Узыумэхъырэ япон дэхагъэр
Бэдзэогъум ыкIэм КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэу Мыекъуапэ дэтым къэгъэлъэгъонэу «Красота по-японски» зыфиIорэр къыщызэIуахыгъ.
[caption id="attachment_137133" align="aligncenter" width="800"] Сурэтыр: КъокIыпIэм имузей.[/caption]
Ар сурэтышIэу ыкIи востоковедэу Григорий Акимченкэм иунэе коллекциехэм къагъэпсыгъ.
Къэгъэлъэгъоныр шIуфэс псалъэкIэ къызэIуихыгъ музеим икъутамэ ипащэу ШъэуапцIэкъо Аминэт. Япон искусствэм къыпкъырыкIызэ гущыIэ кIэкI къышIыгъ АР-м инароднэ сурэтышIэу Бырсыр Абдулахь. МэфэкI зэхахьэм щыIагъэх тиреспубликэ щыпсэурэ цIыфхэр, ихьакIэхэр ыкIи къэбар жъугъэм иамалхэм ялIыкIохэр.
[caption id="attachment_137134" align="aligncenter" width="800"]
Сурэтыр: КъокIыпIэм имузей.[/caption]
Экспозицием уасэ зиIэ экспонат 70-рэ хэхьагъ. Ахэр я ХVIII — ХХ-рэ лIэшIэгъухэм ижъырэ япон искусствэр къизгъэлъэгъукIырэх: живописыр, гравюрэр, дэнэидэр зыщыгъэфедэгъэ паннохэр, пкъыгъо зэфэшъхьафхэр ыкIи щыгъынхэр.
Къэгъэлъэгъоным тхылъыпIэр ыкIи дэнэ Iуданэр кусэ-кусэу зыщызэтегъэщыхьагъэхэр, парчар къекIокIэу — какэмоно зыфаIорэр («Богиня Каннон», «Семь богов счастья»), иероглифхэр — шIуфаIохэр къарыкIхэу атетхэу щыолъэгъух.
Ащ еплъыгъэхэм анахьэу анэ къыкIидзагъэр япон щыгъынэу кимонор ары. Ар Iэбыхъу-лъэбыхъу, тхыпхъэ дахэхэмкIэ зэлъыпкIагъ. Мы шъуашэм ар зыщыгъ цIыфым ыгу изытет, щыIэныгъэм чIыпIэу щиубытырэр, ибаиныгъэ къыреIотыкIы. Кимонор мафэ къэс агъэфедэрэ лъэпкъ щыгъын ыкIи сыдигъокIи анахь агъэлъэпIэрэ, рамыдзыжьырэ шъуаш.
Япон щыIэкIэ-псэукIэм инэмыкI пкъыгъо зэфэшъхьафхэри къэгъэлъэгъоным хэлажьэх: щайшъолъэ зэхэтхэр, жьыфхэр. Лъэпкъым щаир зэрикIасэр, ащ ишъэфэу агъэцакIэрэр, ашIэрэр зэрэбэр, лъэныкъуабэкIэ зыфэсакъыжьэу, зыкъигъэгъунэжьэу, дэхэгъэ иным зыфикъудыеу ар зэрэщыIэм экспозициер ишыхьат. Къэгъэлъэгъоныр чъэпыогъум и 9-м нэс зэIухыгъэщт.
Дзэукъожь Нуриет.