Дунэе форумым хэлэжьагъэх
2023-рэ илъэсым шышъхьэIум и 10-м къыщегъэжьагъэу и 12-м нэс Москва, Третьяковскэ галереем, я II-рэ Дунэе кIэлэцIыкIу культурнэ форум щырекIокIыгъ.
[caption id="attachment_137594" align="aligncenter" width="800"] Сурэтыр: «Мыекъуапэ инэфылъэхэм» яхъарзынэщ.[/caption]Мыщ ишIуагъэкIэ Урысыемрэ нэмыкI хэгъэгухэмрэ арыс кIэлэцIыкIу сэнаущхэм культурэмрэ искусствэмрэ алъэныкъокIэ дунаимкIэ гъэхъагъэу щыIэхэм нэIуасэ зафашIын амал яIагъ. КIэлэцIыкIухэр къэралыгъо, общественнэ IофышIэхэм, культурэм илIыкIохэм, кIэлэегъэджэ цIэрыIохэм аIукIагъэх.
Урысыем ишъолъыр 89-мэ ыкIи IэкIыб къэралыгъо 13-мэ къарыкIыгъэ кIэлэцIыкIухэу зыныбжь 12-м къыщегъэжьагъэу 17-м нэсыгъэхэр форумым щызэIукIагъэх.
Адыгеим илIыкIохэри ащ хэлэжьагъэх.
КъэшъокIо купэу «Мыекъуапэ инэфылъэхэм» ипащэу, Урысыем культурэмкIэ изаслуженнэ IофышIэу, Адыгеим изаслуженнэ артистэу Нэныжъ Айдэмыр зэIукIэр зэрэкIуагъэм тыщигъэгъозагъ.
«Проектым къыдыхэлъытагъэу апэрэ мафэм, культурэм иIофышIэхэм зэIукIэхэр адыряIагъ, лекциехэр, экскурсиехэр ыкIи нэмыкI Iофтхьабзэхэр зэхащагъэх. Форумым ипрограммэ къэралыгъо, общественнэ IофышIэхэр, культурэм илIыкIохэр, кIэлэцIыкIу къэшъокIо куп 12 хэлэжьагъэх. Ахэм тэ зэу тащыщыгъ. КIэлэцIыкIухэр ныбджэгъу зэфэхъугъэх, ахэм экспертхэм упчIэхэр аратынхэ амал яIагъ. Хореограф цIэрыIоу Егор Дружининым имастер-классэу «Непэрэ мафэм диштэрэ къэшъуакIэхэр» зыфиIорэм ашIогъэшIэгъонэу хэлэжьагъэх. «Мыекъуапэ инэфылъэхэм» зэфэхьысыжь концертым адыгэ къашъоу «Ислъамыер» къыщашIыгъ.
«Налмэсым» ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ шъолъыр язаслуженнэ артистэу, Адыгеим инароднэ артистэу Хъоджэе Аслъан мы Iофтхьабзэм мэхьанэшхо ритыгъ.
«Тилъэпкъ икультурэ, ишэн-хэбзэ зэхэтыкIэ тыкъытегущыIагъ. «Налмэсым» къышIырэ къашъохэм, ащ ятарихъ гъуазэ фэтшIыгъэх. Мастер-классэу «Адыгэ къашъохэр» зыфиIорэр къядгъэлъэгъугъ. АщкIэ IэпыIэгъу къытфэхъугъэх ансамблым икъэшъуакIохэу Дагъыстан изаслуженнэ артистэу Ахътэо Бэлэрэ Хъоджэе Иландэрэ. Къытэплъыгъэхэр къытфэрэзагъэх».