«Синдикэм» имэфэкI
АР-м щызэлъашIэрэ къэшъокIо купэу «Синдикэм» илъэс 15 зикIыхьэгъэ творческэ гъогур къыкIугъ.
АР-м изаслуженнэ артисткэу, Чэчэн Республикэм искусствэхэмкIэ изаслуженнэ IофышIэу, УФ-м и Правительствэ итынэу «Душа России» зыфиIорэр къызфагъэшъошагъэу Едыдж Викторие къэшъокIо купэу «Синдикэм» изэхэщакIу. Краснодар щызэхащэщт зэнэкъокъум апэрэ къашъор артистхэм къыщашIыгъагъ. А лъэхъаным амышIэщтыгъэ ныбжьыкIэ купым икъэшъуакIэ цIыфхэм агъэшIэгъуагъ, джащ щыублагъэу купым итворческэ гъогу ригъэжьагъ. Илъэс 15 зэрэхъурэм фэгъэхьыгъэ мэфэкIым «Синдикэм» зызэрэфигъэхьазырырэр «Адыгэ макъэм» зэригъэлъэгъугъ.
— «Синдикэм» итарихъ 2008-рэ илъэсым къыщежьэ, — къыIуагъ Викторие — 2012-рэ илъэсым творческэ объединениеу «Ошъад» зыфиIорэр зэхэтщагъ, ащ пащэ сыфэхъугъ. Адыгеим культурэмкIэ изаслуженнэ IофышIэу, Адыгэ къэралыгъо университетым искусствэхэмкIэ иинститут икафедрэ идоцентэу, кIэлэегъэджэ шIэныгъэхэмкIэ кандидатэу Бастэ Асыет зипэщэ ансамблэу «Ащэмэзымрэ» пщынэо IэпэIасэу, аранжировщикэу Шэуджэн Рустам зипэщэ купэу «Бэгъэуджымрэ» купэу «Синдикэм» къыгохьагъэх. Объединением цIэу иIэщтым бэрэ тегупшысагъэп. А илъэсым Мыекъопэ Iуашъхьэу «Ошъад» зыфиIорэр археологэу Веселовскэм ытIынэу зыригъэжьагъэр илъэс 80 зэрэхъугъэм мы цIэр етпхыгъ. Тикуп къэгъэлъэгъонхэм, мэфэкI зэхахьэхэм, зэнэкъокъухэм, зэфэхьысыжь концертхэм ахэлажьэ. Ащ дакIоу щытхъу тхылъхэр тиIэх, шIухьафтыныбэ къытфагъэшъошагъ.
— МэфэкI Iофтхьабзэхэм къашъохэу «Ислъамый», «Зыгъэлъат», «Убых къафэ», «Къушъхьэм имэкъамэхэр», «Удж-сандракъ» ыкIи нэмыкIхэри къащытшIыщтых. Апэ купыр зызэхэтэщэм къашъоу дгъэуцугъагъэхэр ядгъэлъэгъущтых. «Спутник» зыфиIорэ ныбжьыкIэ купым къышIырэ къашъор къэгъэлъэгъоным хэдгъэхьащт, къэшъуакIомэ яшъошакIэхэр ядгъэлъэгъущтых. ТиорэдыIо цIэрыIоу къытфэкIощтхэм зэхахьэр къагъэбаищт», — къыIуагъ Викторие.
Викторие Адыгеим ищытхъу тилъэпкъ къашъохэмкIэ зэрэдунаеу зэлъаригъашIэ шIоигъу. Ащ игъэхъагъэхэм ахегъахъо, иIофшIэн лъэшэу егугъу. «Синдикэр» зызэхащагъэм имэфэкI Iоныгъом игъэкIотыгъэу хагъэунэфыкIыщт.
Лъэпшъыкъо Фатим. Сурэтыр: А. Iэшъын