«СКА-м» (Ростов-на-Дону), СССР-м ихэшыпыкIыгъэ командэ ахэтыгъэ Юрий Шикуновым ишIэжь фэгъэхьыгъэ зэнэкъокъум хэлэжьагъ Мыекъуапэ щыщ футболистыр. Ар командэу «Кубань» иветеранхэм ахэтыгъ.

Юрий Шикуновыр тикъэралыгъо щызэ­лъашIэрэ футболист. 1964-рэ илъэсым Европэм и Кубок икъыдэхын фэгъэхьыгъэ зэнэкъокъум ыкIи 1966-рэ илъэсым СССР-м ичемпионат ятIонэрэ чIыпIэр къащыдихыгъ.

Турнирым кIэщакIо фэхъугъэх Юрий Иван ыкъом игупсэхэр ыкIи иIахьылхэр, Ростов хэкум футболымкIэ и Федерацие, къалэу Азов иадминистрацие.

Зыныбжь илъэс 50-м ехъугъэхэм афызэхащэгъэ зэнэкъокъум командиплI хэлэжьагъ. Таганрог, Донецкэ, Элиста ыкIи Краснодар краим яфутболистхэр ары зэIукIа­гъэхэр. Турнирыр гъэшIэгъонэу, гум къи­нэжьэу рагъэкIокIыгъ. Командэу «Кубань» хэтыгъ ыкIи ешIэкIэ дахэ къыгъэлъэгъуагъ республикэм щыщ Айтэч Руслъан.

«Кубань» щешIагъэх: Айтэч Руслъан, Сергей Илькун, Андрей Калашниковыр, Геннадий Каломен, Андрей Калюжнэр, Александр Пироженкэр, Владимир Нови­ковыр, Сергей Ревенкэр, Игорь Репяха, Дмитрий Сидоренкэр, Владимир Шипиловыр, джащ фэдэу пащэхэу Сергей Горюновымрэ Александр Плошникрэ.

Футболистхэм аныбжь илъэс 50-м ехъугъ нахь мышIэми, физическэ ухьазырныгъэ дэгъу къагъэлъэгъуагъ, зэгурыIоныгъэ азыфагу илъэу джэгугъэх.

Зэнэкъокъум иапэрэ мафэ «Кубань» командэу «Шахтер» (Донецк) IукIагъ ыкIи 2:1-у текIоныгъэр къыдихыгъ. Iэгуаор къэлапчъэм дэзыдзагъэхэр В. Шипиловымрэ С. Илькунрэ. Таганрог ифутболистхэм Элис­та къышIуахьыгъ, пчъагъэр — 1:0.

ЯтIонэрэ мафэм Краснодар краим икоман­дэ «Уралан» дешIагъ ыкIи текIоныгъэр къы­дихыгъ, зэIукIэгъур 3:0-у аухыгъ. Таганрог ифутболистхэр «Шахтер» текIуагъэх, пчъагъэр — 4:0.

Ящэнэрэ мафэм финал зэIукIэгъухэр щыIагъэх пIоми ухэукъощтэп. Донецкэ илIыкIохэр Элиста ифутболистхэм атекIуагъэх. Апэрэ чIыпIэм икъыдэхын фэбэнагъэх Краснодар ыкIи Таганрог якомандэхэр. Мыхэр зызэрэшIэхэрэр бэшIагъэ, аужырэ илъэс 20 фэдизым Къыблэ федеральнэ шъолъырым щызэхащэрэ зэнэкъокъухэм ахэлажьэх, анахь дэгъу хъунхэр сыдигъуи япшъэрылъ шъхьаI. Гъатхэм «Кубань» Къыблэ федеральнэ шъолъырым ичемпион хъугъэ. Коман­дэхэм язэIукIэгъу гъэшIэгъонэу кIуагъэ, те­кIоныгъэр къыдэзыхыщтыр къэшIэгъоягъ. Ау мызыгъэгум

Таганрог ифутболистхэм янасып къыхьыгъ, ахэм зэ Iэгуаор къэлап­чъэм дадзагъ, ешIэгъур аухыфэ а пчъагъэр зэхъокIыгъэп, 1:0-у аухыгъ.

Илъэсэу тызхэтым ичъэпыогъу ветеранхэм якомандэхэр къалэу Анапэ щызэIукIэщтых. Ахэр Урысыем ичемпионат хэлэжьэщтых.