Къоджэ еджапIэхэм Iоф ащашIэщт
Къоджэ псэупIэхэм адэт гурыт еджапIэхэм кIэлэегъэджэ ныбжьыкIэхэм Iоф ащашIэным фытегъэпсыхьэгъэ зэзэгъыныгъэм мы мафэхэм научнэ тхылъеджапIэм щыкIэтхагъэх.
[caption id="attachment_137842" align="aligncenter" width="800"]
Сурэтыр: АКъУ[/caption]
Адыгэ Республикэм гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр, Адыгэ къэралыгъо университетым иректорэу Мамый Даутэ ыкIи пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Школково» зыфиIорэм игенеральнэ пащэу Максим Коваль тхьапэм зэдыкIэтхагъэх.
Къуаджэхэм адэт гурыт еджапIэхэм кIэлэегъаджэхэр зэрафимыкъухэрэр къыдалъытэзэ мы проектыр зэхащагъ.
Мы сэнэхьатым зыфэзыгъэсэрэ кIэлэегъэджэ ныбжьыкIэхэр нахьыбэ шIыгъэнхэр, ахэм опытэу аIэкIэлъым хэгъэхъогъэныр, технологиякIэхэр щыIэныгъэм щыпхырыщыгъэнхэр ары зэхэщакIохэм пшъэрылъ шъхьаIэу зыфагъэуцужьырэр. Проектыр «Приоритет 2030» зыфиIорэм къыдыхэлъытагъэу щыт.
Адыгэ къэралыгъо университетым иапшъэрэ курсхэм ащеджэрэ студентхэу кIэлэегъэджэ сэнэхьат зэзыгъэгъотыхэу, ащ дакIоу еджэнымрэ IофшIэнымрэ зэдэзыхьы зышIоигъохэр къуаджэмэ адэт еджапIэхэм агъэкIощтых. Ахэм район администрациехэр IэпыIэгъу къафэхъущтых, зыщыпсэущтхэр къафагъотыщтых, ащ ыпкIэ афатыщт.
[caption id="attachment_137843" align="aligncenter" width="800"] Сурэтыр: АКъУ[/caption]
— Специалист ныбжьыкIэхэм IэпыIэгъу тафэхъуным тынаIэ тет. Зэнэкъокъоу «ЕджэпIакIэм пае — кIэлэегъэджакIэхэр» зыфиIорэр илъэс къэс зэхэтэщэ. КIэлэегъаджэхэм ясэнаущыгъэ зыщыхагъэхъорэ гупчэм методическэ мастерскоеу «Школа молодого педагога» зыфиIорэр къыщызэIутхыгъ. Мы проектым ишIуагъэкIэ гурыт еджапIэхэм аIут кIэлэегъэджэ ныбжьыкIэхэм япчъагъэ нахьыбэ хъунэу, гъэсэныгъэм исистемэ хэхъоныгъэхэр ышIынхэу тэгугъэ, — къыIуагъ Евгений Лебедевым.
Университетым «Школково» зыфиIорэ гъэсэныгъэ программэр ыгъэхьазырыгъ. ПэIудзыгъэ шIыкIэр шIуагъэ къытэу къызфэгъэфедэгъэныр ащ къыдыхэлъытагъ.
— КIэлэегъаджэхэм ягъэхьазырын анахь лъэныкъо шъхьаIэхэм ащыщ. Тиапшъэрэ еджапIэ мы сэнэхьатым епхыгъэ гъэсэныгъэ программэ 30 иI. Апэрэ курсым къыщегъэжьагъэу профильнэ предметхэм анэмыкIэу, психологиер, проектнэ IофшIэныр, къэбарлъыгъэIэс технологиер арагъашIэ. Цифрэ шIыкIэм мэхьанэ ин етэты, ар яIофшIэнкIэ агъэфедэнэу тэгъасэх. Проектэу «Педагогический десант. Учитель для Адыгеи» зыфиIорэм кIэлэегъэджэ ныбжьыкIэхэр хэлажьэх, — къыIуагъ ректорым.
Проектым хэлэжьэрэ студентхэм еджэгъу илъэсым къыкIоцI стипендие тедзэ аратыщт, ар гъэсэныгъэ порталым имылъку къыхэхыгъэщт.
— Гъэсэныгъэ проектэу «Школково» зыфиIорэм къыдыхэлъытагъэу студентхэм къахьырэ лэжьапкIэм фэдиз стипендие тедзэ аратыщт. Методическэ егъэджэнхэр афызэхащэщтых ыкIи IэпыIэгъу афэхъущтых. Анахь дэгъоу зыкъэзыгъэлъагъохэрэм IофшIапIэ къафагъотыщт. АшIэрэм елъытыгъэу сомэ мин 20-м къыщегъэжьагъэу мини 100-м нэс мазэ къэс онлайн-еджапIэм къыщалэжьын алъэкIыщт. Проектыр нэмыкI шъолъырхэми ащыдгъэфедэнэу тегупшысэ, — къыIуагъ Максим Коваль.
Проектэу «Педагогический десант. Учитель для Адыгеи» зыфиIорэм хэлэжьэрэ нэбгырэ пэпчъ Адыгэ къэралыгъо университетым, Iоф зыщишIэщт гурыт еджапIэм, «Школково» зыфиIорэм япхыгъэу лэжьэщт, IэпыIэгъу ыгъотыщт.
2023 — 2024-рэ илъэс еджэгъум АКъУ-м истудент 20 проектым хэлэжьэщт. Ахэр хьисапымкIэ, урысыбзэмкIэ, биологиемкIэ, химиемкIэ, физикэмкIэ ыкIи социальнэ педагогикэмкIэ сэнэхьат зэзыгъэгъотырэ ныбжьыкIэх.
ДЕЛЭКЪО Анет.