Физкультурникым и Мафэ ихэгъэунэфыкIын ехъулIэу Мыекъопэ къэлэ администрацием физи­ческэ культурэмкIэ ыкIи спортымкIэ и Комитет онлайн мэкъэтын зэхищагъ. Ащ къыдыхэлъытэгъэ лъэныкъуитIум текIоныгъэр ыкIи хагъэунэфыкIырэ чIыпIэхэр къащыдэзыхыгъэхэр къэнэфагъэх.

Социальнэ хъытыоу «Вконтакте» зыфиIорэр зыгъэфедэрэ нэбгырэ мини 10-м ехъумэ амакъэ атыгъ. Лъэныкъоу «Мыекъуапэ испорт еджапIэхэм ятренер-кIэлэегъэджэ анахь дэгъу» зыфиIорэм нэбгырэ 20 хэлэжьагъ, ахэр спорт еджапIэхэм япащэхэм къагъэлъэгъуа­гъэх. Мэкъэтыныр едзыгъуитIоу кIуагъэ. Финалым нэбгыри 8 ихьагъ, ахэр волейболым, гандболым, зэдегъэштэн есыным, спортивнэ ыкIи художественнэ гимнастикэм апылъых. ТекIоныгъэр къыдэзыхыгъэр зэдегъэштэн есынымкIэ тренерэу Нина Говор­ковар ары, ащ нэбгырэ 1397-мэ амакъэ фатыгъ, ятIонэрэ хъугъэ художественнэ гимнастикэмкIэ тренерэу Яна Цеханович, ящэ­нэрэ чIыпIэр къыдихыгъ волейболымкIэ тренерэу Галина Путятинам.

Мы мафэхэм лъэныкъоу «Общественнэ IофышIэ ыкIи физическэ культурэмрэ спортымрэкIэ зэхэщэкIо анахь дэгъу» зыфи­Iорэм изэфэхьысыжьхэр ашIы­гъэх. Мыщ нэбгыри 7 къыща­гъэлъэгъуагъ: Хьаткъо Алый, Мырзэ Мурат, Владимир Зотовыр, Бзаго Рустам, Заурбый Кам, Биданэкъо Кощбай ыкIи Марина Мельник. Мэкъэтыным зэкIэмкIи нэбгырэ 2090-рэ хэлэжьагъ, ахэр Мыекъуапэ, Адыгеим ямызакъоу, Москва, Санкт-Петербург, Якутскэ, Ермэлхьаблэ ащэпсэух. ТекIоныгъэр къыдэзыхыгъэ Бзаго Рустам нэбгырэ 741-мэ ама­къэ фатыгъ, хагъэунэфыкIырэ чIыпIэхэр къыдахыгъэх Мырзэ Муратрэ Марина Мельникрэ.

Джырэ уахътэм «Мыекъуапэ физическэ культурэмкIэ икIэлэегъэджэ анахь дэгъу» зыфиIорэ зэнэкъокъур лъагъэкIуатэ. Рес­публикэм икъэлэ шъхьаIэ щыщ нэбгырэ 19 ащ хэлажьэ. Физкультурникым и Мафэ зыщыхагъэунэфыкIыщт шышъхьэIум и 12-м мэфэкI шIыкIэм тетэу анахь дэгъухэм афэгушIощтых. Iоф­тхьабзэр къэлэ гупчэ паркым щыкIощт.