Хабзэ зэрэхъугъэу шышъхьэIум и 12-м физкультурникым и Мафэ хагъэунэфыкIы. Ар зисэнэхьат хъугъэхэм ямызакъоу, зипкъышъол, зипсауныгъэ зыгъэпытэрэ пстэури мы мэфэкIым зэрепхых.

Спортым пыщагъэхэр нахьыбэ хъунымкIэ IофшIэнышхо зыгъэцакIэхэрэм Мыекъопэ къэлэ администрацием физическэ культурэмкIэ ыкIи спортымкIэ и Комитет иIофышIэу Бзаго Рустам. МэфэкIым ехъулIэу онлайн мэкъэтынэу Комитетым зэхищагъэм ащ текIоныгъэр къыщыдихыгъ. «Общественнэ IофышIэ ыкIи физическэ культурэмрэ спортым­рэкIэ зэхэщэкIо анахь дэгъу» зыфиIорэ лъэныкъомкIэ анахь дэгъоу алъытагъ, нэбгырэ 741-мэ амакъэ фатыгъ.

Рустам мы аужырэ илъэсхэм лъэс кIонымкIэ Iофтхьэбзэ зэфэшъхьафхэр Мыекъуапэ чанэу щызэхещэх. Ахэм нэбгырэ мин пчъагъэ ахэлэжьагъ. Джы «Майкоп 01» зыфиIорэ командэм кIэщакIо фэхъугъэу, ящэнэрэу Урысые зэнэкъокъум хэлажьэ.

— ЦIыфым ипсауныгъэ псыхьэгъэным фэшI анахь IэшIэхыр ыкIи ахъщэ зимыщыкIагъэр лъэс кIоныр ары. Нахьыбэ къэпкIу къэс пкъышъолыр нахь пытэ мэхъу, Iэпкъ-лъэпкъхэр епсыхьэх. 2020-рэ илъэсым бжыхьэм апэрэу лъэс кIоным фэгъэхьыгъэ Iофтхьабзэ зэхэтщэгъагъ. ЦIыфхэм ар нахь ашIогъэшIэгъоныным пае шапхъэу пылъхэр зэтэхъокIы, гущыIэм пае, лъэбэкъу мини 100-р тхьамафэкIэ къакIунэу тэгъэнафэ, ар мэфитIу-щыкIэ зыгъэцакIэхэрэри къа­хэкIых, — еIо Рустам.

Хъулъфыгъи бзылъфыгъи джы автомобилым кIэрысых, IофшIапIэм Iутхэм анахьыбэр мэфэ реным къэмытэджхэу щысых, ащ псауныгъэр зэIегъахьэ. Мыщ фэдэ Iофтхьабзэхэм цIыфхэр ахэлажьэхэ зыхъукIэ апкъышъол псыхьагъэ хъущт, шэнышIу афэхъунышъ, мафэ къэс къакIу­хьащт.

— Къэлэдэсхэм тиIофтхьабзэхэр агу зэрэрихьырэр зытэлъэгъум, лъэпкъ псауныгъэм и Лигэ кIэщакIо зыфэхъугъэ Урысые зэнэкъокъоу «КIорэ цIыфыр» зыфиIорэм тыхэлэжьэнэу тыублагъ. Апэрэм шапхъэхэр икъу фэдизэу зымыгъэцэкIагъэхэр къытхэкIи, яплIэнэрэ чIыпIэр къыщытхьыгъ. ЯтIонэрэу тызыхэлажьэм текIоныгъэр къытфагъэшъошагъ. Джы гъэмэфэ зэнэкъокъум Урысыем щыщ куп 474-рэ хэлажьэ, анахь къэгъэлъэгъон дэгъухэр зиIэхэм тащыщ. «Майкоп 01» цIэу тиIэр, — еIо тигущыIэгъу.

Бэдзэогъум и 28-м къыщегъэжьагъэу шышъхьэIум и 12-м нэс зэнэкъокъур кIощт. Ащ хэлажьэхэрэм мафэ къэс лъэбэкъу мин 25-рэ, километрэ 18 — 20-рэ акIун фае. Командэм хэт нэбгырэ пэпчъ шъхьадж ипшъэрылъ зэрифэшъуашэу егъэцакIэ. ТекIоныгъэр къыдэзыхын зылъэкIыщтхэм ясатыр хэтых. Мыщ нэбгырэ 20 хахьэ, ахэм зэкIэми физическэ ухьазырыныгъэ дэгъу яI, спортым псауныгъэмкIэ мэхьанэшхо зэриIэр къагурэIо. Шъхьадж шIогупсэф уахътэм къекIухьэ. Ахэтых ахэм ныбжьыкIэхэри, зыныбжь хэкIотагъэхэри, пенсием щысхэри. Нахьыбэмэ Iоф ашIэ нахь мышIэми, текIоныгъэм фэзыщэщт лъэбэкъухэр зы мафэ бламыгъэкIэу, шIокI имыIэу къакIу.

— ЦIыфхэр лъэс кIоным фэщэгъэнхэр ары пшъэрылъ шъхьаIэр. Ащ ишIуагъэкIэ ахэм ящыIэкIэ-псэукIэ нахь дэгъу мэхъу, япсауныгъэ агъэпытэ. Тикомандэ хэтхэр зэмыгъусэхэу, шъхьадж ежь къыхихырэ гъогум рэкIо, шапхъэр егъэцакIэ. Зэнэ­къо­къум хъоршэрыгъэ къыхахьэрэп, лъэпкъ псауныгъэм и Лигэ ыгъэпсыгъэ приложениер телефонхэм атет, ащ ишIуагъэкIэ лъэбэкъухэр хэзыгъахъорэр къашIэ ыкIи зэрэкомандэу зэнэкъокъум хагъэкIы, — еIо Рустам.

Лъэс кIоныр зикIасэхэм япчъагъэ мафэ къэс хэхъо. Социальнэ хъытыур къызыфагъэфедэзэ марафонхэр зэрэщыIэхэр зэрагъашIэ ыкIи ахэм ягуапэу ахэлажьэх. МэфэкIым фэгъэхьыгъэу, шышъхьэIум и 12-м «ЩыIэныгъэм екIурэ лъэбэкъу минипшI» зыфиIорэр Мыекъуа­пэ щыкIощт.

Командэм хэтхэм ащыщхэм гущыIэгъу тафэхъугъ.

Псэун Назир, илъэс 58-рэ ыныбжь: «ИлъэситIу хъугъэ мы Iофтхьабзэм сызыхэлажьэрэр. Гъэзетым мэкъэгъэIу итэу зысэлъэгъум сшIогъэшIэгъон хъугъэ, сфэукIочIыщтмэ сыуплъэкIунэу сыгу къихьагъ, лъэшэу сызыпищагъ. ИлъэситIум къыкIоцI лъэбэкъу миллион 12 сшIыгъэ. Мыгъэ Кощхьаблэ лъэсэу сыкIуагъ, ащ фэдизэу къин къысщыхъу­гъэп. СипсауныгъэкIэ ишIуагъэ къысэкIыгъ, килограмми 10 схэкIыгъ, ащ къыщегъэ­жьагъэу лъыдэкIуаем сигъэгумэкIыжьырэп, зыпкъ иуцожьыгъ. Спорт ухьазырыныгъэм и Гупчэ Iоф щысэшIэ, ныбжьыкIэхэм щысэтехыпIэ уафэхъун фае. Зэнэкъокъум къыдыхэлъытагъэу мафэм къэскIун фаер къин къысщыхъурэп, пчэдыжьым сыхьатыр 4-м сыкъэтэджы лъэбэкъу мин 15 сэкIу, пчыхьэм къэнагъэр сэкIужьы».

Джарымэкъо Аслъан, илъэс 38-рэ ыныбжь: «Апэрэ мафэм къыщегъэжьагъэу лъэс кIоным епхыгъэ Iофтхьабзэхэм сэри, сянэ-сятэхэри тахэлажьэ. Тыгу рехьы, сыда пIомэ псауныгъэмкIэ ишIуагъэ къытэкIы. Iоф сэшIэ, уахътэр зэрэщымыIэм къыхэкIыкIэ IэшIэхэп, ау мафэм сыхьат пэпчъ такъикъи 10 — 15-р къэсэ­кIухьэ, къэнагъэр пчыхьэм исэгъэ­къужьы. Къэчъыхьаныр сикIас, мафэ къэс стадионым сэкIо. Iофтхьабзэ сыхэмылажьэми лъэс кIоныр шэнышIу сфэхъугъ».

Мария Донсковар, илъэс 41-рэ ыныбжь: «Спортым сыгукIэ сыфэщагъ, фитнесым, йогэм сэкIо. Зэнэкъокъум сыхэлэжьэныр къин къысщыхъурэп, пчэдыжьым жьэу сыкъэмытэджыми, мафэм къыкIоцI есэгъэкъу. Тикомандэ хэтхэр зэкIэ зэдештэх. ЗэкIэми япшъэрылъ агъэцакIэ, тэгугъэ джыри апэрэ чIыпIэр къыдэтхынэу. Лъэс кIоныр гу-лъынтфэмкIэ, къупшъхьэ зэрытыпIэмкIэ дэгъу. УзекIоныр — псауныгъ».

Дзыбэ Рузан: «Очылэу Iоф сэшIэ нахь мышIэми, ящэнэрэу мы зэнэкъокъум сыхэлажьэ, шIоигъоныгъэ уиIэмэ уахътэ къыхэбгъэ­кIыщт. Сыхьатыр 5-м сыкъэтэджы, си­пшъэрылъ ызыныкъо сэгъэцакIэ, къэнагъэр къин къысщымыхъоу пчыхьэм къэ­сэкIужьы. Iофтхьабзэхэм сахэмылажьэми, шэнышIу сфэхъугъэу мафэм, анахь макIэмэ лъэбэкъу мини 10 сэкIу».

Ирина Пылова: «Ящэнэрэу зэнэкъокъум сыхэлажьэ, сикIалэу Владимир ылъакъохэр узхэу врачым дэжь тызэкIом, лъэс кIоным ишIуагъэ къызэрэкIощтыр къытиIуагъ, ащ ыуж къэткIухьанэу едгъэжьагъ. Мыщ фэдэ Iофтхьабзэ зэрэщыIэр зызэхэсэхым сигуапэу сыхэлэжьэнэу сыублагъ, узэгъусэу, нэмыкIхэм къакIурэр плъэгъу зыхъукIэ, нахь гуIэтыпIэ уиIэ мэхъу. Пчэдыжьым жьэу сыкъэтэджы, лъэбэкъу мин 25-рэ сэкIу, зэнэкъокъум шапхъэу пылъым нахьи нахьыб къэскIурэр. Мафэм лъэбэкъу мин 38-рэ къэскIоу къыхэкIыгъ, мин 60-м нэзгъэсынэу сыфай, сикIалэ лъэбэкъу мини 10 — 15-р къыздекIу».

ДЕЛЭКЪО Анет. Сурэтхэр: А. Iэшъын.