ТекIоныгъэм пэблагъ
Лъэс кIонымкIэ зэнэкъокъоу «КIорэ цIыфыр» зыфиIорэм тиреспубликэ къыщызыгъэлъэгъорэ командэу «Мыекъуапэ 01-р» текIоныгъэр къыдихыным пэблагъ.
Зэнэкъокъухэр мэфэ 16-рэ кIуагъэх, джырэ уахътэм зэфэхьысыжьхэр ашIых. Мыщ хэлажьэхэрэм зэкIэми физическэ ухьазырыныгъэ дэгъу зэряIэр джыри зэ къаушыхьатыжьыгъ.
Къэралыгъом ишъолъырхэм якомандэ 487-м ащыщэу 11-мэ очко пчъагъэу рагъэкъугъэр зэфэдиз. Ау ахэм ащыщэу тIур ары командэм хэтын фэе нэбгырэ 20-р къэзыгъэлъэгъуагъэр. Зэфэхьысыжьхэр ашIыхэ зыхъукIэ ахэр апэ рагъэшъых.
Мыекъуапэ икомандэ хэтхэр зэнэкъокъум дэгъоу хэлэжьагъэх, зэрифэшъуашэу Iоф зыдашIэжьыгъ. Нэбгырэ пэпчъ лъэбэкъу мин 400 къыкIугъ. Республикэм илIыкIохэм текIоныгъэр къызыдахыкIэ ар зэкIэлъыкIоу ятIонэрэщт.
Илъэсэу тызыхэтым ищылэ мазэ зэхащэгъэ проектэу «Муниципалитет пэпчъ — псауныгъэм имаршрут» зыфиIорэм къыдыхэлъытэгъэ зэнэкъокъухэм Мыекъуапэ икомандэ текIоныгъэр къащыдихыгъагъ.