Адыгабзэр зикIасэхэм апай
ШышъхьэIум и 22-м къыщегъэжьагъэу и 28-м нэс Адыгэ къэралыгъо университетым ибазэу «Горная легенда» зыфиIорэм адыгабзэм изэгъэшIэн фэгъэхьыгъэ Iофтхьабзэу «Адыглэнд» зыфиIорэм Iоф щишIэщт.
[caption id="attachment_138067" align="aligncenter" width="800"] Сурэтыр: ЗэIухыгъэ къэбарлъыгъэIэс амалхэр.[/caption]
Я 9 — 11-рэ классхэм ащеджэрэ кIэлэеджэкIо 60 фэдиз ащ къыщызэрэугъоигъ. АдыгабзэмкIэ муниципальнэ ыкIи республикэ олимпиадэхэм текIоныгъэр е хагъэунэфыкIырэ чIыпIэхэр къащыдэзыхыгъэхэр ары къырагъэблэгъагъэхэр. МэфэкI шIыкIэм тетэу ар къызэIуахыгъ.
Программэу «Патриот 2030» зыфиIорэм къыдыхэлъытагъэу проектэу «Адыглэнд» зыфиIорэр зэхащэ. Адыгэ къэралыгъо университетым культурэ ыкIи гуманитар шIэныгъэхэмкIэ и Институт ары гъэмэфэ еджапIэм икIэщакIор.
[caption id="attachment_138068" align="aligncenter" width="800"]
Сурэтыр: ЗэIухыгъэ къэбарлъыгъэIэс амалхэр.[/caption]
Тхьамафэм къыкIоцI бзэм фэгъэхьыгъэ Iофтхьэбзэ зэфэшъхьафхэр еджапIэм щызэхащэщтых. Адыгабзэр нахь арагъэшIэныр, ащ имэхьанэ къэIэтыгъэныр, адыгэ культурэм игъэкIотыгъэу нэIуасэ фашIынхэр ары пшъэрылъ шъхьаIэу зэхэщакIохэм зыфагъэуцужьырэр.
КIэлэеджакIохэм апае культурэ-гъэсэныгъэ программэ гъэшIэгъон зэхагъэуцуагъ. Лекциехэр, мастер-классхэр, квестхэр ыкIи творческэ зэIукIэгъухэр афызэхащэщтых. Адыгеим итарихъ, къэшъон искусствэм, адыгэ генеалогием ыкIи тишъолъыр итопонимикэ афэгъэхьыгъэ шIэныгъэхэр арагъэгъотыщтых. Адыгэхэм язекIокIэ-шIыкIэхэм, орнаментхэм нахь игъэкIотыгъэу нэIуасэ афэхъущтых. Фильмэ зэфэшъхьафхэр къафагъэлъэгъощтых, зэлъашIэрэ шIэныгъэлэжьхэм, искусствэм иIофышIэхэм, журналистхэм, нэмыкIхэм зэIукIэгъухэр адыряIэщтых. Театральнэ ыкIи литературнэ мастер-классхэр, лъэпкъ ыкIи спорт джэгукIэ зэфэшъхьафхэр афызэхащэщтых. Адыгэ шхынхэм яшIын, дышъэидэм, бисерым хэшIыкIыгъэным ыкIи нэмыкIхэм пшъэшъэжъыехэр афагъэсэщтых, кIалэхэми яIэпэIэсэныгъэ хагъэхъощт.
КIэлэеджакIохэм адыгэ хабзэр зэрэзэрагъэшIэщтым дакIоу къэшъощтых, орэдхэр къаIощтых. КIэлэцIыкIухэр нэIуасэ зэфэхъущтых, адыгэ джэгу афызэхащэщт.
Адыгэ къэралыгъо университетым адыгабзэм фэгъэхьыгъэ егъэджэн ыкIи егъэджэн-методическэ IофшIэн ин щызэшIуахы. Апшъэрэ еджапIэм икIэлэегъаджэхэр ягъусэхэу адыгэ культурэр, Адыгеим итарихъ къизыIотыкIырэ тхылъхэр къыдагъэкIых.
АКъУ-м адыгэ филологиемрэ культурэмрэкIэ ифакультет игукъэкIыкIэ 2019-рэ илъэсым къыщегъэжьагъэу «Адыгэ диктант» республикэм щатхы. ГъэрекIо апэрэу Жэнэ Къырымызэ илитературнэ произведениехэм афэгъэхьыгъэ дунэе зэнэкъокъу зэхащагъ, хэгъэгуи 5-мэ ыкIи Урысыем ишъолъыр 35-м ялIыкIохэр ащ хэлэжьагъэх.
Адыгэ къэралыгъо университетым ипресс-къулыкъу.