Президентым ифонд иIэпыIэгъукIэ
«Iэпэщысэхэу искусствэ хъугъэхэр» зыфиIорэ проектэу АР-м иIэпэIасэхэм ыкIи лъэпкъ IэпэщысэшIыным пылъхэм я Ассоциацие къыгъэлъэгъуагъэм культурнэ IофтхьабзэхэмкIэ Президентым ифонд игрант къырихыгъ.
[caption id="attachment_137404" align="aligncenter" width="800"] Сурэтыр: Л. Гумэ[/caption]Проектыр зигукъэкIыр Ассоциацием хэтэу, IэпэIасэу Гумэ Ларис. Iофтхьабзэу кIэщакIо зыфэхъугъэр гъэцэкIагъэ зэрэхъущтым фэгъэхьыгъэу ащ гущыIэгъу тыфэхъугъ.
— Культурнэ IофтхьабзэхэмкIэ Президентым ифонд изэнэкъокъухэр ятIонэрэу зэхащэх, мыгъэ сыд фэдиз ащ хэлэжьагъэр, Ларис?
— 2023-рэ илъэсымкIэ зэнэкъокъум хэлэжьэнэу проект 10291-рэ къырахьылIэгъагъ. Урысыем шъолъырыкIэу къыхэхьагъэхэри мы Iофтхьабзэм къыхэлэжьагъэх. Ахэм ащыщэу ушэтынхэм апхырыкIыгъэр ыкIи баллхэр изыгъэкъугъэр проект 9899-рэ. Зэнэкъокъум упхырыкIыныр IэшIэхыгъэп, зы чIыпIэм проектипшI щызэнэкъокъугъ, арэу щытми, культурнэ IофтхьабзэхэмкIэ Президентым ифонд иIэпыIэгъу къитхыгъ.
— Сыд фэдиз уахъта проектым игъэцэкIэн пылъыр?
— Мы илъэсым Iоныгъом иапэрэ мафэ къыщыублагъэу къихьащт 2024-рэ илъэсым мэкъуогъум и 23-м нэс, мэзибгъум къыкIоцI дгъэцэкIэн фае.
[caption id="attachment_137405" align="aligncenter" width="800"] Сурэтыр: Л. Гумэ[/caption]— Сыд фэдэ пшъэрылъха зыфэжъугъэуцужьыхэрэр, сыд фэдэ лъэныкъохэр ара шъуздэлэжьэщтхэр?
— Адыгэ лъэпкъ Iэпэщысэхэм якъэухъумэн ыкIи яхэгъэхъон проектыр зы-тегъэпсыхьагъэр. Фэдэ тымышIыгъэу апэрэу къэгъэлъэгъон гъэшIэгъон дгъэхьазырыщт. Ащ музейхэм ачIэлъ пкъыгъохэм атешIыкIыгъэхэр ыкIи
АР-м IэпэщысэшIынымкIэ иIэпэIасэхэм яIэшIагъэхэр хэхьащтых. Унагъом щагъэфедэщтыгъэ пкъыгъуабэ экспозицием хэхьащт.
Ахэр дышъэидагъэхэр, адыгэ музыкальнэ Iэмэ-псымэхэр, ижъырэ унэгъо псэуалъэхэр, ахэм яоригиналхэр Санкт- Петербург Урысые этнографическэ музееу дэтым, АР-м и Лъэпкъ музей ачIэтых.
— Зигугъу къэпшIырэ къэгъэлъэгъон хьалэмэтыр тыдэ щалъэгъун алъэкIыщта?
— Пкъыгъоу щыIагъэхэмрэ джы IэпэIасэхэм ашIыхэрэмрэ цIыфхэм зэрагъэпшэнхэ алъэкIыщт. Ахэр зыщалъэгъущтхэ къэгъэлъэгъоныр АР-м имуниципальнэ гъэIорышIэпIибгъумэ ащыкIощтых. Къэгъэлъэгъонхэм IэпэIасэхэм ямастер-классхэри ахэтыщтых. IэпэщысэшIынымкIэ еджапIэхэм, клубхэм кIэлэцIыкIу купхэр ащезыгъаджэхэрэм ыкIи ежь кIэлэцIыкIухэм ахэм защагъэсэн, защаушэтын алъэкIыщт. ЗэкIэмэ анахь мэхьанэ зиIэр — республикэ гупчэм къэмыкIошъухэрэм къэгъэлъэгъоныр алъэгъун амал яIэщт, къуаджэхэм, псэупIэхэм ар анэсыщт. Культурэм исаугъэтэу псэ къызпыкIэжьыгъэхэр зэрагъэлъэгъуным имызакъоу, аIэкIэ анэсынхэ алъэкIыщт. Чэзыу гъэнэфагъэ хэлъэу республикэм ирайонхэм ар къащыдгъэлъэгъощт, ащ имызакъоу, тикъэралыгъо щызэхащэрэ культурнэ Iофтхьэбзэ зэфэшъхьафхэми ащыщ хъун ылъэкIыщт.
— Шъо шъушъхьэкIэ сыд мы Iофтхьабзэм шъузэрэщыгугъырэр?
— Адыгэмэ ядышъэ кIэн икъэухъумэн, ихэгъэхъон, нэмыкI лъэпкъхэм ар нахь ягъэшIэгъэным ащкIэ тызэрэхэлэжьэщтым гушхуагъэ къытхилъхьанэу, творческэ хэхъоныгъэхэр джыри тигъэшIынэу тыщэгугъы.
КIэлэцIыкIухэу джынэс фэдэ къэгъэлъэгъонхэр зымылъэгъугъэхэм ялъэпкъ икультурэ зэрэбаим, зэрэдахэм щыгъуазэ хъунхэмкIэ, ясэнаущыгъэ къыхэгъэщыгъэнымкIэ мы проектым ишIогъэшхо къэкIощт.
Къызщыхъугъэхэ чIыгур, зыщыщхэ лъэпкъыр шIу алъэгъунхэм фигъэблыщтых. Культурнэ IофтхьабзэхэмкIэ Президентым ифонд тыкъызэрэхигъэщыгъэмкIэ лъэшэу тыфэраз, цыхьэу къытфашIыгъэр къэдгъэшъыпкъэжьыным тыпылъыщт.
ДэгущыIагъэр Тэу Замир.