ГукъэкI дахэм узэфищэныр, зы гупшысэкIэ узэдиштэныр тхъагъо. ШIуагъэ къэзытырэ Iофтхьэбзэ зэфэшъхьафхэр ащ къыкIэлъыкIонхэ ылъэкIыщт.

Мы зыгъэпсэфыгъо гъэмэфэ лъэхъаным цIыфхэр зекIо макIох, чIыопсым идэхагъэ зэрагъэлъэгъу, ащкIэ Кавказ шъолъырыр амалышIу. ТичIыналъэ изы къуапэ пэпчъ дэхагъэр щынэхъой. Ащ фэдэу ткъош Къэрэщэе-Щэрджэсым икъушъхьэ зэхэт­хэм зекIо лъэгъо байхэр щыпхырыщыгъэх. Ахэм ащыщ зыгъэпсэфыпIэ чIыпIэу Архъыз.

ЗэIофшIэгъу-зэпшъэшъэгъу­хэмкIэ ащ тызэдэкIонэу тыгу къэкIыгъ. ЗекIозещэхэу Хьэсанэкъо зэшъхьэгъусэхэу Анзауррэ Сулетэрэ къыддырагъашти чIыпIэм тынагъэсыгъ. ГукъэкIыжь дахэ тфэхъугъэ мафэ Архъыз къушъхьэ тIуа­кIэм къыщыдгъэкIуагъ. Анахьэу тыгу къинэщтыр лъэпкъ шъуашэхэр тщыгъэу тызхэлэжьэгъэ Iофтхьабзэр ары. IэпэIасэу Бэджэкъо Бэлэ, ари тизекIо куп хэтыгъ, игукъэкI дах. Къушъхьэ шыгухэр къэлъа­гъоу, ыдыгъэ шъуашэхэр тщыгъэу сурэт­хэр зытетхыгъэмэ дэгъугъэу Бэлэ игупшысэ къызеIом, лъэшэу тыкъэгу­шIуагъ ыкIи тигуапэу зэрэдгъэцэкIэщтыри къытхэщыпагъ. ЩыI зы еплъыкIэ — адыгэ саер зыщызылъэрэр ыкIи ар къызэкIурэр пшъэшъэ ныбжьыкIэр арэу.

А еплъыкIэр зэблихъу шIоигъоу Бэджэкъо Бэлэ изычэзыу Iофтхьабзэу «Сыдрэ ныбжьи шъуашэр ифэшъуаф» зыфиIорэм кIэщакIо фэхъугъ. Пэсэрэ уахътэм, тижъыхэм лъэпкъ шъуа­шэр ащыгъ зэхъум, пшъэшъэ закъоп ныIа сае зыщызылъэщтыгъэр? Арышъ, Iэпэ­Iасэм игупшысэ тэри дедгъэ­штагъ ыкIи ХьакIэмыз Сусан, Нэгэрэкъо Саниет, ХьакIэмыз Айлэ ыкIи сэры — ТIэшъу Светлан сэе дахэхэр тигуапэу зыщытлъагъэх. Къыхэзгъэщын — лъэпкъ шъуа­шэр тифэшъуаш!

ТIэшъу Светлан. Адыгеим изаслуженнэ журналист.