Урысые физкультурэ комплексэу «IофшIэным ыкIи зыкъэухъумэжьыным сафэхьазыр» зыфиIорэм ифинал Мыекъуапэ икIэлэеджакIохэр хэлэжьэщтых. ЗыгъэпсэфыпIэ чIыпIэу «Артекым» ар щыкIощт. Ащ изыфэгъэхьазырын щэрыонымкIэ рагъэжьагъ.

КIэлэеджакIохэм щэ щэ­ры­онымкIэ зэнэкъокъум зэ­рифэ­шъуашэу зыфагъэхьазырыным фэшI спорт комплексым ипащэхэм шышъхьэIум егъэ­джэнхэр зэхащагъэх, ар зэшIохыгъэ зэрэхъу­рэм опытышхо зыIэкIэлъ инструкторыр лъыплъагъ. Iашэр тэрэзэу аIыгъэным ыкIи зэщэрыохэрэм тэрэзэу тырагъэпсыхьаным ныбжьыкIэхэр фагъасэх.

Нэбгырэ пэпчъ зэфэхьысыжь дэгъу зэришIыщтым пылъ. КIэлэ Iэтахъохэм къагурэIо — ежьхэм якъэгъэлъэгъонхэм ялъытыгъэщт командэм чIыпIэу къыдихыщтыр. Зигугъу къэтшIыгъэ Iофтхьабзэм хэлэжьэщтых илъэс 12 — 13 ыкIи 14 —15 зыныбжьхэр. Ахэр Урысыем ишъолъыр зэфэшъхьафхэм къарыкIыщтых.

Щэрыоныр спорт лъэпкъ къи­нэу зэрэщытым дакIоу щынэгъон­чъэным ишапхъэхэри шIокI имыIэу зыщыбгъэцэкIэн фаехэм ащыщ. АщкIэ кIэлэеджакIохэм ящыкIагъэр зэкIэ къафаIотагъ, Iашэм узэрэдэзекIон фаер нэ­рылъэгъу къафашIыгъ.

Мыекъуапэ ыцIэкIэ финал едзыгъом хэлэжьэщтых Анжей Матосян, Даниил Сосновскэр, Арсений Бобров-Третьяк, Арина Мехеда, Камилла Стребковар, Ирина Власюковар ыкIи Арина Новиковар. Мыхэм Урысые фестивалым ишъолъыр уцугъо къэ­гъэлъэгъон анахь дэгъухэр щыряIагъэх.

КIалэхэм ыкIи пшъашъэхэм щэрыон закъор арэп зызфагъэ­хьазырырэр. Къихьащт тхьамафэм щегъэжьагъэу нэмыкI спорт лъэпкъхэмкIи ахэм заушэтыщт, загъэсэщт. Зэнэкъо­къум ифинал едзыгъо Iоныгъом и 25-м щегъэжьагъэу и 15-м нэс «Артекым» щыкIощт.