Щынэгъончъэныр анахь шъхьаI
Терроризмэм, ащ епхыгъэ къэбар нэпцIэу агъэIухэрэм апэшIуекIогъэным фэгъэхьыгъэ Iофтхьабзэ тыгъуасэ Мыекъуапэ щызэхащагъ.
Общественнэ-политическэ мэхьанэ зиIэ Iофтхьабзэу къэблагъэхэрэм япэгъокIэу цIыфхэр къэухъумэгъэнхэмкIэ, общественнэ чIыпIэхэр щынэгъончъэнхэмкIэ IофшIэнэу агъэцакIэрэм къытегущыIагъ Мыекъуапэ терроризмэм пэшIуекIогъэнымкIэ икомиссие иаппарат ипащэу Александр Ермиловыр.
УФ-м и Президентэу Владимир Путиным иунашъокIэ Урысыем и Къыблэ ыкIи Гупчэ Федеральнэ шъолъырхэм ясубъектхэм ащыщхэр терроризмэм пэшIуекIогъэнымкIэ гъэлъэшыгъэ шIыкIэм ишапхъэ техьагъэх. Ащ Адыгэ Республикэри къахеубытэ.
Терроризмэм пэшIуекIогъэным фытегъэпсыхьэгъэ Iофтхьэбзэ зэфэшъхьафхэр республикэм щызэхащэх.
— Къэралыгъо быракъым и Мафэ зэрифэшъуашэу Мыекъуапэ щыхэдгъэунэфыкIыгъ. Мы Iофтхьабзэр щынэгъончъэу зэхэщэгъэным фэшI къулыкъу зэфэшъхьафхэм алъэкI къагъэнагъэп. Джы гурыт еджапIэхэм зэкIэми Iоныгъом и 1-м мэфэкI Iофтхьабзэхэр ащыкIощтых. Гъэсэныгъэм организацие 72-рэ межведомственнэ комиссием ыуплъэкIугъэх, къэрэгъулэхэм гущыIэгъу афэхъугъэх. ШышъхьэIум и 31-м джыри зэ хьэхэр ягъусэхэу ауплъэкIужьыщтых. МэфэкI мафэм АР-м хэгъэгу кIоцI IофхэмкIэ и Министерствэ, Росгвардием икъулыкъушIэ 160-мэ Iоф ашIэщт. Терроризмэм пэшIуекIогъэным къыдыхэлъытагъэу гурыт еджапIэхэм гъэлъэшыгъэ шIыкIэм тетэу Iоф ашIэщт. ОшIэ-дэмышIэ Iоф къызыхъукIэ макъэ къызэрагъэIущт кнопкэр еджапIэ пэпчъ иI, видеокамерэхэри ачIэт. Джы унэе къэрэгъул организациехэм яIофышIэхэр ары гъэсэныгъэм иучреждениехэм аIутхэр, ахэм егъэджэн зэфэшъхьафхэр афызэхащэх, — къыIуагъ Александр Ермиловым.
Джащ фэдэу къалэу Мыекъуапэ и Мафэ ихэгъэунэфыкIын игъэкIотыгъэу зызэрэфагъэхьазырырэр ащ къыIуагъ. Ар Iоныгъом и 2-м тефэ. Полицием икъулыкъушIэ 280-рэ, Росгвардием иIофышIэ 44-рэ щынэгъончъэным лъыплъэщтых. Хэдзынхэр зэрифэшъуашэу республикэм щызэхэщэгъэнхэм анаIэ тырагъэтыщт.
Терроризмэм фэгъэхьыгъэ къэбар нэпцIхэр зыгъэIухэрэм пшъэдэкIыжьэу арагъэхьырэм къытегущыIагъ АР-м хэгъэгу кIоцI IофхэмкIэ и Министерствэ экстремизмэм пэшIуекIогъэнымкIэ и
Гупчэ илIыкIоу ГутIэ Рэмэзан. Ащ къызэриIуагъэмкIэ, мы Iофыгъор гумэкIыгъо шъхьаIэхэм ащыщ, ар дэгъэзыжьыгъэным фэшI цIыфхэм пэшIорыгъэшъ Iофтхьабзэхэр афызэхэщэгъэнхэ фае.
— Терроризмэм фэгъэхьыгъэ къэбар нэпцIхэр зыгъэIухэрэр къэбгъотынхэр, къэуубытынхэр IэшIэхэп, сыда пIомэ ахэм дунэе хъытыур къызфагъэфедэ. Арэу щытми, мы лъэныкъом епхыгъэ уголовнэ Iофи 7 къызэIутхыгъ. Мыщ фэдэ бзэджэшIагъэ зезыхьэхэрэм япшъэдэкIыжь зэфэшъхьаф. Тазырэу атыралъхьэрэр сомэ мин 200 — 500-м, мин 800-м, джащ фэдэу хьапс Iоф къыхэкIын е тазырыр сомэ мин 700-м къыщегъэжьагъэу миллионым нэсын алъэкIыщт. Ащ фэдэ бзэджэшIагъэхэр Урысыем ит гурыт еджапIэхэм гъэрекIо ащагъэунэфыгъэх. Адыгеими ащ фэдэ хъугъэ-шIагъэхэр къыщыхъугъэх. БзэджашIэхэр дгъэунэфыгъэх, ахэм къалэжьыгъэ пшъэдэкIыжьыр ахьыщт. Мы гумэкIыгъор дэгъэзыжьыгъэным фэшI къулыкъушIэхэм чанэу Iоф ашIэ — еIо ГутIэ Рэмэзан.
Iофтхьабзэм икIэух журналистхэм упчIэхэр къатыгъэх, игъэкIотыгъэ джэуапхэри агъотыжьыгъэх.
ДЕЛЭКЪО Анет.
Сурэтыр: Iэшъынэ Аслъан.