Адыгабзэм иIофыгъохэр: хьакIэщым игущыIэуж…
Адыгабзэм икъэухъумэн ыкIи ихэгъэхъон афэгъэхьыгъэ хьакIэщэу общественнэ зэхахьэу «Адыгэ Хасэмрэ» гъэзетэу «Адыгэ макъэмрэ» зэхащэгъагъэм хэлэжьагъ шIэныгъэлэжьэу, кIэлэегъаджэу ХьакIэмыз Мирэ. Ащ гупшысэу ригъэшIыгъэхэр къизыIотыкIырэ тхыгъэу къытфигъэхьыгъэр къыхэтэуты.
Адыгабзэм изэгъэшIэн иIофыгъо мыпсынкIэхэм афэгъэхьыгъэу зэIукIэ бэмышIэу Мыекъуапэ щыIагъ. ЗэIукIэм хэлэжьагъэх Адыгэ Хасэр, гуманитар ушэтынхэмкIэ Адыгэ республикэ институтыр, «Адыгэ макъэр», адыгабзэм иегъэджакIохэр — адыгабзэм изытет зышIоIофхэр. Сэри а адыгабзэм изытет зышIоIофхэм сащыщэу сахэфагъэу хъугъэ. Сигупшысэ горэхэу сызгъэгумэкIыхэрэр къэсIоным сыщыгугъыгъ, ау къыздэхъугъэп, сыда пIомэ гущыIэ зиIэу къекIолIагъэр бэ дэдагъ, анахьэу кIэлэегъаджэхэу гурыт еджэпIэ пчъагъэу республикэм итхэм ащылажьэхэрэм ягумэкI-гупшысэхэу къырахьылIагъэхэр зэпыу зимыIэ гухэкI мэкъамэу шъхьащытыгъ зэIукIэм.
Адыгэ гущыIэжъым «УимыкI-уимыс, уисэуи сыкъимыгъэхьажь» зэриIоу, адыгабзэм иегъэджакIохэм ашIэщтыр амышIэу мы Iоф зэшIохыгъуаем къыIунагъэх. Сыд мыхъурэр пIомэ, зэкIэми ар зэхахыгъ, ашIэ шъхьаем, гурыIогъуаер — адыгабзэм изэгъэшIэн фэгъэхьыгъэ уахътэр мэкIэ дэдэу зэрэхъугъэм къыхэкIыкIэ (сыхьати 3: бзэр — I ,5; литературэр — I ,5) икъоу шIэныгъэ зэряптышъущтыр ары. КIэлэегъаджэхэм ягумэкI гурыIогъуаеп, ау гурыIогъуаер мы Iофым фэгъэзэгъэ къэралыгъо IофышIэхэм илъэс пчъагъэ хъугъэу хэкIыпIэ къызкIамыгъотышъурэр ары.
Шъыпкъэ, къэгущыIагъэхэм инэу гумэкIыхэу къыхагъэщыгъ адыгабзэр республикэм икъоу зэрэщымылажьэрэр, сабыйхэм урысыбзэкIэ гущыIэныр нахь къызэраштэрэр, ты-ныхэм, унагъом лажьэу яIэр… Ары, адыгабзэр ашIокIодыным ищынагъо атет. Ау адыгэмэ язакъоп зиныдэлъфыбзэ ыгъэгумэкIыхэрэр — гумэкIыгъом зэлъиштагъэх дунаим тет лъэпкъ макIэхэр. Дунэе «глобализацие» зыфаIорэм зэлъиштэнхэу къырахьыжьэгъагъ гупшысэ щынагъохэр, ау ахэр мэкIуасэх. Гъэсагъэмэ ашIогъэшIэгъонэу къызэраIорэмкIэ, лъэпкъ макIэхэм ялъэпкъ напэ «национальная идентичность» зыфаIорэр (бзэр апэ итэу) къагъэнэжьыным фэбанэхэу, нахь лъыплъэхэу мы лъэхъаным хъугъэ. Амалхэри къагъоты. Амалынчъэхэу къанэхэрэр адыгэхэр ары. Адыгэмэ зафэдгъазэмэ, адрэмэ зэратекIхэрэр хэгъэгу пчъагъэмэ арытэкъуагъэу ащыпсэухэ зэрэхъугъэхэр ары. Анахьыбэу Тыркуем исых, ащ къынэуж Сирием, Иорданием арысых, хэгъэгу 50-мэ ащэпсэух. Мыхэмэ яныдэлъфыбзэкIэ тхэкIэ-еджакIэ яIэныр янасып къыубытыгъэп. Урысые хэгъэгум ицIыф— адыгэхэр ары къэралыгъо шапхъэм тетэу яныдэлъфыбзэ зэрагъэшIэнымкIэ амал зиIэхэр. ЫкIи, джырэ уахътэм къызэригъэлъэгъуагъэмкIэ, лъэпкъхэр къызэтенэжьынхэмкIэ ныдэлъфыбзэхэм мэхьанэшхо яI. Тихэгъэгу лъэпкъыбэу исхэм яфитыныгъэхэр къэзыухъумэрэ хэбзэгъэуцугъэхэр иIэх. Ахэм зэу апэ итыр бзэхэм якъэухъумэн. УпчIэ къэуцу: тэрэзэу тэгъэфедэха тифитыныгъэхэр? Хэгъэгу хэбзэзехьэхэм яIофхэр агъэцакIэха? Лъэпкъым ицIыф хэхыгъэхэр ахэм алъэплъэха? ЗэкIэмэ анахь псынкIэр, — «Шъхьадж зыфырикъурэм ерэу» зэраIоу, кIэлэегъаджэхэм уатеIункIэныр, «щымыIэ-имыкъурэ сыхьат закъомкIэ шIэныгъэ яшъут» пIоныр ары. Ар шIуагъэ къэзымытырэ екIолIакI. Адыгэ чылэхэр нэкIы зэрэхъурэми зыгорэ лъыплъэн фаеба? Адыгэ чылэм дэт кIэлэцIыкIу IыгъыпIэм урысыбзэкIэ щыгущыIэнхэу унашъоу хъугъэм сыд лъапсэу иIэр? Адыгэ къэралыгъо университетым адыгэ культурэмрэ филологиемрэкIэ ифакультет адыгэхэр къэмыкIожьхэу зыкIэхъугъэм ушъхьагъоу иIэм егупшысэгъэн фаеба? УпчIэ мыухыжьмэ лъэпкъыр аухы...
Бзэ Iофыр арымэ, зэкIэри хэгущыIэн, зэкIэми яшIошIхэр пчэгум къаралъхьан фитхэу ащэхъу. Зэгорэм, адыгэ бзэшIэныгъэлэжь еджагъэхэр зыщэмыIэм, дунэе гъэсэгъэ инхэм яуалIэщтыгъэх ыкIи къадеIэщтыгъэх (Акад. И. А. Гюльденштедт, акад. А.М. Шегрен, Л. Люлье, Г. Ф. Турчаниновыр, Ф. Шармуа, Л.Г. Лопатинскэр… ). Илъэси I 00-м нэсыгъ адыгабзэм ибзэхабзэхэр агъэунэфи, элфыбэр зызэхагъэуцуагъэр… Джырэ лъэхъаным адыгабзэм дэлэжьагъэхэу гъэсэгъэ инхэр щыIэх ыкIи ахэм зэу ащыщ адыгэ бзылъфыгъэ профессор инэу КIэращэ Зэйнаб. Къызыхъугъэр илъэсишъэ зэрэхъурэр бэмышIэу хэдгъэунэфыкIыгъ. Итхылъэу «Избранные труды и статьи» зыфэдгъэзэн. Статьяу «Ныдэлъфыбзэр — лъэпкъым итыгъ» зыфиIорэм щетхы: «Гъэсагъэхэм къызэраIорэмкIэ ыкIи щыIэныгъэм къызэригъэлъагъорэмкIэ, лъэпкъым ищыгъын зэблихъоу мэхъу, идин зэблихъун ылъэкIыщт, ихэку ыхъожьэу нэмыкI чIыпIэ кощэуи къыхэкIы, ау ыбзэ къыухъумэмэ, иорэдышъохэр щымыгъупшэмэ, лъэпкъыр къызэтенэжьы. Ау уфэмысакъмэ, умыгъашIомэ, бзэр гъэретынчъэ мэхъу, зэшIокIэу иIэми къыщэкIэ. Зэреджэхэрэ тхылъ закъокIэ ащ ищыIэныгъэ къэухъумэгъуай. Бзэр игъэкIотыгъэу рыгупшысэу, рылажьэу, ымыгъэфедэмэ, лъэпкъыр щыIэжьэп. Бзэм ищыIэныгъэ лъэпкъым ицIыфхэм ягражданскэ лъэпкъ Iофыгъохэм ахэр зэрафэгумэкIхэрэми япхыгъ…». Джащ фэдэу бзэшIэныгъэлэжьым игупшысабэ джырэ лъэхъаным иупчIабэмэ яджэуапэу мэхъу. Тштэн, гущыIэм пае, лъэпкъ факультетым ехьылIагъэу (джы Адыгэ филологиемрэ культурэмрэ яфакультет — Хь.М.) гухэкI щытыкIэу иIэр къызхэкIыгъэр: мы факультетым изэхэтыкIэ хъущтым егупшысэ зэхъум бэ къыдилъытэгъагъэр шIэныгъэлэжьым, цIэу иIагъэм — «Факультет национальной школы» — бэ къыригъэубытыгъагъэр; анахь мэхьанэ зиIэу лъэпкъ факультетым изэхэщэнкIэ ылъытэщтыгъэхэр кIэлэцIыкIу IыгъыпIэхэм ащылэжьэщтхэм яегъэджэн («дошкольнэ отделениер»), кIэлэегъаджэхэу агурэ классхэм Iоф ащызышIэщтхэр «начальнэ отделением» щегъэджэгъэнхэр, кIэлэегъаджэхэу апшъэрэ классхэм ащылэжьэщтхэмрэ журналистхэмрэ ягъэхьазэрын. (Керашева З.И. Избранные труды и статьи, т. П, Майкоп, I 995, с. 659-660).
Сыд хъугъэр? Джырэ зэманым системэ зэгъэкIугъэу щытыгъэр щыIэжьэп: «дошкольнэ отделениер», «начальнэ отделениер», «журналистикэр», з/о-р пызыгъэх. Бзыоу зытамэхэр паупкIыгъэр зэрэмыбыбыжьышъурэм фэдэ хъугъэ лъэпкъ факультетри. Арапыбзэри зэгорэм хэтыгъ, тыркубзэри рагъэжьэгъагъ, ау ахэр нахь агъэпытэнхэм ычIыпIэкIэ — Iуахыгъэх… джы къэлъэгъуагъ зэрарэу зэтхыжьыгъэхэм яинагъэ.
Непэ адыгэ диаспорэр адыгэ бзэшIэныгъэ-еджэным зэрэхэпщэн фаер нафэ хъугъэ. Тишъыпкъэу ныбжьыкIэмэ язэпышIэныгъэ тыдэлэжьэнэу уахътэр къэсыгъ. Сыда пIомэ илъэсипшIым Тыркуем и Дюзджэ университет Iофэу щытшIагъэм къыгъэлъэгъуагъ — хэкурыс адыгэхэмрэ хэхэс адыгэхэмрэ зэдеIэжьхэзэ, зэгъусэхэу абзэ къызэдамыIэтыжьмэ, шъхьадж зыдэщысым щысэу, къэзыуцухьэрэ бзэшхомэ ахэкIокIэжьыщтых. Интернетым изэман бгъэфедэу, амал зэриIэкIэ узэрэлъэгъоу, узэнэсызэ ныбжьыкIэхэр зэхапщэхэу, зэрэбгъашIэхэу, лъэпкъ зэхашIэр къэбгъэущыжьмэ, бзэми изэгъэшIэн-игъэпсэун амалхэр къэзыгъотыщт ныбжьыкIэхэри тиIэ хъуных. МыщкIэ апэрэ пшъэдэкIыжьыр зытефэщтыр хэкурысхэр ары: гъэсагъэхэу адыгэ бзэшIэныгъэзехьэхэу щыIэхэм ар афызэшIокIыщт.
Джащ фэдэу зэIукIэу щыIагъэм сигупшысэхэу къыщысымыIошъугъэхэр къыжъунэзгъэсы сшIоигъуагъ, гъэзетеджэ лъапIэхэр. Зэманэу кIорэм къыгъэуцугъэ Iофыгъом — адыгабзэм икъэгъэнэн — тызэкъоуцоным тыкъыфэзыIэтын МАРДЖ макъэу адыгэхэр къэзыIэтыщыгъэр, Тхьэм ыIомэ, зэхэтхын.
Дюзджэ университетым ипрофессорэу ХьакIэмыз Мир.