СНГ-м хэхьэрэ къэралыгъохэм яспортсменхэр Беларусь щызэнэкъо­къугъэх. Дунэе мэхьанэ зиIэ Iофтхьабзэм хэлэжьагъ ыкIи Адыгеир къащигъэлъэгъуагъ Адыгэкъалэ испортсменэу Хьатхъохъу Рустам. Республикэм илIыкIо медалитIу къыхьыгъ ыкIи тишъолъыр щыпсэухэу спортыр зыгу рихьыхэрэр ыгъэгушIуагъэх.Зыныбжь илъэс 18-м шIомыкIыгъэхэм якуп Рустам щыбэ­нагъ.

Къэралигъуи 9-мэ яспортсмен 12 мыщ хэлэжьагъэх. ТикIалэ зэкIэмкIи гъогогъуи 4 бэнагъэ. Апэрэм Туркменистан къэзыгъэ­лъэгъорэ Батыр Мердановым щытекIуагъ, ащ ыуж чIыпIэ дзюдоистэу Антон Дубовик къышIуи­хьыгъ. Финалныкъом Узбекистан щыщ Азамат Аблакуловым щы­IукIагъ, ау текIон ылъэкIыгъэп. Мы дзюдоистыр ары апэрэ чIыпIэр къыдэзыхыгъэр. Адыгеим илIыкIо ящэнэрэ хъугъэ.

Урысыем ихэшыпыкIыгъэ командэ текIоныгъэр къыдихыным Хьатхъохъу Рустам иIахьышIу хилъхьагъ, дышъэ медаль къы­хьыгъ. ЯтIонэрэ чIыпIэр Казахстан къыфагъэшъошагъ, Беларусыр ящэнэрэ хъугъэ.

СНГ-м хэхьэрэ къэралы­гъохэм яя II-рэ Джэгунхэр Беларусым икъэлэ 11-мэ ащыкIуагъэх. МэфипшIым къы­кIоцI рагъэкIокIыгъэ зэнэкъо­къухэм къэралыгъо 22-мэ яспортсмен мини 2-м ехъу хэлэжьагъэх. Урысыем ихэшыпыкIыгъэ командэ дышъэ медали 149-рэ, тыжьын — 89-рэ, джэрз — 50 къыхьыгъ. ЯтIонэрэ чIыпIэм щыт Беларусым медаль 236-рэ, ящэнэрэ хъугъэ Узбекистан испортсменхэм медали 106-рэ къафагъэшъошагъ.