу зэхащагъ. Республикэм ыкIи Пшызэ шъолъыр арыт мэщытхэм къякIолIэрэ динлэжь кIэлакIэхэм купхэр къагъэхьазырыгъэх. ЗэкIэмкIи куп 12 апэрэ едзыгъом щызэнэкъокъугъ, финалым 6-р нэсыгъ. Зэнэкъокъум икIэух едзыгъо къалэу Краснодар щыкIуагъ.

[caption id="attachment_138158" align="aligncenter" width="800"] Тхьаркъохъо Аскэр[/caption]

— Краснодар, Кощхьаблэ, Хьакурынэхьаблэ, Инэм, Яблоновскэм якупхэр ары финалым нэсыгъэхэр, — къеIуатэ зэнэкъо­къум изэхэщакIохэм ащыщэу, Адыгеим ыкIи Пшызэ шъолъыр ащыпсэурэ быслъымэнхэм я ДиндэлэжьапIэ илIыкIоу Краснодар краим щыIэ Тхьаркъохъо Аскэр. — Диным ылъапсэ ашIэным, хэукъоныгъэхэр дин шIошъ­хъуныгъэм хэмыхъухьанхэм апае мы зэнэкъокъур зэхэтэщэ.

Зэнэкъокъур гъэрекIо къыще­гъэжьагъэу зэхащэ ыкIи динлэжьхэми ашIогъэшIэгъон хъугъэ. ГущыIэм пае, гъэрекIо купи 5 зэнэкъокъум иапэрэ едзыгъо къекIолIэгъагъэмэ, мы илъэсым ахэм япчъагъэ 12-м нэсыгъ. Ислъам динымкIэ апшъэрэ гъэ­сэныгъэ зиIэу, бэмышIэу еджэныр къэзыухыгъэ Кучмэз Айдэ­мыр, Барцо Азэмат ыкIи Тхьаркъохъо Рэщыд зэнэкъокъум пае упчIэхэр зэхагъэуцуагъэх. Пегъымбарым ищыIэныгъэ, тхьэшIошъхъуныгъэм, КъурIаным иIаятхэм ахэр афэгъэхьыгъэх. ЫкIи зэнэкъокъум зыфагъэхьазырыным пае ащ хэлажьэхэрэм тхылъхэри афагощыгъагъэх.

ШIэныгъэр зэкIэми алъапс. Ислъам динми цIыфым ащ ынаIэ тырегъэты, еджэным, шIэныгъэ зэригъэгъотыным къыфэджэ. Быслъымэнхэм яшIэныгъэхэм ахагъэхъоным, пхэнджыгъэ хэмылъэу, зафэу диныр алэжьыным зэнэкъокъур фэIорышIэнэу щыт.

— Мыщ фэдэ Iофхэм лъэшэу яшIуагъэ къэкIо цIыфыр еджэным, шIэныгъэ ыгъотыным пае, — къеIо Яблоновскэ мэщытым иIимамэу, жюрим хэтэу Къанэ­къо Рэмэзан. — Диным изакъоп, сыд фэдэрэ лъэныкъокIи арэущтэу щыт – шIэныгъэр зэкIэми алъапс. Диным къэбарэу пы­лъым уеджэн, зэбгъэшIэн, купкIэу иIэр лъапсэм къипхын фае. Непэрэ мафэм видеотехыгъэ кIэкIхэм цIыфхэр яплъых, пхэнджи, тэрэзи ахэм ахэт. Арышъ, еджэным цIыфхэм къыфагъэзэжьынымкIэ мыщ шIуагъэ къе­хьы.

[caption id="attachment_138159" align="aligncenter" width="800"] Шъхьэлэхъо Ибрахьим[/caption]

— Диныр IорIотэжь къэбарэу щытэп, шIэныгъэ гъэнэфагъ, — къыпедзэжьы Адыгеим ыкIи Пшызэ шъолъыр ащыпсэурэ быслъымэнхэм ямуфтий игуа­дзэу Шъхьэлэхъо Ибрахьим. — Быслъымэным идин тэрэзэу ылэжьыным пае еджэн, ишIэныгъэ хигъэхъон фае. Алахьым КъурIаным иапэрэ Iаятэу Пегъымбар лъапIэм къыфыригъэ­хыгъагъэм итхагъ: «Едж Алахьэу укъэзгъэхъугъэм ыцIэкIэ».

Быслъымэнэу зэнэкъокъурэ купхэм ахэтхэм шIэныгъакIэхэр яIэхэу кIэух едзыгъом къекIолIагъэх. УпчIэ 63-мэ джэуапхэр ахэм къаратыжьыгъ.

— МазэкIэ узэкIэIэбэжьмэ, зэнэкъокъум иапэрэ едзыгъо тыхэлэжьагъ, — къеIуатэ Краснодар икуп хэтэу ТхьалI Азэмат, — ащыгъум упчIэхэр къиныгъэ­хэп. ЗэхэщакIохэм тялъэIугъ упчIэхэр нахь агъэхьылъэнхэу. Мары, шъыпкъэмкIэ, джы ахэр къиныгъэх. Тхылъ пчъагъэми тяджагъ, мыщ фэдэ Iофыгъо тыхэлажьэ къэс тишIэныгъэхэм ахэхъо. УпчIэм иджэуап тэ тымышIэрэмэ, нэмыкIхэм джэуа­пэу къатыхэрэм тядэIу, зэтэгъа­шIэ.

— Апэрэ едзыгъом елъытыгъэмэ, джы упчIэхэр нахь хьы­лъэх, ау ащ елъытыгъэуи нахь гъэшIэгъон хъугъэ. — къыти­Iуагъ Кощхьэблэ мэщытым икуп хэтэу Нажьэ Налбый. — Шъыпкъэр пIощтмэ, мыщ сызкIыхэлажьэрэр шIэныгъэ горэ сиIэ хъуным, кIэу зыгорэ сшIэным пай.

Зэнэкъокъум ижюри нэбгыри 3 хэтыгъ: муфтиим игуадзэу Шъхьэлэхъо Ибрахьим, Яблоновскэ мэщытым иIимамэу Къанэкъо Рэмэзан ыкIи Иорданием икъэралыгъо университет динымкIэ ифакультет щеджэрэ Тхьаркъохъо Рэщыд.

УпчIэ пэпчъ, ихьылъагъэ елъытыгъэу, балл гъэнэфагъэ пылъыгъ. Джащ тетэу ислъам дин шIэныгъэхэмкIэ зэнэкъо­къур сыхьат заулэрэ кIуагъэ. КIэухым пчъагъэхэр къалъытэжьхи, зэ­фэхьысыжьэу жюрим ышIыгъэм­кIэ, апэрэ чIыпIэр Кощхьэб- ­лэ мэщытым икуп ыубытыгъ. Щытхъу тхылъхэри, ахъщэ шIу­хьафтыни ахэм афагъэшъошагъ. Анахь шъхьаIэр апэрэ чIыпIэу къахьыгъэм джыри зы ушэтын ин хэлэжьэнхэ амал къызэраритырэр ары. Ислъам дин шIэ­ныгъэхэмкIэ зэнэкъокъоу Темыр КавказымкIэ зэхащэрэм ахэр хэлэжьэщтых. Бжыхьэм къалэу Налщык щызэIукIэщтых зэнэкъо­къум зыфэзыгъэхьазырыхэрэр.

ГъукIэлI Сусан.

Сурэтхэр: ДиндэлэжьапIэр.