ШышъхьэIум и 5-м къыщегъэжьагъэу и 8-м нэс Мыекъопэ къэзэкъ отделымрэ Адыгеимрэ Пшызэ шъолъыррэ яныбжьыкIэ къэзэкъ Союзхэм ахэтхэр дзэ-шъоф зыгъэсэн-егъэджэнхэм ахэлэжьагъэх, лагерыр Адыгэ Республикэм и Мыекъопэ район щыIэ дзэ частым щагъэпсыгъагъ.

ЗэкIэмкIи Iофтхьабзэм къэзэкъ 230-рэ, ныбжьыкIэ 270-рэ хэлэжьагъэх. Ахэр къэзэкъ ка­детскэ корпусхэм, къэзэкъ классхэм ащеджэхэрэр, дзэ-патриотическэ клубхэм ахэтхэр, джырэблагъэ дзэ къулыкъум кIонхэу щытхэр ары.

МэфиплIым къыкIоцI лагерым щыIагъэхэр шэпхъэ гъэнэфа­гъэм тетэу псэугъэх, щынэгъончъэн Iофхэр агъэцэкIагъэх.

Пшызэ къэзэкъыдзэм иатаманэу, къэзэкъ генералэу Алек­сандр Власовыр дзэ-шъоф лагерыр къызыщызэIуахырэ ма­фэм епхыгъэ зэхахьэм хэлэ­жьагъ. Ащ лагерыр къып­лъы­хьагъ, хэушъхьафыкIыгъэ дзэ операцием хэтыгъэ къэзэкъхэм ыкIи атаманхэм зэдэгущыIэ­гъухэр адишIыгъэх, уахътэу къафыхахыгъэр шIуагъэ къытэу агъэкIонэу зэкIэми афэ­­лъэ- Iуагъ.

Программэу къэзэкъмэ къафагъэхьазырыгъэр къызэрыкIуа­гъэп: дзэм къаща­шъхьэпэщт Iофыгъохэм зафа­гъасэщтыгъ, медицинэ IэпыIэгъу зэрарагъэ­кIыщтыр зэрагъашIэщтыгъ, спорт зэнэкъокъухэр рагъэкIокIыгъэх. Ащ къыкIэлъы­кIоу командэмэ язэхэщэн зэ­рэкIорэ шIыкIэм къэзэкъхэр щагъэгъуазэщтыгъэх ыкIи тарихъыр, Мыекъопэ къэзэкъ отделым иIофшIэн зэрэзэхащэрэр къафаIуатэщтыгъ. Джащ фэдэу хэушъхьафыкIыгъэ дзэ операцием хэлэжьагъэмэ зэ­IукIэгъухэр лагерым щыIэхэм адашIыщтыгъ, Хэгъэгу зэошхом фэгъэхьыгъэ къэгъэлъэгъоным нэIуасэ зыфашIыгъ.

Пшызэ шъолъыр гупчэу «Баско» зыцIэу къалэу Геленджик щыIэм илIыкIохэу атаманэу Сергей Тарховыр зипэщагъэхэр лагерым къеблэгъагъэх, ахэм фланкировкэмкIэ, Iэпшъэ бэнэнымкIэ ыкIи шъэжъые зэонымкIэ яIэпэIэсэныгъэ къагъэлъэгъуагъ.

Дзэ полигоным щэрыон Iоф­тхьабзэу щызэхащагъэр кIэлэцIыкIумэ лъэшэу ашIогъэшIэгъо­ныгъ, анахьэу дзэм къулыкъу щыхьыгъэным зыныбжьыкIэ къекIолIагъэхэм ар къазэ­ра­шъхьэ­пэщтым щэч хэлъыгъэп. Дзэ-шъоф лагерым иIофшIэн изэфэхьысыжьхэр зэхахьэм щашIыгъэх. Ащ къекIолIагъэх Адыгэ Республикэм иминистрэхэм я Кабинет иадминистрацие ипащэу Владимир Свеженец, Мыекъопэ къэзэкъ отделым инахьыжъхэм я Совет итхьаматэу Владимир Баранцовыр, динлэжьэу Роман Малинкэ, Санкт-Перербург щыщ динлэжьэу Георгий Сычевыр.

— Къэзэкъ нахьыжъхэмрэ ныбжьыкIэхэмрэ зэрэзэгъу­сэхэр, лIэужхэр зэрэзэпхыгъэхэр зэрэслъэгъурэм се­гъэгушхо. НыбжьыкIэхэр ары къэкIощт мафэхэм тикъэралыгъо икIэгъэкъоныщтхэр. Сыд фэдэрэ лъэхъани къэзэкъхэр тикъэралыгъо иухъумэкIуагъэх. Непэ, Урысыер нацизмэм Украинэм зыщебэнырэ уахътэм, ар къеушыхьаты. Апшъэрэ Главнокомандующым пшъэрылъ къызэрэтфишIыгъэу, а къэралыгъом нацизмэр идгъэкIодыкIыным, Iашэр IэкIэтыутыным тыпылъ. Тэ арэущтэу хъунэу тыфэягъэп, ау тыкъырафылIагъ. А нацистхэр ары илъэсиим къыкIоцI Донецкэ ыкIи Луганскэ народнэ рес­публикэхэм, Херсонскэ ыкIи За­порож­скэ хэкухэм къязэуагъэхэр. Непэрэ дзэ Iофтхьабзэу ре­жъугъэкIокIыгъэм къегъэлъагъо гъогоу хэшъухыгъэр зэрэтэрэзыр. Зызакъу сыкъызэрэшъуфэлъаIорэр — тихэгъэгу ицIыфыгъэ напэу шъухъунхэу ары, мыщ фэдэ ухьазырыны­гъэр а IофымкIэ къышъушъхьа­пэщт, — къариIуагъ къэзэкъ кIэла­кIэмэ Владимир Свеженецым.

Владимир Павел ыкъом атаманхэм зэрафэразэр игущыIэ­хэм къащыхигъэщыгъ ыкIи къыт­кIэхъухьэрэ ныбжьыкIэхэр патриотхэу зэрагъасэхэрэм фэшI щытхъу тхылъхэр аритыгъэх Эдуард Сашинскэм (Мые­къопэ район),

Евгений Лапиным (Джэджэ район), Данил Антипиным (къалэу Мыекъуапэ), Михаил Клементьевым (Красногвардейскэ район) ыкIи Юрий Блиновым (Кощхьэблэ район).

Зэфэхьысыжьхэм къызэрагъэ­лъэгъуагъэмкIэ, а 1-рэ чIыпIэр ыкIи зэIэпахырэ Кубокыр къыдихыгъэх къалэу Мыекъуапэ ирайон къэзэкъ обществэ исотне (атаманыр подъесаулэу Виктор Остапенкэр), я 2-рэ чIыпIэр

Мыекъопэ район къэзэкъ обществэм ыхьыгъ (атаманым ипшъэрылъхэр зыгъэцакIэрэр Андрей Колесниковыр) ыкIи я 3-рэ хъугъэ Мостовской районым икъэзэкъ обществэ (атаманыр подъесаулэу Сергей Родионовыр).

НыбжьыкIэ командэхэмкIэ апэрэ хъугъэх Пшызэ къэзэкъ ныбжьыкIэмэ я Союз хэхьэрэ Мостовской отделениер (ипащэр Александр Нестеренкэр) ыкIи Адыгеим икъэзэкъ ныбжьыкIэмэ я Союз и Мыекъопэ къэлэ отде­ление (тхьаматэр Данил Антипиныр). Адыгеим икъэзэкъ ныбжьыкIэмэ я Союз итхьаматэу Екатерина Загорулько текIоныгъэ къыдэзыхыгъэмэ япащэмэ кубокхэр аритыжьыгъэх.

Зэнэкъокъу зэфэшъхьафхэм ащытекIогъэ ныбжьыкIэхэри къыхагъэщыгъэх. Ахэм къалэ­жьы­гъэ шIухьафтынхэр Мые­къопэ къэзэкъ отделым идзэ старшинау Александр Даниловым аритыжьыгъэх.

— Сицыхьэ пытэ телъ дзэ- шъоф зыгъэсэн-егъэджэнхэр къэзэкъ ныбжьыкIэмэ агу къызэринэжьыщтхэм мыщ щызэрагъэшIагъэ шIэныгъэхэр тапэкIэ къа­шъхьэпэжьыщтых. Дзэм къулыкъу щахьыным ыпэкIэ зызыщагъэгъозагъэр макIэп, а пстэуми мэхьанэ яI. Дзэ угъоиным ипшъэ­рылъхэр ыгъэцэкIагъэхэу сэлъытэ, — къыIуагъ а 1-рэ линейнэ тарихъ къэзэкъ полкым иесаулэу Виктор Мельниковым. Мыекъопэ къэзэкъ отделым иатаман иIэпыIэгъоу

Екатерина Загорулько. Сурэтхэр авторым тырихыгъэх.