АКъУ-м истудентэу Бэгъ Аслъан университет спортым и Дунэе фестивалэу зэхащагъэм къыдыхэлъытагъэу дзюдомкIэ зэнэкъокъухэм ятIонэрэ чIыпIэр къащыдихыгъ.

[caption id="attachment_137981" align="aligncenter" width="800"] Сурэтыр: АКъУ[/caption]

Тиспортсмен килограмми 100-м нэс къэзыщэчыхэрэм якуп щыбэнагъ ыкIи медаль къыхьыгъ. Бэгъ Аслъан спортым имастер хъунымкIэ кандидат, АКъУ-м июридическэ факультет иящэнэрэ курс ис. Зэнэкъокъухэм ар афэзыгъэхьазырыгъэр Адыгеим изаслуженнэ тренерэу Беданэкъо Рэмэзан.

Тиспортсмен Урысыем ихэшыпыкIыгъэ командэ хэт, ащ джащ фэдэу хахьэх тикъэралыгъо ит апшъэрэ еджэпIэ 31-мэ ялIыкIохэр. ДзюдомкIэ медальхэм афэбанэх Афганистан, Армением, Белоруссием, Кубэм, Иран, Ирак, Казахстан, Киргизием, Монголием, Сербием, Таджикистан ыкIи Венесуэлэм яспортсменхэр.

Университет спортым и Дунэе фестиваль шышъхьэIум и 19-м къыщегъэжьагъэу и 31-м нэс Свердловскэ хэкум щыкIощт. Къэралыгъо 36-мэ ялIыкIо 2300-рэ ащ хэлажьэх. Ахэм БРИКС-м, ШОС-м, СНГ-м ахэхьэрэ хэгъэгухэр къагъэлъагъох. Зэнэкъокъухэм ахэлажьэхэрэм бадминтонымкIэ, баскетболымкIэ (3х3), боксымкIэ, волейболымкIэ, дзюдомкIэ, футбол цIыкIумкIэ, самбэмкIэ, есынымкIэ, теннис цIыкIумкIэ, спорт бэнэнымкIэ, теннисымкIэ, тхэквондомкIэ, художественнэ гимнастикэмкIэ заушэтын алъэкIыщт.

Адыгэ къэралыгъо университетым ипресс-къулыкъу.