ФутболымкIэ Адыгеим ичемпионат хэлэжьэхэрэ Адыгэкъалэ ыкIи Мыекъопэ районым якомандэхэм апэрэ зэIукIэгъоу яIагъэхэр текIоныгъэкIэ рагъэжьагъэх.

«Адыгэкъалэ» апэрэ ешIэгъоу иIагъэм Шэуджэн районым икомандэу «Нарт» зыфиIорэм щыIукIагъ ыкIи 11:1-у текIоны­гъэр къыдихыгъ. ЗэIукIэгъур зыщыкIуа­гъэр Адыгэкъал. Апэрэ Iэгуаор къэлапчъэм дэзыдзагъэхэр хьа­кIэхэр ары, ау ащ ыуж ахэм зи афызэшIокIыгъэп, бысымхэр хэпшIыкIэу нахь лъэшыгъэх.

Мыекъопэ районыр къэзыгъэ­лъэгъорэ «Урожаир» станицэу Джаджэм икомандэу «Сириусым» IукIагъ ыкIи 4:1-у текIоныгъэр къыдихыгъ.

Командэу «Мыекъуапэм» зи­чэзыу ешIэгъури шIуахьыгъ, мызыгъэгум къытекIуагъэр Адыгэ къэралыгъо университетыр ары, пчъагъэр – 0:5. «Мыекъуа­пэ» иIэгъэ зэIукIэгъуищым икъэ­лапчъэ Iэгоо 20 къыфыдадзагъ. «Кощхьаблэр» Теуцожь районым икомандэу «Чэчэнаим» нахь лъэшыгъ, 4:2-у текIоныгъэр къыдихыгъ. Я 3-рэ турым къыдыхэлъытэгъэ аужырэ ешIэгъур селоу Красногвардейскэм щыкIуагъ. ЧIыпIэ командэу «Кавказыр» «Тэхъутэмыкъуаем» IукIагъ ыкIи 5:3-у текIуагъ.

«АГУ», «Кощхьабл», «Кавказ» зыфиIорэ командэхэр апэ итых (очкоуи 6 зырыз яI), Очко щырыщ рагъэкъугъ «Адыгэкъалэ», «Уро­жа­им», «Чэчэнаим», «Тэхъутэмыкъуаем», «Сириусым». Очко яIэп «Нартым» ыкIи «Мыекъуапэ».