Зэрифэшъуашэу хагъэунэфыкIыгъ
Физкультурникым и Мафэ зэрифэшъуашэу Мыекъуапэ щыхагъэунэфыкIыгъ.
Мыщ кIэщакIо фэхъугъэх физическэ культурэмкIэ ыкIи спортымкIэ Комитетымрэ Адыгэ Республикэм и Олимпийскэ советрэ.
Физическэ культурэм ыкIи спортым иIофышIэ анахь дэгъухэм защыфэгушIогъэхэ IофтхьабзэмкIэ мы мафэр аублагъ. Ащ ыуж «ЩыIэныгъэм илъэбэкъу мини 10» зыфиIорэр рагъэкIокIыгъ, республикэм икъэлэ шъхьаIэ щыпсэурэ нэбгыри 151-рэ ащ хэлэжьагъ.
Джащ фэдэу баскетболымкIэ, теннис инымкIэ, нардхэмкIэ, нэмыкI лъэныкъохэмкIэ зэнэкъокъухэр зэхащагъэх. МэфэкIым къыдыхэлъытэгъэ Iофтхьабзэхэр цIыфхэм агу къинэжьыныр ары зэхэщакIохэм пшъэрылъ шъхьаIэу яIагъэр ыкIи ар къадэхъугъ.