АнаIэ нахь тырадзэным пай
Адыгэ Республикэм и Правительствэ и Унэ культурэмкIэ ыкIи искусствэмкIэ Адыгеим и ЛIышъхьэ дэжь щызэхэщэгъэ Советым изэхэсыгъо щыкIуагъ. Отраслэр цифрэ технологием тещэгъэным, творческэ коллективхэм, культурэм иунэхэу къуаджэхэм адэтхэм яIофшIэн нахьышIоу зэхэщэгъэным япхыгъэ Iофыгъохэм ащ щатегущыIагъэх.
Зэхэсыгъом хэлэжьагъэх депутатхэр, культурэм иучреждениехэм ыкIи творческэ коллективхэм япащэхэр, министерствэм иIофышIэхэр, организациехэмрэ ведомствэхэмрэ ялIыкIохэр.
Республикэм и ЛIышъхьэ зэхэсыгъор къызэIуихызэ, культурэм ылъэныкъокIэ Iоф зышIэрэ пстэуми Адыгеим къэралыгъо гъэпсыкIэ иIэ зыхъугъэм ия 100-рэ илъэс ихэгъэунэфыкIын чанэу зэрэхэлэжьагъэхэм пае зэрафэразэр къыIуагъ.
«Урысыем и Президентэу Владимир Путиным къызэрэхигъэщыгъэмкIэ, къэралыгъом анахь мэхьэнэ ин зэритыхэрэм ащыщ лъэпкъ культурэмрэ шэн-хабзэхэмрэ къэухъумэгъэнхэм иIоф. Тэ Урысыем щыпсэурэ цIыф лъэпкъхэр зэзыпхыхэрэ шIуагъэхэр къэтыухъумэнхэ, ахэм хэхъоныгъэ афэтшIын фае. ТворчествэмкIэ амал анахь инхэр ядгъэгъотынхэ, культурнэ щыIакIэм цIыфхэр нахьыбэу къыхэдгъэлэжьэнхэ фае. А Iофыгъохэм язэшIохынкIэ Адыгеим Iофтхьэбзэ гъэнэфагъэхэр щызэшIотэхых: джырэ уахътэм диштэрэ инфраструктурэр а лъэныкъомкIэ тэгъэпсы», — къыхигъэщыгъ КъумпIыл Мурат. Джырэ уахътэм диштэрэ онлайн-коммуникациехэм ягъэфедэн къытегущыIэзэ республикэм и ЛIышъхьэ къызэрэхигъэщыгъэмкIэ, культурэм ихэхъоныгъэкIэ непэ анахь мэхьанэ зэратыхэрэм ар ащыщ. Культурэм иучреждениехэм технологиякIэхэр яIофшIэнкIэ нахь игъэкIотыгъэу къызыфагъэфедэнхэм, музейхэм, тхылъеджапIэхэм ыкIи нэмыкIхэм япхыгъэ Iофыгъохэу джырэ уахътэм къыпкъырыкIыхэрэр гъэцэкIэгъэнхэм япхыгъэ пшъэрылъхэр ащ къыгъэуцугъэх.
АР-м культурэмкIэ иминистрэу Аулъэ Юрэ къызэрэхигъэщыгъэмкIэ, Адыгеим непэ цифрэ технологиехэр чанэу ыIэ къырегъахьэх. ПэIудзыгъэ шIыкIэм тетэу платформэу «Артефакт» зыфиIорэмкIэ экспозицие зэфэшъхьафхэм джы нэIуасэ зафашIын алъэкIыщт. Платформэу «АртефактымкIэ» экспозициеу «Адыгэхэм якультурэрэ япсэукIэрэ» зыфиIорэм цIыфхэм нэIуасэ зафашIын амал щыIэ хъугъэ.
Къэралыгъо проектэу «Адыгабзэм итарихъ» зыфиIорэм ишIуагъэкIэ бзэшIэныгъэмкIэ Адыгэ Республикэм и Лъэпкъ тхылъеджапIэ ифондхэм къахахыгъэ документ 13 лъэпкъ электрон библиотекэм IэкIагъэхьан алъэкIыгъ. Урысые къэралыгъо тхылъеджапIэм иIофышIэхэми а проектым осэшхо къыфашIыгъ. Джащ фэдэу проектыкIэу «Литературэр сищыIэныгъэ иджэныкъу» зыфиIорэр агъэпсыгъ, Адыгеим джырэ тхакIоу иIэхэр ащ къыхагъэлэжьагъэх. Электрон каталогым изэхэгъэуцон епхыгъэ IофшIэнри макIо.
Проектэу «Пушкинская карта» зыфиIорэм республикэм культурэмкIэ иучреждениехэр зэкIэ къыхэлажьэх. Адыгэ Республикэм и Лъэпкъ театрэ зыпштэкIэ, программэу «Пушкинская карта» зыфиIорэмкIэ хахъоу къыIэкIахьэрэр фэди 3-кIэ нахьыбэ ышIын ылъэкIыгъ. Культурэм иучреждениехэм язэтегъэпсыхьан, Интернетым икъоу лъыIэсынхэм япхыгъэ пшъэрылъыр гъэцэкIэгъэнымкIэ цифровой технологиехэм ягъэфедэни нахь зегъэушъомбгъугъэн фае.
2024-рэ илъэсым культурэм ишъолъыр ыкIи имуниципальнэ учреждениехэм яIофшIэн епхыгъэ къэбар икъу аIэкIэзгъэхьан зылъэкIыщт интернет-ресурсыр зэхащэн мурад яI.
Адыгеим и ЛIышъхьэ лъэныкъо пстэумкIи яшъыпкъэу Iоф ашIэн зэрэфаер къыхигъэщыгъ, мылъку-техникэ лъэныкъомкIэ Iофхэм язытет нахьышIу зэрашIырэм дакIоу творческэ екIолIакIэ зэкIэми афыряIэу, технологиякIэхэр нахь дэгъоу агъэфедэхэзэ, культурнэ хъугъэ-шIагъэхэм цIыфхэр нахь игъэкIотыгъэу къахагъэлэжьэн, кадрэхэм ягъэхьазырын зэрищыкIагъэм тетэу анаIэ тырагъэтын фае.
«Цифрэ технологиехэм яшIуагъэкIэ титеатрэхэм, джащ фэдэу культурэм иунэхэм цIыфэу къякIуалIэрэр нахьыбэ тшIын тлъэкIыщт. Музейхэм, тхылъеджапIэхэм, хъарзынэщхэм, культурэм епхыгъэ псэолъэ зэфэшъхьафхэм ачIэхьанхэм иамал зэкIэми яIэ зэрэхъущтым тынаIэ тедгъэтын фае. Шъыпкъэ, цифрэ технологиехэмрэ искусствэм ипкъыгъохэр уапашъхьэ итхэу зэбгъэлъэгъунхэмрэ зэфэдэп, анахь мэхьанэ зиIэр Адыгеим икультурэ ашIогъэшIэгъонэу анаIэ къытырядгъэдзэныр, культурэ щыIакIэм ныбжьыкIэхэр нахьыбэу хэщэгъэнхэр ары», — къыIуагъ КъумпIыл Мурат.
ЦIыфхэр нахьыбэу якIолIэщтых
Культурэм иучреждениехэр мылъку-техникэ лъэныкъомкIэ нахь зэтегъэпсыхьэгъэнхэм иIофыгъо анахьэу мы зэхэсыгъом зыщатегущыIагъэхэм ащыщ. АР-м и ЛIышъхьэу КъумпIыл Мурат къызэрэхигъэщыгъэмкIэ, республикэм ипсэупIэхэм анахьыбэхэм культурэм иучреждениеу адэтхэр непэкIэ зэрэзэтегъэпсыхьагъэхэм уигъэрэзэн плъэкIыщт.
Культурэм иуни 129-рэ непэкIэ Адыгеим ит, ащ щыщэу 9-р мы аужырэ илъэситфым ашIыгъ. АгъэкIэжьыгъэх Лъэпкъ музеир, Пушкиным инароднэ унэ, Адыгэ Республикэм и СурэткъэгъэлъэгъуапIэ, къалэу Мыекъуапэ искусствэмкIэ кIэлэцIыкIу еджапIэу дэтыр. 2023-рэ илъэсым концерт залэу «Налмэсым» игъэцэкIэжьын аублагъ. Адыгэ Республикэм и Симфоническэ оркестри IэпыIэгъу ратынэу рахъухьагъ. Ащ пае музыкальнэ Iэмэ-псымэхэр къащэфынхэу сомэ миллион 19 фэдиз ахъщэ тедзэу къафыхагъэкIыгъ. Кадрэхэм ягъэхьазырын епхыгъэ IофшIэнри лъагъэкIотэщт.
2017-рэ илъэсым къыщыублагъэу 2022-рэ илъэсым нэс культурэм и Унэ 45-рэ агъэцэкIэжьыгъ. 2023-рэ илъэсым культурэм иуни 4 агъэцэкIэжьыщт ыкIи 2 ашIыщт. Ахэм ащыщэу зыр къутырэу Гавердовскэм культурэм ихэхъоныгъэкIэ Гупчэу къыдэтэджэщтыр ары. Кинозали 9 джырэ уахътэм диштэрэ оборудованиемкIэ зэтырагъэпсыхьагъ. Сомэ миллион 11 зытефэгъэ оборудованиер къафащэфыгъ культурэм иунэ 28-мэ, мы илъэсым джыри ащ фэдэ унэ 12-мэ сомэ миллиони 5,2-рэ зытефэщт техникэр аIэкIагъэхьащт. Фестивальхэм язэхэщэнкIэ, культурэм епхыгъэ Iофтхьабзэхэр нахь дэгъоу рекIокIынхэмкIэ мылъку къафыхагъэкIы, дунэе, урысые, шъолъыр фестивальхэм, зэнэкъокъухэм, къэгъэлъэгъон зэфэшъхьафхэм кIэлэцIыкIухэмрэ ныбжьыкIэхэмрэ нахь игъэкIотыгъэу ахэлэжьэнхэм анаIэ тырагъэты.
Адыгеим и ЛIышъхьэ пшъэрылъ къыгъэуцугъ культурэм иунэхэр цIыфхэр нахь зыщызэIукIэхэрэ, яуахътэ нахь гъэшIэгъонэу зыщагъакIорэ чIыпIэу шIыгъэнхэм зэкIэми яамал зэдырахьылIэнэу.
АР-м культурэмкIэ иминистрэу Аулъэ Юрэ къызэриIуагъэмкIэ, культурэм иучреждение пэпчъ фэгъэхьыгъэ паспортэу зэхагъэуцуагъэм игъэкIотыгъэу къыреIотыкIы организацием иIофшIэн зэрэзэхэщагъэр, Iофыгъоу зэшIуихыгъэхэр, пшъэрылъхэу къыпыщылъхэр. Джащ фэдэу муниципальнэ образование пэпчъ культурэм и Унэ анахь дэгъур къыхэгъэщыгъэнэу, творческэ программэ гъэшIэгъонхэр зэхэзыщэхэрэм нахь игъэкIотыгъэу нэIуасэ афашIыхэзэ ашIынэу игъо къафилъэгъугъ. Пэрыт коллективхэм ягастрольхэм яграфик зэхагъэуцозэ ашIымэ ащи нахь амал дэгъухэр къызэритыщтхэм, муниципальнэ коллективхэми якъэгъэлъэгъонхэр нахь игъэкIотыгъэу шIыгъэнхэм ишIуагъэ къызэрэкIощтым анаIэ тыраригъэдзагъ.
«Культурэм иучреждениехэм мылъкумкIэ ыкIи техникэмкIэ язытет нахьышIу шIыгъэным пае тыкъызыпкъырыкIырэр лъэпкъ проектхэмрэ программэ зэфэшъхьафхэмрэ ары. Къуаджэхэм хэхъоныгъэ ягъэшIыгъэным ипрограммэ тетэу бэ зэшIотхын тлъэкIыгъэр. ТшIэрэр зэкIэ зыфэгъэхьыгъэр цIыфхэм языгъэпсэфыгъо уахътэ нахьышIоу зэхэщэгъэным пай. ЩысэтехыпIэу къэбгъэлъэгъон плъэкIыщт коллективыбэ зэрэтиIэр лъэшэу тигуапэ. Ахэр нэмыкIхэм IэпыIэгъу афэхъун, щысэ арагъэлъэгъун фае. Культурэм иунэхэм ащылажьэхэрэм яIофшIакIэ нахьышIоу зыщызэхэщэгъэ псэупIэхэм щыIакIэу адэлъри нахьышIум ылъэныкъокIэ зэрэзэхъокIырэр тинэрылъэгъу», — къыхигъэщыгъ КъумпIыл Мурат.
ЗэIукIэгъум икIэухым лъэпкъ проектэу «Культурэр» нахь шIуагъэ хэлъэу пхырыщыгъэнымкIэ еплъыкIэу яIэхэр къаIуагъэх. АР-м и ЛIышъхьэ къызэрэхигъэщыгъэмкIэ, проектхэу зэхагъэуцохэрэр зэкIэ зытегъэпсыхьагъэхэр Iофыгъоу къэуцухэрэр зэхэубытагъэу зэшIохыгъэнхэр ары, мылъку-техникэ лъэныкъом къыщегъэжьагъэу кадрэхэм ягъэхьазырын нэсыжьэу зэкIэми икъоу тынаIэ атедгъэтын фае.
«Тиартистхэм яIэпэIэсэныгъэ зыкъызэриIэтырэм, ятворчествэкIэ амалэу яIэхэр нахьышIу зэрэтшIыхэрэм тэри лъэшэу тыкIэгушIужьы. Арышъ, ренэу сэнаущыгъэ зыхэлъхэм тадэIэпыIэн, республикэм щыпсэухэрэми, ихьакIэхэми тиIофтхьабзэхэм ашIогъэшIэгъонэу анаIэ къатырадзэным ренэу тыдэлэжьэщт. Республикэм икультурэ инвестициехэр нахьыбэу хэтлъхьаных!» — къыIуагъ КъумпIыл Мурат.
АР-м и ЛIышъхьэ ипресс-къулыкъу