ФутболымкIэ Урысыем и Кубок икъыдэхын хэлэжьэрэ командэхэм зичэзыу ешIэгъухэр яIагъэх. Мыекъопэ «Зэкъошныгъэр Краснодар краим ипсэупIэу Павловскэм икомандэу «Кубань Холдинг» зыфиIорэм IукIагъ ыкIи текIоныгъэр къыдихыгъ. Ащ ишIуагъэкIэ зэнэкъокъум щылъыкIотагъ.

Республикэ стадионым щыкIогъэ зэIукIэгъур телеканалэу «Матч ТВ» зыфиIорэм къыгъэлъэгъуагъ. Командэхэм ухьазырыныгъэ дэгъу къагъэлъэгъуагъ, ау Мыекъуапэ ифутболистхэр нахь лъэшыгъэх, Iэгуаор къэлап­чъэм дадзэным ахэр нахь пэблэгъагъэх. Я 38-рэ такъикъым «Зэкъошныгъэм» пчъа­гъэр къызэIуихыгъ, Iэгуаор къэлапчъэм дэзыдзагъэр Джабраил Кадиевыр ары.

Апэрэ таймым ыуж командэхэр нахь псынкIэу ешIэхэу аублагъ, футболистхэм зэгурыIоныгъэ азыфагу илъэу ыпэкIэ илъыщтыгъэх. Ау ятIонэрэу Iэгуаор къэлапчъэм дэзыдзэн зылъэкIыгъэр «Зэкъошныгъэр» ары. Я 58-рэ такъикъым пчъагъэр 2:0 хъугъэ. ХьакIэхэр ащ езэгъыгъэхэп, яешIакIэ нахь агъэлъэшыгъ, ау къэлапчъэм Iэгуаор къыдадзэн алъэкIыгъэп. Мы мафэм тикомандэ хэт ухъумакIохэр ыкIи къэлэпчъэIутэу Валерий Ореховыр дэгъу дэдэу ешIагъэх. ЗэIукIэгъур 2:0-у аухыгъ. Адыгеим икомандэ ыпэкIэ лъэкIуатэ.

ФутболымкIэ Урысыем и Кубок икъыдэхын фэгъэхьыгъэ зичэзыу ешIэгъур «Зэкъошныгъэм» Мыекъуапэ щыриIэщт, ар Ростов-на-Дону икомандэу «СКА-м» IукIэщт.