Тигъэзет къызэрэхиутыгъэу, физкультурникым и Мафэ ихэгъэунэфы­кIын ехъулIэу Мыекъопэ къэлэ администрацием физическэ культурэмкIэ ыкIи спортымкIэ и Комитет лъэныкъуищым ателъытагъэу онлайн мэкъэтын зэхищагъ.

«Мыекъуапэ испорт еджапIэхэм ятренер-кIэлэегъэджэ анахь дэгъу», «Общественнэ IофышIэ ыкIи физическэ культурэмрэ спортымрэкIэ зэхэщэкIо анахь дэгъу», «Физическэ культурэмкIэ кIэлэегъэджэ анахь дэгъу» зыфиIохэрэмкIэ зэнэ­къокъугъэх.

Социальнэ хъытыоу «Вконтакте» зыфиIорэр зыгъэфедэрэ нэбгырэ мин 17-м ехъумэ ама-къэ атыгъ. Лъэныкъоу «Мые­къуапэ испорт еджапIэхэм ятренер-кIэлэегъэджэ анахь дэгъу» зыфиIорэм нэбгырэ 20 хэлэ­жьагъ, ахэр спорт еджапIэхэм япащэхэм къагъэлъэгъуагъэх. Мэкъэтыныр едзыгъуитIоу кIуагъэ. Финалым ихьэгъагъэхэр волейболым, гандболым, зэде­гъэштэн есыным, спортивнэ ыкIи художественнэ гимнастикэм апылъых.

ТекIоныгъэр къыдэзыхыгъэр зэдегъэштэн есынымкIэ тренерэу Нина Говорковар ары, ащ нэбгырэ 1397-мэ амакъэ фатыгъ, ятIонэрэ хъугъэ художественнэ гимнастикэмкIэ тренерэу Яна Цеханович, ящэнэрэ чIыпIэр къыдихыгъ волейболымкIэ тренерэу Галина Путятинам.

«Общественнэ IофышIэ ыкIи физическэ культурэмрэ спортымрэкIэ зэхэщэкIо анахь дэгъу» зыфиIорэм текIоныгъэр къыщыдэзыхыгъэр Бзаго Рустам, ащ нэбгырэ 741-мэ амакъэ фатыгъ, хагъэунэфыкIырэ чIыпIэхэр къы­дахыгъэх Мырзэ Муратрэ Марина Мельникрэ.

«Мыекъуапэ физическэ культурэмкIэ икIэлэегъэджэ анахь дэгъу» зыфиIорэм хэлэжьагъэхэм нэбгырэ 7300-мэ амакъэ афатыгъ. Финалым кIэлэегъэджи 6 ихьагъ. ТекIоныгъэр къыдихыгъ Мыекъопэ гимназиеу N 22-м физическэ культурэмкIэ икIэлэегъаджэу Артур Киракосян, ятIо­нэрэ хъугъэ поселкэу Севернэм дэт еджапIэу N 27-м илIыкIоу Роман Поповиченкэр, ящэнэрэ чIыпIэр къыхьыгъ къутырэу Гавердовскэм гъэсэныгъэмкIэ игупчэу N 18-м икIэлэегъаджэу Михаил Каплуновскэм.

ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэр неущ къэлэ гупчэ паркым щагъэшIощтых.